ءماجىلىس دەپۋتاتى رينات زايىتوۆ ءماجىلىستىڭ پلەنارلىق وتىرىسىندا قازاقستان رەسپۋبليكاسىنىڭ باس پروكۋرورى بەرىك نوعايۇلى اسىلوۆقا دەپۋتاتتىق ساۋال جولدادى.

پرەزيدەنت قاسىم-جومارت توقاەۆ «ادىلەتتى قازاقستان» تۇجىرىمداماسىن جاريالاعاننان بەرى «ادىلدىك»، «ادىلەتتىلىك» ۇعىمى ءبىزدىڭ كۇندەلىكتى قولداناتىن سوزىمىزگە اينالدى. بىراق، نەسىن جاسىرايىق، ايتۋعا جەڭىل بۇل سوزدەردىڭ ارتىندا زىلدەي سالماق بار. ويتكەنى ادىلەتتىڭ شۋاعى ءالى قوعامنىڭ بارلىق سالاسىنا تولىق تاراي قويعان جوق-تۇعىن. ەندى سول ساۋلە جىلىمىقتاي كەڭەيىپ، تاراي باستاعانى بايقالادى.

بۇل سوزىمىزگە زاڭسىز جولمەن يەمدەنگەن اكتيۆتەردى مەملەكەتكە قايتارۋ باعىتىندا جۇيەلى جۇمىس جۇرگىزىلىپ جاتقانى دالەل بولادى. وسى تۇرعىدا قارجى مينيسترلىگىنىڭ جانىنداعى اكتيۆتەردى قايتارۋ كوميتەتى وليگارحيالىق توپتاردىڭ جانە جەكەلەگەن ىقپالدى تۇلعالاردىڭ كۇماندى بايلىعىنا قاتىستى تەرگەۋ شارالارىن كۇشەيتكەنى قۋانتادى.

كەشە عانا بولات نازارباەۆتىڭ ۇلى نۇربول نازارباەۆ سوت شەشىمىمەن 57 ميلليارد تەڭگە كولەمىندەگى اكتيۆىنەن ايىرىلىپ، مەملەكەت مەنشىگىنە قايتارىلدى. سونىمەن بىرگە، وعان 925 ميلليون تەڭگە ايىپپۇل جانە 230,4 ميلليون تەڭگە ايىپاقى سالىندى. ەڭ باستىسى، ونىڭ بارلىق بانك شوتتارى بۇعاتتالىپ، كومپانيا كىرىسىن جانە جەكە مۇلكىن باسقارۋ قۇقىعىنان ايىرىلدى.

بۇل اۋلەتتىڭ رەيدەرلىك جولمەن يەلەنگەن بازارلارى، سونداي-اق، الماتى قالاسى مەن وبلىسىندا زاڭسىز العان جەر تەلىمدەرى تۋرالى قوعامدا ءتۇرلى دەرەكتەر ايتىلىپ ءجۇر. اسىرەسە اتىشۋلى «التىن وردا» بازارىنا قاتىسى ءجيى ءسوز بولادى.

الايدا اتالعان نىسانداردىڭ جوعارىدا تاركىلەنگەن اكتيۆتەردىڭ قاتارىندا بار-جوعى ازىرگە بەلگىسىز. سەبەبى بۇل ماسەلەلەردىڭ ناقتى جاي-جاپسارى اشىق تۇردە جاريالانباعان. سوت شەشىمدەرى شىققانىمەن، پروتسەستەردىڭ جابىق تۇردە ءوتۋى قوعامدا الاڭداۋشىلىق تۋعىزادى. ويتكەنى اكتيۆتەردىڭ قايتارىلعاننان كەيىنگى تاعدىرى، ولاردىڭ حالىققا ناقتى پايداسى، جۇمىس ورىندارىنىڭ ساقتالۋى سياقتى ماسەلەلەر تۇسىنىكسىز قالىپ وتىر.

وسىعان بايلانىستى تومەندەگى سۇراقتاردى قويۋدى ورىندى دەپ سانايمىن:

1. نۇربول نازارباەۆتىڭ يەلىگىندەگى كومپانيالار مەن اكتيۆتەرگە تۇگەندەمە جۇرگىزىپ، ونىڭ زاڭدىلىعىن انىقتاۋ، زاڭسىزدارىن مەملەكەت مەنشىگىنە قايتارۋ.
2. اتالعان قايتارىلعان زاڭسىز اكتيۆتەر جانە ولاردىڭ پايدالانىلۋى بويىنشا تولىق اقپاراتتى جۇرتشىلىققا قولجەتىمدى ەتۋ.
3. «التىن وردا» بازارى جانە الماتى قالاسى مەن وبلىسىنداعى زاڭسىز يەلەنگەن جەر تەلىمدەرى بويىنشا تەرگەۋدى باستاۋ.

قۇرمەتپەن، «امانات» فراكتسياسىنىڭ دەپۋتاتى رينات زايىت

Abai.kz