ۇلتتىق بانك ينفلياتسيانى تەجەۋ ماقساتىندا تۇتىنۋشىلىق نەسيەگە شەكتەۋ قويۋى مۇمكىن.

بۇل تۋرالى ۇلتتىق بانك توراعاسى تيمۋر سۇلەيمەنوۆ ءماجىلىستىڭ وتىرىسىندا مالىمدەدى.

ايتۋىنشا، قازاقستاندا ينفلياتسيا قاڭتارداعى 8,9%-دان قىركۇيەكتە 12,9%-عا دەيىن ءوستى. باعانىڭ مۇنداي جەدەلدەۋى ەلدەگى اقشا-كرەديت شارتتارىنىڭ السىرەۋىنە اكەلگەن. جىلدىڭ ءبىرىنشى جارتىسىندا ينفلياتسيا 10–11% دەڭگەيىندە بولعان كەزدە بازالىق مولشەرلەمە 16,5% ەدى. بۇل جاعدايدا ناقتى مولشەرلەمە شامامەن 5% بولعان. الايدا ينفلياتسيانىڭ 12,9%-عا دەيىن ءوسۋى ناتيجەسىندە ناقتى بازالىق مولشەرلەمە 3,6%-عا دەيىن تومەندەپ كەتكەن.

مۇنداي جاعدايدا قاتاڭ اقشا-كرەديت ساياساتى تۋرالى ايتۋ قيىن. ينفلياتسيانىڭ جوعارى دەڭگەيى، ساۋدا بالانسى ءپروفيتسيتىنىڭ ازايۋى جانە يمپورتقا سۇرانىستىڭ ارتۋى تەڭگەنىڭ السىرەۋىنە دە ىقپال ەتتى، – دەدى سۇلەيمەنوۆ.

وسىعان بايلانىستى ۇلتتىق بانك ماكروەكونوميكالىق تەپە-تەڭدىكتى قالپىنا كەلتىرۋ جانە ينفلياتسيانى باقىلاۋدان شىعارماۋ ماقساتىندا 10 قازاندا بازالىق مولشەرلەمەنى 18%-عا دەيىن كوتەردى.

رەتتەۋشى بۇل شەشىم ينفلياتسيالىق قىسىمدى تومەندەتىپ، ينفلياتسيالىق كۇتۋلەردى تۇراقتاندىرۋعا، تەڭگەدەگى اكتيۆتەردىڭ قۇنىن ارتتىرۋعا جانە ۇلتتىق ۆاليۋتانى نىعايتۋعا باعىتتالعانىن اتاپ ءوتتى.

Abai.kz