كەشەلى-بەرى ورىس اقپاراتى ۇلارداي شۋلاپ، ء“تىرى قالعان” شويگۋدى ءسوز ەتۋدە. جاسى جەتپىستى القىمداعان سەرگەي كۇجۇگەتوعلى بۇگىن ءبىر ولىمنەن امان قاپتى…

راس-وتىرىگى قۇدايعا ايان، ايتەۋىر ورىس اقپاراتى بۇيدەيدى:

رەسەيدىڭ كۇشتىك قۇرىلىمدارى سەرگەي شويگۋدىڭ كوزىن جويماق بولعان ديۆەرسيالىق توپتى قۇرىقتاعان. ولار ماسكەۋدىڭ تروەكۋر بەيىتىنە، تۋىستارىنىڭ باسىنا بارماق بولعان شويگۋدى مۇقيات اڭدىعان. بەيىت باسىنداعى گۇل سالعىشقا باقىلاۋ كامەراسىن ورناتقان. كەيىن شويگۋ كەلگەندە سول جەردە، بەيىتتە جارىپ جىبەرمەك بولعان.

ۇستالعان 3 ادام. ەكەۋى - ەرلى-زايىپتى ناشاقورلار. ءۇشىنشىسى - ورتالىق ازيالىق ميگرانت. قىسقاسى وسى.

بۇل شويگۋ رەسەي پرەزيدەنتى ءپۋتيننىڭ ەڭ سەنىمدى ادامدارىنىڭ ءبىرى ەدى. رەسەيدە قايسىبىر جىلدارى تىۆالىق جىگىتتىڭ تاسى ورگە دومالادى.

قازىر جاسى 70-تە. ءوزى تىۆا. ناعاشىلارى ۋكراينا جەرىنەن شىققان. ءوزى ۋكراينانىڭ لۋگانسكىسىندە شوقىندىرىلعان.

بۇل رەسەيدە ءبىراز قىزمەتتى، ءبىراز كرەسلونى توزدىرعان. باسقاسىن ايتپاعاندا رەسەيدىڭ “سوعىس مينيسترلىگىن” 2012 جىلدان 2024 جىلعا دەيىن اۋىسپاي باسقاردى. ەسەبى كۇشتى بولعاسىن، پۋتين دە بەتىن قاقپادى. تەكسەرىس كەزىندە جىلجىمالى، قۇراستىرمالى اسكەري-زاۋىتتاردى كورسەتىپ، ء“وندىرىس ورلەپ تۇر”، “اسكەر ءالدى”، “بىزگە تەڭى جوق” دەگەنگە جۇرتتى جاقسىلاپ سەندىردى. ونىسى ۋكرايناعا قارسى سوعىستا اشكەرە بوپ، شويگۋدىڭ اتىنا كىر جۇقتى. سەنىم سەتىنەدى. باستىعىنىڭ كوزى بۇزىلىپ، كوڭىلى قالدى. ونىڭ بەلشەدەن باتقان بىلىق-شىلىعىن اشكەرەلەپ بەرگەننىڭ ءبىرى - ايدىك پريگوجين ەدى. ال سوعىستا اتارعا وعى تاۋسىلعان، ۇشىرارعا درونى بولماعان رەسەي اقىرى ايانىشتى حالدە سولتۇستىك كورەي مەن يرانعا الاقان جايدى.

دۋمانىڭ ءوزى: “شويگۋدىڭ كەزىندە 11 تريلليون رۋبل قولدى بولعان”، - دەپ دابىل قاقتى. سودان شويگۋ 2024 جىلى قىزمەتتەن الىندى. بىراق، قامالمادى. رف قاۋىپسىزدىك كەڭەسىنە حاتشى بوپ قونجيدى.

ال ونىڭ ورىنباسارلارى “جەمقورلىق” بابىمەن سوتتالىپ جاتتى ءھام جاتىر.

شويگۋدىڭ سوتتالعان ورىنباسارلارى مەن گەنەرالدارى:

1) گەنەرال تيمۋر يۆانوۆ (ورىنباسار);

2) گەنەرال-لەيتەنانت يۋري كۋزنەتسوۆ (كادر ءبولىمىنىڭ باستىعى);

3) پولكوۆنيك ۆلاديمير ۆەرتەلەتسيكي (تەندەرگە جاۋاپتى باستىق);

4) پولكوۆنيك سەرگەي تريگيلەۆ (ماسكەۋدىڭ اسكەري كوميسسارى);

5) اندرەي بەلكوۆ (اسكەري قۇرىلىسقا جاۋاپتى باستىق);

6) ارميا گەنەرالى پاۆەل پوپوۆ (ورىنباسارى);

7) گەنەرال-مايور ۆالەري مۋمينجانوۆ (لەنينگراد اسكەر وكرۋگىنىڭ تەندەر ىسىنە جاۋاپتى باستىق);

8)گەنەرال-لەيتەنانت ۆاديم شامارين (گەنشتاب ورىنباسارى);

9) گەنەرال-مايور يۆان پوپوۆ (58-ءشى ارميا قولباسشىسى);

10) ۆياچەسلاۆ احمەدوۆ (“پاتريوت” اسكەري-ساياباعىنىڭ ديرەكتورى);

11) گەنەرال-مايور ۆلاديمير شەستەروۆ;

بۇلار تۇتقىندالعاندار مەن سوتتالعاندار. ال قىزمەتتەرىنەن قۋىلعاندار:

1) گەنەرال-پولكوۆنيك يۋري سادوۆەنكو;

2) رف قورعانىس مينيسترلىگىنىڭ ءباسپاسوز حاتشىسى روسسيانا ماركوۆسكايا;

3) گەنەرال-لەيتەنانت سۋحراب احمەدوۆ;

4) “زاممينيستر” رۋلان تساليكوۆ;

5) “زاممينيستر” تاتيانا شەۆتسوۆا;

6) “زاممينيستر” نيكولاي پانكوۆ;

7) گەنەرال-لەيتەنانت الەكساندر بۋراچەنوك;

8)شويگۋدىڭ كەڭەسشىسى اندرەي يلنيتسكي.

بۇلاردىڭ بارلىعى شويدىڭ كەزىندە رەسەي ارمياسىن باسقارعان ادامدار. ءبارى ءىستى بولعان، بىلىعى اشىلعان، قولى كىسەندەلگەن، قىزمەتتەن قۋىلعان ادامدار.

بىراق، وسىنشاما بىلىق-شىلىقتان شويگۋ ء“تىرى” شىقتى. ويتكەنى، شويگۋدىڭ ءپۋتيننىڭ “دوسى” دەگەن تاعى ءبىر شەنى بار-دى. ىم-جىمى ءبىر. بىرگە تاۋ ارالاپ، سۋ جاعالاپ ءجۇرىپ وتەۋىن بەرگەن بولسا كەرەك. ونىڭ توپان-سەلدەن قۇرعاق شىعۋىنىڭ تاعى ءبىر سەبەبى - سوعىس جاعدايىندا پۋتين ءوز اسكەرباسىن قاماي المايتىن ەدى. ول رەسەيدىڭ ەڭ ءىرى جەڭىلىسى بولماق. سوندىقتان كرەمل شويگۋدى ء“تىرى” قالدىردى. بىراق، ازىرگە عانا…

سوندىقتان، ەرتە مە، كەش پە، ءتۇبى بۇل سوعىس اياقتالسا، ول كەزدە شويگۋ ءتىرى بولسا، كورەرى تۇرمە بوپ قالۋى بەك مۇمكىن…

Abai.kz