قازاقستاننىڭ جاڭا پارلامەنتى — قۇرىلتايعا سايلاۋ تامىز ايىندا وتەدى. بۇل تۋرالى بۇگىن استانادا عالىمداردى ماراپاتتاۋ راسىمىندە پرەزيدەنت قاسىم-جومارت توقاەۆ مالىمدەدى.

«مەملەكەت باسشىسى رەتىندە ەلىمىز ءۇشىن ەلەۋلى وقيعالار تۋرالى الدىن الا اقپارات بەرۋ وتە ماڭىزدى دەپ سانايمىن. كونستيتۋتسيا كۇشىنە ەنگەن ساتتەن باستاپ ءبىر پالاتالى قۇرىلتاي سايلاۋىن وتكىزۋ جونىندەگى جارلىققا قول قويامىن. سايلاۋ بيىل تامىز ايىندا وتەدى. مۇنى ادەيى ەرتە ايتىپ وتىرمىن. ويتكەنى پارتيالاردىڭ جوسپارلارىن ايقىنداپ، سايلاۋ ناۋقانىنا دايىندىق جۇرگىزۋىنە جەتكىلىكتى ۋاقىتى بولۋى كەرەك. وسىلايشا، پارتيالاردىڭ سايلاۋشىلارمەن ءتيىستى جۇمىس جۇرگىزۋىنە بەس ايعا جۋىق ۋاقىت بەرىلەدى. قۇرىلتاي سايلاۋى قازاقستاننىڭ بۇكىل ساياسي جۇيەسىن جاپپاي «قايتا قۇرۋعا» جول اشادى. بۇل رەتتە ءبىز جۇزەگە اسىرىپ جاتقان ساياسي جانە ەكونوميكالىق رەفورمالار قوعامدىق سانانىڭ وڭ سيپاتتا وزگەرۋىنە اسەر ەتۋگە ءتيىس. مەن مۇنىڭ ماڭىزى جونىندە بىرنەشە رەت ايتتىم»،— دەدى مەملەكەت باسشىسى.

پرەزيدەنت قۇرىلتاي سايلاۋى قازاقستاننىڭ بۇكىل ساياسي جۇيەسىن اۋقىمدى «قايتا قۇرۋ» پروتسەسىنىڭ باستاۋى بولاتىنىن اتاپ ءوتتى.

«سونىمەن قاتار، مەن بۇعان دەيىن دە بىرنەشە رەت اتاپ وتكەنىمدەي، ءبىز جۇرگىزىپ جاتقان ساياسي جانە ەكونوميكالىق رەفورمالاردىڭ قوعامداعى وڭ «مەنتالدى» وزگەرىستەرمەن تىعىز بايلانىستى بولۋى وتە ماڭىزدى»، — دەپ تولىقتىردى ول.

Abai.kz