قارجى نارىعىن رەتتەۋ جانە دامىتۋ اگەنتتىگى تۇتىنۋشىلىق نەسيەلەندىرۋدىڭ ءوسۋىن شەكتەۋدى جانە قازاقستاندىقتاردىڭ قارىزدىق جۇكتەمەسىن ازايتۋدى كوزدەپ وتىر. وسى ماقساتتا بانكتەرگە ارنالعان جاڭا ەرەجەلەردى قامتيتىن قاۋلى جوباسى ازىرلەندى.

قۇجاتقا سايكەس، ەندى كەپىلسىز نەسيەلەر كەيبىر ازاماتتارعا بەرىلمەيدى.

ياعني، كەپىلسىز تۇتىنۋشىلىق قارىزداردى بەرەر كەزدە تومەندەگى جاعدايدا نەسيە بەرۋگە شەكتەۋ ەنگىزىلەدى:

- بانكتىك قارىزدار بويىنشا كۇنتىزبەلىك 30 كۇننەن اسا جانە (نەمەسە) ميكروكرەديتتەر بويىنشا 1 كۇننەن اسا تولەم مەرزىمى وتكەن كەزدە;

- 2025 جىلعى 1 شىلدەدەن باستاپ سوڭعى 36 ايدا نەگىزگى بورىش جانە (نەمەسە) سىياقى بويىنشا تولىق كەشىرىلگەن بەرەشەك بولعان كەزدە;

- سوڭعى 12 ايدا قارىز الۋشىنىڭ ءوز مىندەتتەمەلەرىن تيىسىنشە ورىنداۋىنا ىقپال ەتپەگەن قايتا قۇرىلىمداۋ جۇرگىزىلسە.

جوبادا سوڭعى 12 ايدا 90 كۇننەن اسا كەشىكتىرىلگەن قارىزى بار قارىز الۋشىلار ءۇشىن بورىش جۇكتەمەسىنىڭ كوەففيتسيەنتىن (بجك) 0,5-تەن 0,25-كە دەيىن تومەندەتۋ كوزدەلەدى. بۇل وسى قارىز الۋشىلاردىڭ ارتىق مىندەتتەمەلەر الۋ مۇمكىندىگىن شەكتەۋگە جانە قايتا دەفولت ىقتيمالدىعىن ازايتۋعا مۇمكىندىك بەرەدى، - دەلىنگەن قارجى نارىعىن رەتتەۋ جانە دامىتۋ اگەنتتىگىنىڭ حابارلاماسىندا.

بۇل دەگەنىمىز – مۇنداي ازاماتتىڭ بارلىق نەسيەلەرى بويىنشا اي سايىنعى تولەمدەرىنىڭ جيىنتىق سوماسى ونىڭ تابىسىنىڭ 25%-ىنان اسپاۋى ءتيىس. بۇرىن بۇل شەك 50% بولعان.

بۇل قاراپايىم تىلمەن ايتقاندا مىنادايدى بىلدىرەدى:

- بانكتەر پروبلەمالى قارىز الۋشىلارعا نەسيە بەرمەيدى. ەگەر نەسيە الۋشىدا بۇرىن قارىزىن كەشىكتىرۋ، كەشىرىلگەن بەرەشەك نەمەسە ءساتسىز قايتا قۇرىلىمداۋ بولعان بولسا، جاڭا نەسيە الا المايدى.

- قارىزى بار ادامداردىڭ قايتا قارىز الۋ مۇمكىندىگى ازايادى. ەگەر سىزدە ۇلكەن كەشىكتىرۋ بولعان بولسا، ەندى نەسيە تەك ايلىق تابىسىڭىزدىڭ 25%-ىنان اسپايتىن جاعدايدا عانا بەرىلەدى. مىسالى، جالاقىڭىز 200 مىڭ تەڭگە بولسا، بارلىق نەسيەلەرگە ەڭ كوپ دەگەندە 50 مىڭ تەڭگە جۇمساۋعا رۇقسات.

- قارىزعا باتىپ كەتۋ قاۋپى ازايادى.

جاڭا ەرەجەلەر قازاقستاندىقتاردىڭ بىرىنەن سوڭ ءبىرىن نەسيە الىپ، اقىرى جالاقىسىنىڭ جارتىسىنان كوبى قارىز تولەۋگە كەتەتىن جاعدايعا جول بەرمەۋگە باعىتتالعان.

Abai.kz