الماتىدا 2025 جىلى 10 مىڭعا جۋىق قاراۋسىز جانۋار ۇستالعان.

الماتى ۆەتەرينارلىق قىزمەتىنىڭ مالىمەتىنشە، مەگاپوليستە بىلتىر قاڭعىباس جانە قاراۋسىز قالعان جانۋارلاردىڭ سانىن رەتتەۋ، تۇرعىنداردىڭ قاۋىپسىزدىگىن قامتاماسىز ەتۋ جانە جانۋارلارعا جاۋاپتى قاراۋ قاعيداتتارىن ساقتاۋ ماقساتىندا جۇيەلى جۇمىستار جۇرگىزىلگەن. بۇل جۇمىستارعا 19 ارنايى اۋلاۋ بريگاداسى، 91 قىزمەتكەر جانە 22 ارنايى جابدىقتالعان اۆتوكولىك جۇمىلدىرىلدى. اتاپ ايتقاندا، بارلىعى 9 477 يت جانە 204 مىسىق اۋلانعان.

ونىڭ ىشىندە ازۆق (اۋلاۋ – زارارسىزداندىرۋ – ۆاكتسيناتسيالاۋ – قايتا جىبەرۋ) باعدارلاماسى اياسىندا: 1 500 قاڭعىباس يت جانە 108 مىسىق ۋاقىتشا ۇستاۋ پۋنكتتەرىندە ۇستالىپ، ستەريليزاتسيادان جانە ۆاكتسيناتسيادان ءوتتى. كەيىن ولار باستاپقى ۇستالعان اۋماقتارىنا قايتا جىبەرىلدى.

- اداپتسيا باعدارلاماسى اياسىندا 1 660 قاڭعىباس يت جاڭا يەلەرىنە بەرىلىپ، بۇل شارا جانۋارلار سانىن ىزگىلىك قاعيداتتارىنا ساي ازايتۋعا مۇمكىندىك بەردى. ادامدارعا قاۋىپ ءتوندىرۋى مۇمكىن، اۋىر دەرتكە شالدىققان نەمەسە اگرەسسياسى جوعارى 3 480 قاڭعىباس يتكە قولدانىستاعى ۆەتەريناريالىق-سانيتاريالىق نورمالارعا سايكەس جانسىزداندىرۋ شارالارى قولدانىلدى، - دەپ حابارلادى ۆەتەرينارلىق قىزمەت.

ال 2026 جىلى الماتىدا قاڭعىباس جانۋارلاردى اۋلاۋ، ۋاقىتشا ۇستاۋ، ۆەتەريناريالىق وڭدەۋ جانە حالىقتىڭ قاۋىپسىزدىگىن قامتاماسىز ەتۋ بويىنشا ءىس-شارالاردى جۇزەگە اسىرۋعا جەرگىلىكتى بيۋدجەتتەن 834,3 ملن تەڭگە بولىنگەن.

جەدەل ۆەتەريناريالىق كومەك

2025 جىلى الماتىدا العاش رەت جەدەل ۆەتەريناريالىق كومەك ىسكە قوسىلدى. ونىڭ نەگىزگى ماقساتى – شۇعىل ۆەتەرينارلىق كومەكتى قاجەت ەتەتىن قيىن جاعدايلاردا العاشقى كومەك كورسەتىپ، زارداپ شەككەن جانۋارلاردى ۆەتەرينارلىق كلينيكالارعا تاسىمالداۋ.

الماتى ۆەتەرينارلىق قىزمەتىنىڭ مالىمەتىنە سايكەس، بىلتىر جەدەل ۆەتەريناريالىق كومەك قىزمەتىنە تۇرعىنداردان جانە ۇيىمداردان 1240 ءوتىنىش كەلىپ تۇسكەن. ونىڭ ىشىندە 750 ءوتىنىش جەدەل تارتىپپەن ورىندالدى.

- تۇسكەن وتىنىشتەر نەگىزىندە ارنايى بريگادالار: جول-كولىك وقيعاسىنان زارداپ شەككەن، ءتۇرلى جاراقات العان، اۋرۋ نەمەسە السىرەگەن، ومىرىنە قاۋىپ تونگەن قاڭعىباس، جابايى جانە قاراۋسىز جانۋارلارعا جەدەل ۆەتەريناريالىق كومەك كورسەتتى. قالعان وتىنىشتەر جانۋار تابىلماۋى، ءوتىنىش بەرۋشىمەن كەرى بايلانىس بولماۋى نەمەسە جاعدايدىڭ وزەكتىلىگىن جوعالتۋ سەبەبىمەن ورىندالمادى، - دەلىنگەن جاۋاپتا.

قازىرگى تاڭدا جەدەل ۆەتەريناريالىق كومەك قىزمەتىندە 4 ۆەتەريناريالىق مامانى بار ەكى بريگيدا قىزمەت اتقارادى. اتالعان قىزمەتتىڭ ۇزدىكسىز جۇمىسىن قامتاماسىز ەتۋ ءۇشىن جەرگىلىكتى بيۋدجەتتەن 11 ملن تەڭگە بولىنگەن.

ەسكە سالايىق، بىلتىر الماتىدا قاڭعىباس جانۋارلاردى اۋلاۋعا 580 ملن تەڭگە ءبولىندى.

Abai.kz