ەرجان ساكەنۇلى 1991 جىلى 23 مامىردا قازىرگى جەتىسۋ وبلىسى، سارقان قالاسىندا ءبىلىمدى، ۇستازدار وتباسىندا دۇنيەگە كەلدى. اكەسى فيزيكا-ماتەماتيكا ءپانىنىڭ مۇعالىمى بولسا، اناسى باستاۋىش سىنىپ مۇعالىمى. وتباسىنىڭ كىشىسى بولىپ وسكەن ەرجانعا بالا كەزىنەن اتا-اناسى جان-جاقتى ءبىلىم الۋدى، قورشاعان ورتانى قىزىعا زەرتتەۋدى ۇيرەتكەن. 1996 جىلى وتباسى جەتىسۋ وبلىسى، ەسكەلدى اۋدانىنىڭ قارابۋلاك اۋىلىنا كوشىپ كەلدى. سول جەردە مەكتەپ ءبىلىمىن اياقتاپ، بولاشاق كاسىبي جولىنا العاشقى قادامدارىن باستى.

بىلىمگە دەگەن ىنتاسى ەرجاندى ءارى قاراي دامۋعا جەتەلەدى. ول سۇلەيمان دەميرەل اتىنداعى ۋنيۆەرسيتەتكە ءتۇسىپ، «ەكى شەتەلدىك ءتىل» ماماندىعى بويىنشا ءبىلىم الدى. سونىمەن قاتار، ازاماتتىق اۆياتسيا اكادەمياسىن ءتامامداپ، «اۋە قوزعالىسىن قىزمەت كورسەتۋ» سالاسى بويىنشا كاسىبي دايىندىعىن ارتتىردى. بۇل دايىندىق وعان اۆياتسيا سالاسىندا سەنىمدىلىكپەن جۇمىس ىستەۋگە، كۇردەلى مىندەتتەردى جاۋاپكەرشىلىكپەن ورىنداۋعا مۇمكىندىك بەردى.

ەرجان 2016 جىلى اۆياتسيا سالاسىنا اياق باستى. ول كەزدە رگپ «قازاەروناۆيگاتسيا» ماماندار دايارلاۋ ورتالىعىنا وقۋعا ءتۇستى. 2017 جىلعى اقپان ايىندا ورتالىقتى تامامداعان سوڭ، ناۋرىز ايىندا تاسىمالداۋ قىزمەتىنە ورنالاستى. سول جەردە 2018 جىلعى قىركۇيەككە دەيىن قىزمەت اتقاردى، كەيىن الماتى حالىقارالىق اۋەجايىنا قاتىستى جۇك جانە جولاۋشى تاسىمالداۋ قىزمەتىنە اۋىسىپ، وسى كۇنگە دەيىن ەلىمىزدىڭ ەڭ ءىرى تاسىمالداۋ وپەراتورلارىنىڭ بىرىندە كاسىبي قىزمەتىن جالعاستىرىپ كەلەدى. وسى ۋاقىتقا دەيىن ەرجان جىل سايىن ورتا ەسەپپەن 50 000–60 000 جولاۋشىنى جانە 5 000–6 000 توننا جۇكتى قاۋىپسىز تاسىمالدادى.

ەرجاننىڭ كاسىبي تاجىريبەسىندە ەرەكشە وقيعالار جەتكىلىكتى. 2020 جىلعى پاندەميا كەزەڭى ەستە قالادى، سول ۋاقىتتا رەيستەر سانى مينيمالدى دەڭگەيگە دەيىن قىسقارعانىمەن، ول ءوز مىندەتىن جاۋاپكەرشىلىكپەن ورىندادى. سول كەزدە اۆياتسيا سالاسىنىڭ قانشالىقتى كۇردەلى ءارى ماڭىزدى ەكەنىن تولىق سەزىندى. سول جىلدارى الەمگە تانىمال ان-225 ۇشاعىن قىزمەتكە قابىلداپ، ونىڭ جولاعى مەن جۇكتەرىنىڭ قاۋىپسىزدىگىن قامتاماسىز ەتۋگە تىكەلەي قاتىسۋ – ەرجان ءۇشىن ومىرىندەگى ۇلكەن تاجىريبە بولدى.

ەرجان ساكەنۇلى بولاشاق ماماندارعا ايتار كەڭەسىندە ەشتەڭەدەن قورىقپاۋعا شاقىرادى. جاڭا نارسەلەردى سىناپ كورۋ، جۇمىس بارىسىندا كەز كەلگەن تاجىريبەدەن ۇيرەنۋ، ءوز سالاڭىزداعى جاڭالىقتاردى ۇنەمى قاداعالاۋ – كاسىبي جەتىستىكتىڭ باستى كەپىلى. سونىمەن قاتار، تاجىريبەلى ارىپتەستەردەن كەڭەس الىپ، ءوز ءبىلىمىڭدى ۇنەمى تولىقتىرۋ ماڭىزدى. ۇزدىك بولۋعا تالپىنۋ – سالاۋاتتى باسەكەلەستىك پەن كاسىبي دامۋدىڭ نەگىزى.

دۋكەنوۆ ەرجان ساكەنۇلى – اۆياتسيا سالاسىنىڭ ماقتانىشى. ونىڭ كاسىبىنە دەگەن سۇيىسپەنشىلىگى، ادال ەڭبەگى جانە جاڭا تاجىريبەلەرگە اشىقتىعى – تەك بۇگىنگى كۇنى عانا ەمەس، بولاشاقتا دا قازاقستان اۆياتسياسىنىڭ دامۋىنا ايرىقشا ۇلەس قوساتىنى ءسوزسىز. ەرجان سياقتى مامانداردىڭ ارقاسىندا ەلدىڭ تاسىمالداۋ سالاسى ءاردايىم سەنىمدى، قاۋىپسىز جانە كاسىبي دەڭگەيدە دامىپ كەلەدى.

Abai.kz