قازاقستان ازاماتتىعىن الۋدى جەڭىلدەتەتىن قۇجات جوباسى تالقىلاۋعا شىعارىلدى.  

عىلىم جانە جوعارى ءبىلىم مينيسترلىگى قازاقستان ازاماتتىعىن العىسى كەلەتىن جانە قالپىنا كەلتىرگىسى كەلەتىن شەتەلدىكتەرگە قويىلاتىن مەملەكەتتىك ءتىلدى ءبىلۋ تالابىن جەڭىلدەتەتىن بۇيرىق جوباسىن "اشىق نقا" پورتالىنا شىعاردى.

– جوبانى قابىلداۋ قازاقستان رەسپۋبليكاسىنىڭ ازاماتتىعىن الۋعا ۇمىتكەرلەردى تەستىلەۋدىڭ ءاربىر ءپانى بويىنشا سۇراقتار سانىنىڭ ماكسيمالدى تەڭ قاتىناسىن قامتاماسىز ەتۋگە جانە شەكتى دەڭگەيدى 10%-كە تومەندەتۋگە مۇمكىندىك بەرەدى، – دەپ جازىلعان قۇجاتتىڭ تۇسىندىرمەسىندە.

قۇجاتتىڭ رەسمي اتاۋى – "قازاقستان رەسپۋبليكاسىنىڭ ازاماتتىعىنا قابىلداۋ نەمەسە ازاماتتىعىن قالپىنا كەلتىرۋ كەزىندە مەملەكەتتىك ءتىلدى قاراپايىم دەڭگەيدە، قازاقستان رەسپۋبليكاسى كونستيتۋتسياسىنىڭ نەگىزدەرىن، سونداي-اق قازاقستان تاريحىن ءبىلۋ كولەمىن بەكىتۋ تۋرالى" بۇيرىق. وسى بۇيرىقتىڭ جاڭا رەداكتسيامەن جازۋ ۇسىنىلىپ وتىر.

– قازاقستان رەسپۋبليكاسىنىڭ ازاماتتىعىنا قابىلداۋ نەمەسە ازاماتتىعىن قالپىنا كەلتىرۋ كەزىندە مەملەكەتتىك ءتىلدى قاراپايىم دەڭگەيدە 15 (ون بەس) بالدان كەم ەمەس، قازاقستان رەسپۋبليكاسى كونستيتۋتسياسىنىڭ نەگىزدەرىن 20 (جيىرما) بالدان كەم ەمەس، سونداي-اق قازاقستان تاريحىن 15 (ون بەس) بالدان كەم ەمەس ءبىلۋ كولەمى بەكىتىلسىن، – دەلىنگەن جاڭا رەداكتسيا جوباسىندا.

ايتا كەتەيىك قازىرگى ۋاقىتتا قازاق ءتىلىن باستاۋىش دەڭگەيدە ءبىلۋ كەمىندە 36 بالل، ال كونستيتۋتسيا نەگىزدەرىن ءبىلۋ 9 باللدان كەم ەمەس.

قازاقستان تاريحىن ءبىلۋ دەڭگەيىنە قويىلاتىن تالاپتار وزگەرىسسىز قالادى.

جوبا 25 شىلدەگە دەيىن قوعامدىق تالقىلاۋ ءۇشىن "اشىق نقا" پورتالىندا ورنالاستىرىلعان.

Abai.kz