كەز كەلگەن ونەر ورداسىنىڭ تاريحى عيماراتتان ەمەس، سول شاڭىراقتىڭ ىرگەسىن بەكىتىپ، العاشقى كۇننەن باستاپ ونىڭ تىنىس-تىرشىلىگىن قالىپتاستىرعان ادامداردان باستالادى. الماتى قالاسىنداعى «الاتاۋ» ءداستۇرلى ونەر تەاترى 2016 جىلى ەسىگىن ايقارا اشقان ساتتەن باستاپ ۇلتتىق ونەردى دارىپتەۋدى باستى مۇرات ەتتى. سول كۇننەن بەرى بۇل تەاتردىڭ قالىپتاسۋى مەن دامۋىنا ولشەۋسىز ەڭبەك ءسىڭىرىپ كەلە جاتقان ارداگەر قىزمەتكەرلەر بار.

ولار — تەاتردىڭ ءار قويىلىمىنىڭ، ءاربىر مادەني شارانىڭ ءمىنسىز وتۋىنە جاۋاپتى بولعان جاندار. قيىندىققا مويىماي، جاڭادان قۇرىلعان ۇجىممەن بىرگە تەاتردىڭ باعىت-باعدارىن ايقىنداپ، ونى بۇگىنگى دەڭگەيىنە جەتكىزۋگە ۇلەس قوسقان تاجىريبەلى ماماندار.

سۋرەت: «الاتاۋ» ءداستۇرلى ونەر تەاترىنان الىندى.

كينو سالاسىنا ارنالعان عۇمىر

دوڭگەلەكتەردىڭ ءدۇبىرى… ۇلى سارىارقانىڭ شەكسىز دالاسىن بويلاي پويىز جۇيتكىپ كەلەدى. بولاشاققا قاراي اسىققان سول پويىزدا جاس جىگىت بار — كينوينجەنەر ديپلومىن ەندى عانا العان ول قازاق كسر مەملەكەتتىك كينو كوميتەتىنىڭ جولداماسىمەن جۇمىسقا اتتانۋدا. دوڭگەلەك سوعىسىنا ۇندەسە ونىڭ جۇرەگى دە ءدۇرسىل قاعادى. ول قازاقستاننىڭ ەڭ كورىكتى قالالارىنىڭ ءبىرى — ىلە الاتاۋىنىڭ باۋرايىندا ورنالاسقان الماتى قالاسىنا بەت العان.
جاس جىگىت ول كەزدە بۇل قالانىڭ جۇرەگىن ماڭگىلىككە باۋراپ الىپ، ءومىرىنىڭ ەڭ باقىتتى، جارقىن، مازمۇندى جىلدارىن وسىندا وتكىزەتىنىن ءالى بىلمەگەن ەدى. جيىرما ەكى جاستاعى جىگىت «ارمان» كينوتەاترىنىڭ تابالدىرىعىن اتتاعان ساتتەن باستاپ، ول كورەرمەندەرگە كينو قىزمەتىن كورسەتۋ ىسىنە قىرىق جىلدان استام عۇمىرىن ارنايدى. بۇل — ۆلاديمير دولگوۆ.

ۆلاديمير سەرگەەۆيچ ركفسر-دىڭ تامبوۆ وبلىستىق قالاسىندا جۇمىسشى مەن ءۇي شارۋاسىنداعى انانىڭ وتباسىندا 1952 جىلى دۇنيەگە كەلگەن. ونى اكەسى سەرگەي مەن اناسى الەكساندرا تاربيەلەپ ءوسىردى. مەكتەپتى بىتىرگەن سوڭ لەنينگراد كينوينجەنەرلەر ينستيتۋتىنا وقۋعا ءتۇسىپ، كينوينجەنەر ماماندىعىن يگەردى. ەڭبەك جولىن الماتى قالاسىنداعى ەكى زالدى «ارمان» كينوتەاترىندا تەحنيكالىق جەتەكشى قىزمەتىنەن باستادى. بۇل وتكەن عاسىردىڭ الىستا قالعان 70-جىلدارى ەدى…

«ارمان» كينوتەاترىنىڭ تەحنيكالىق جەتەكشىسى قىزمەتىنە كىرىسپەس بۇرىن، ۆلاديمير بۇكىل كينەماتوگرافيالىق ۇدەرىستى — كينوستۋديادان باستاپ كينوپروكاتقا دەيىن — ءوز كوزىمەن كورىپ، تەرەڭ ءتۇسىنۋدى ماقسات ەتتى. كينو سالاسىنىڭ ءاربىر بۋىنىندا ول تەحنولوگيانىڭ قىر-سىرىن مەڭگەرىپ قانا قويماي، كينو ونەرىنە ءومىرىن ارناعان قىزىقتى جاندارمەن تانىستى. ولاردىڭ قاتارىندا قازاق كينوسىنىڭ اڭىز تۇلعالارى — كسرو حالىق ارتىستەرى شاكەن ايمانوۆ، فاريدا ءشارىپوۆا، يدريس نوعايباەۆ، ءاسانالى ءاشىموۆ، قازاق كسر حالىق ارتىستەرى ءامينا ومىرزاقوۆا، نۇرمۇحان ءجانتورين بار ەدى.

ۆلاديمير سەرگەەۆيچتىڭ كوپجىلدىق كاسىبي قىزمەتى الماتى قالاسىنىڭ كينو جانە مادەنيەت سالاسىنىڭ دامۋىمەن تىعىز بايلانىستى. 1976–1987 جىلدارى ول «ارمان» كينوتەاترىندا اعا ينجەنەر قىزمەتىن اتقاردى.

1987–1995 جىلدارى الماتى قالالىق كينوفيكاتسيا باسقارماسىنىڭ باس ينجەنەرى بولدى. 1995 جىلدان باستاپ ونىڭ ەڭبەك جولى باسقارۋشىلىق قىزمەتتەرمەن جالعاستى. ول: 1995–1997 جج. — «ارمان» كينوفەستيۆال ورتالىعى («قازاقكينوفەست» اق) ديرەكتورى. 1997–1998 جج. — الماتى قالالىق كينوۆيدەو قىزمەتى باسقارماسىنىڭ باس ينجەنەرى. 1998–1999 جج. — اتالعان باسقارمانىڭ باسشىسى. 1999–2003 جج. — الماتى قالاسى اكىمىنىڭ «كينوۆيدەووبسلۋجيۆانيە» كوممۋنالدىق قازىنالىق كاسىپورنىنىڭ باسشىسى. 2003–2008 جج. — الماتى قالاسى مادەنيەت باسقارماسى جانە دەپارتامەنتىنە قاراستى «كينوۆيدەووبسلۋجيۆانيە» كاسىپورنىنىڭ ديرەكتورى. 2008–2011 جج. — اتالعان مەكەمەنىڭ ديرەكتورى قىزمەتىن جالعاستىردى. 2012–2014 جج. — الماتى قالاسى مادەنيەت باسقارماسىنا قاراستى «الماتىكينو» مەكەمەسىنىڭ ديرەكتورى. 2014–2016 جج. — «ناسيحات» مەملەكەتتىك كوممۋنالدىق قازىنالىق كاسىپورنىنىڭ ديرەكتورى.

2016 جىلدان باستاپ ۆلاديمير سەرگەەۆيچ الماتى قالاسى مادەنيەت باسقارماسىنا قاراستى «الاتاۋ» ءداستۇرلى ونەر تەاترىمەن تىعىز بايلانىستى ەڭبەك ەتىپ كەلەدى. ول ءار جىلدارى كينوقىزمەت كورسەتۋ ءبولىمىنىڭ جەتەكشىسى، ەستۋ قابىلەتى بۇزىلعاندار مادەنيەت ءۇيىنىڭ عيماراتىن پايدالانۋ جونىندەگى ينجەنەرى، كورۋ جانە ەستۋ قابىلەتى بۇزىلعان ازاماتتاردىڭ مادەني بوس ۋاقىتىن ۇيىمداستىرۋ ءبولىمىنىڭ مامانى قىزمەتتەرىن اتقاردى. قازىرگى ۋاقىتتا دا وسى سالادا ەڭبەك ەتۋدە.

ۆلاديمير سەرگەەۆيچ دولگوۆ ءوز قىزمەتىنە شىعارماشىلىقپەن قارايتىن، جاۋاپكەرشىلىگى جوعارى، ءتارتىپتى، ساۋاتتى ءارى بىلىكتى مامان رەتىندە تانىلعان. ونىڭ باسشىلىعىمەن الماتى قالاسىنىڭ كينوتەاترلارىندا اۆتوماتتاندىرۋ جۇمىستارى جۇرگىزىلىپ، كينو كورسەتىلىم ساپاسىن ارتتىرۋعا باعىتتالعان بىرقاتار راتسيوناليزاتورلىق ۇسىنىستار ەنگىزىلدى. قازاقستاندا العاش رەت ستەرەوكينو ستەرەوسكوپيالىق جابدىقتارى مەن DOLBY STEREO دىبىس جۇيەلەرى ورناتىلدى.

ول ءوز ءبىلىمىن ءاردايىم ارىپتەستەرىمەن، سونىڭ ىشىندە جەكە كينوتەاتر ماماندارىمەن دە ءبولىسىپ كەلەدى. ۆلاديمير سەرگەەۆيچتىڭ تالىمىنەن وتكەن بىرنەشە بۋىن شاكىرتتەر بۇگىندە قازاقستاننىڭ تۇكپىر-تۇكپىرىندەگى كينوتەاترلاردا تابىستى ەڭبەك ەتۋدە.

الماتى قالاسىنداعى پوليتەحنيكالىق كوللەدجدىڭ ءوتىنىشى بويىنشا جىل سايىن كينو-ۆيدەو-اۋديو-ۆيزۋالدىق تەحنيكا ءبولىمىنىڭ مەملەكەتتىك ءبىتىرۋ ەمتيحاندارىنىڭ مەملەكەتتىك ەمتيحان كوميسسياسىنىڭ توراعاسى رەتىندە قاتىسادى. ۆلاديمير سەرگەەۆيچ الماتى قالالىق قازاقستان رەسپۋبليكاسىنىڭ مەملەكەتتىك رامىزدەرى جونىندەگى كوميسسياسىنىڭ مۇشەسى. 2008 جىلدان باستاپ قازاقستان كينەماتوگرافيستەر وداعىنىڭ مۇشەسى. كوپجىلدىق ادال ەڭبەگى ءۇشىن قازاقستان رەسپۋبليكاسىنىڭ تۇڭعىش پرەزيدەنتىنىڭ جارلىقتارىمەن: «قازاقستان رەسپۋبليكاسىنىڭ تاۋەلسىزدىگىنە 10 جىل»، «قازاقستان كونستيتۋتسياسىنا 10 جىل»، «قازاقستان رەسپۋبليكاسىنىڭ تاۋەلسىزدىگىنە 20 جىل» مەرەيتويلىق مەدالدارىمەن، سونداي-اق قازاقستان رەسپۋبليكاسى مادەنيەت جانە اقپارات مينيسترلىگىنىڭ «مادەنيەت قايراتكەرى» بەلگىسىمەن ماراپاتتالعان.

سۋرەت: «الاتاۋ» ءداستۇرلى ونەر تەاترىنان الىندى.

ادال ەڭبەك پەن رۋحاني قىزمەتتىڭ ۇلگىسى

قازاق ونەرىندە ءوز تاعدىرىن ساحنامەن، كامەرامەن جانە كورەرمەن جۇرەگىمەن ماڭگىلىككە بايلانىستىرعان جاندار بار. سولاردىڭ ءبىرى — اكتەر، ونەر قايراتكەرى عازيزحان يبىرايحانۇلى ءادىلحانوۆ.

ول 1959 جىلى شىعىس قازاقستان وبلىسى، زايسان اۋدانىنا قاراستى قاسيەتتى شىلىكتى اۋىلىندا دۇنيەگە كەلدى. تابيعاتى تۇمسا، تاريحى تەرەڭ بۇل ءوڭىر تالاي دارىندى پەرزەنتتى تۇلەتكەن. عازيزحان يبىرايحانۇلىنىڭ بويىنداعى ونەرگە دەگەن ىنتا مەن رۋحاني تەرەڭدىك تە سول تۋعان توپىراقتان باستاۋ العانداي.

مەكتەپ قابىرعاسىن تامامداعان سوڭ اۋىلدا ەڭبەك ەتىپ، ءومىردىڭ العاشقى ساباقتارىن تاجىريبەدەن ۇيرەندى. ال 1979 جىلى ول ونەر جولىن سانالى تۇردە تاڭدادى. الماتى قالاسىنداعى ەسترادا جانە تسيرك ونەرى ستۋدياسىنا وقۋعا ءتۇسىپ، 1981 جىلى ونى ويداعىداي اياقتادى. بۇل كەزەڭ ونىڭ ساحنالىق شەبەرلىگىنىڭ ىرگەتاسىن قالاعان جىلدار بولدى.

جاس ونەرپاز قازاقستان رەسپۋبليكاسىنىڭ حالىق ءارتىسى گۇلجيحان عاليۆادان ءتالىم الىپ، ونىڭ شاكىرتى اتاندى. ۇستاز بەن شاكىرت اراسىنداعى رۋحاني بايلانىس عازيزحان ءادىلحانوۆتىڭ اكتەرلىك بولمىسىنىڭ قالىپتاسۋىنا ايرىقشا ىقپال ەتتى.

1981 جىلى ول الماتى مەملەكەتتىك تەاتر ينستيتۋتىنا وقۋعا ءتۇسىپ، 1986 جىلى اكتەرلىك ماماندىق بويىنشا جوعارى ءبىلىم الدى. وقۋ بارىسىندا قازاق ساحنا ونەرىنىڭ الىپ تۇلعالارى — كاۋكەن كەنجەتاەۆ، تورعىن تاسىبەكوۆا، ەسىم سەگىزباەۆ، ءماريام جاقسىمبەتوۆا سىندى حالىق ارتىستەرىنىڭ شەبەرحاناسىنان ءوتىپ، كاسىبي شىڭدالۋ مەكتەبىنەن ءوتتى.

عازيزحان يبىرايحانۇلىنىڭ شىعارماشىلىق جولى كەڭ ءارى سان قىرلى. ول ۇزاق جىلدار بويى جەتىساي مۋزىكالىق تەاترىندا، «قازاقفيلم» كينوستۋدياسىندا جەمىستى ەڭبەك ەتتى. سونىمەن قاتار «قازاقستان»، «حابار»، «الماتى»، «حيت تۆ» تەلەارنالارىندا قىزمەت اتقارىپ، كورەرمەنگە سان الۋان وبرازدارىمەن تانىلدى. تەاتر، كينو جانە تەلەجۋرناليستيكا سالالارىنداعى بۇل تاجىريبە ونىڭ اكتەرلىك دياپازونىن كەڭەيتىپ، كاسىبي بەدەلىن ارتتىردى.

2016 جىلدان باستاپ عازيزحان ءادىلحانوۆ الماتى قالاسى مادەنيەت باسقارماسىنا قاراستى «الاتاۋ» ءداستۇرلى ونەر تەاترى جانىنداعى كورۋ جانە ەستۋ مۇمكىندىگى شەكتەۋلى ازاماتتاردىڭ مادەني دەمالىسىن ۇيىمداستىرۋ ءبولىمىنىڭ ونەرپازدارىنان قۇرالعان «اتامۇرا» ۇلت-اسپاپتار ءانسامبلى، «ارمانداستار»، «ءان-جۇرەك»، «دوس» ۆوكالدى-اسپاپتى انسامبلدەرى نەگىزىندە شىعارماشىلىق باعىتتا جۇمىس جاساپ كەلەدى.

ونەرگە سىڭىرگەن ەڭبەگى ەلەۋسىز قالعان جوق. ول «قازاق ونەرىنىڭ قايراتكەرى»، «مادەنيەت قايراتكەرى» اتاقتارىنىڭ، سونداي-اق «ەڭبەك داڭقى»، «باتىرلار شاپاعاتى»، «ازيا سۇلتانى» مەدالدارىنىڭ يەگەرى. سونىمەن قاتار قازاقستان رەسپۋبليكاسى پرەزيدەنتىنىڭ «قۇرمەت گراموتاسىمەن» ماراپاتتالعان.

عازيزحان يبىرايحانۇلى ءادىلحانوۆ — ونەردى تەك كاسىپ ەمەس، ومىرلىك مۇرات دەپ تۇسىنگەن تۇلعا. ونىڭ ساحناداعى ءاربىر بەينەسىنەن ومىرگە دەگەن قۇرمەت، ۇلتتىق رۋح پەن كورەرمەنگە دەگەن ادالدىق سەزىلەدى. وسىنداي جانداردىڭ ارقاسىندا قازاق ونەرى ءوز بيىگىنەن تۇسپەي، ۇرپاقتان ۇرپاققا جالعاسىپ كەلەدى.

سۋرەت: «الاتاۋ» ءداستۇرلى ونەر تەاترىنان الىندى.

ەڭبەك پەن ەسەپتىڭ ادىلەتىن ۇستانعان تۇلعا – ايگۇل مىرزاعازىقىزى

ادام بالاسىنىڭ قوعامداعى ورنى تەك اتاقپەن نە داڭقپەن ەمەس، ادال ەڭبەگىمەن، مىنەز-قۇلقىمەن، ۇستانعان جولىمەن ولشەنبەك. «ەڭبەك ەتسەڭ ەرىنبەي، تويادى قارنىڭ تىلەنبەي» دەگەندى ومىرلىك قاعيدا ەتكەن جاندار بار. سولاردىڭ ءبىرى — «الاتاۋ» ءداستۇرلى ونەر تەاترىنىڭ قالىپتاسۋى مەن دامۋىنا ءۇنسىز بولسا دا ولشەۋسىز ۇلەس قوسقان، ەسەپ پەن ادىلەتتىڭ تارازىسىن تەڭ ۇستاعان بەكمۇحامەدوۆا ايگۇل مىرزاعازىقىزى.

ايگۇل مىرزاعازىقىزى 1967 جىلى قوستاناي وبلىسى، اۋليەكول اۋدانى، سەميوزيورنوە اۋىلىندا دۇنيەگە كەلىپ، جاس كۇنىنەن-اق بىلىمگە قۇشتارلىعىمەن كوزگە ءتۇستى. الماتى قالاسىنداعى جاۋتىكوۆ اتىنداعى رەسپۋبليكالىق فيزيكا-ماتەماتيكا مەكتەبىن ءتامامداۋى — ونىڭ تالاپ پەن تارتىپكە ەرتە بوي ۇيرەتكەنىن اڭعارتسا كەرەك. كەيىن قازاق مەملەكەتتىك باسقارۋ اكادەمياسىندا جوعارى ءبىلىم الىپ، ەكونوميست ماماندىعىن يەلەنۋى — ءومىر جولىن سانالى تۇردە تاڭداعانىنىڭ دالەلى.

بۋحگالتەرلىك ەسەپ — كوزگە كورىنبەيتىن، بىراق مەملەكەتتىڭ دە، مەكەمەنىڭ دە تىرەگى. ايگۇل مىرزاعازىقىزى وسى سالادا 1988 جىلدان بەرى تابان اۋدارماي قىزمەت ەتىپ كەلەدى. مەملەكەتتىك تە، كوممەرتسيالىق تا ۇيىمداردا شىڭدالىپ، 2002 جىلدان باستاپ الماتى قالاسى مادەنيەت باسقارماسىنا قاراستى مەكەمەلەردە باس بۋحگالتەر قىزمەتىن ابىرويمەن اتقاردى. ال 2016 جىلدان بەرى «الاتاۋ» ءداستۇرلى ونەر تەاترىندا باس بۋحگالتەر، ەسەپ پەن جوسپارلاۋ ءبولىمىنىڭ جەتەكشىسى رەتىندە ەڭبەك ەتىپ كەلەدى.

تەاتر — رۋحتىڭ ورداسى. ال سول رۋحاني وردانىڭ قارجىلىق ءتارتىبى مەن تۇراقتىلىعى — ەسەپشىنىڭ ادىلدىگى مەن تياناقتىلىعىنا بايلانىستى. ايگۇل مىرزاعازىقىزى ءوز ىسىندە دالدىك پەن جاۋاپكەرشىلىكتى سەرىك ەتىپ، كاسىبي بىلىكتىلىگىن ۇنەمى جەتىلدىرىپ وتىردى. سالىق، بۋحگالتەرلىك ەسەپ، مسفو، مەملەكەتتىك جانە ەلەكتروندىق ساتىپ الۋلار سالاسىنداعى ءبىلىمىن تەرەڭدەتىپ، كاسىبي بۋحگالتەر سەرتيفيكاتىنا يە بولۋى — سونىڭ ايعاعى.

اباي ايتقان «اقىل، قايرات، جۇرەكتى بىردەي ۇستا» دەگەن ولشەم بار. ايگۇل مىرزاعازىقىزىنىڭ بولمىسى وسى ءۇش قاسيەتتىڭ ۇيلەسىمىن تانىتادى: اقىلى — ەسەپتە، قايراتى — ەڭبەكتە، جۇرەگى — ادالدىقتا. ۇجىم اراسىندا بەدەلدى، ىسىنە مىعىم، سوزىنە بەرىك، ۇجدانىن بيىك ۇستاپ، قىزمەتىن تازا اتقارعان مامان رەتىندە تانىلعان.

وتباسى — ادامعا بەرىلگەن امانات. ول — جارى، ءتورت بالانىڭ اناسى. قىزمەت پەن وتباسىنى تەڭ ۇستاۋ — ەكىنىڭ بىرىنە بۇيىرا بەرمەيتىن قاسيەت.

2026 جىلى «الاتاۋ» ءداستۇرلى ونەر تەاترىنا 10 جىل تولعالى وتىر. وسى ون جىلعا جۋىق ۋاقىت ىشىندە تەاتردىڭ قارجىلىق نەگىزىنىڭ بەرىك قالانۋىنا، ەسەپ-قيسابىنىڭ ءادىل جۇرگىزىلۋىنە ۇلەس قوسقان ايگۇل مىرزاعازىقىزى — ەڭبەگىمەن ەلگە سىيلى، قىزمەتىمەن قۇرمەتتى تۇلعا. مۇنداي جاندار جاي عانا قىزمەتكەر ەمەس، مەكەمەنىڭ ىشكى تىرەگى، تىنىش ەڭبەكتىڭ يەسى.

سۋرەت: «الاتاۋ» ءداستۇرلى ونەر تەاترىنان الىندى.

ساحناعا ادال، ونەرگە جاۋاپتى تۇلعا – ءناسىپجان بەيبىتۇلى

ونەر — ويىن-كۇلكى ءۇشىن عانا ەمەس، ەلدىڭ رۋحىن تاربيەلەيتىن، سانانى سەرگەك ۇستايتىن قاسيەتتى جول. سول جولدا ماڭداي تەرىن اياماي، ءسوزدىڭ سالماعىن، ساحنانىڭ جاۋاپكەرشىلىگىن تەرەڭ سەزىنىپ قىزمەت ەتكەن ازاماتتار بولادى. «الاتاۋ» ءداستۇرلى ونەر تەاترىنىڭ ون جىلدىق تاريحىندا سونداي تۇلعالاردىڭ ءبىرى — باسشىباي ءناسىپجان بەيبىتۇلى.

ءناسىپجان بەيبىتۇلى 1979 جىلى الماتى وبلىسى، بالقاش اۋدانى، بالاتوپار اۋىلىندا دۇنيەگە كەلدى. جاستايىنان ونەرگە جاقىن بولىپ، ءسوز قادىرىن، ساحنا مادەنيەتىن ەرتە تانىدى. الماتى قالاسىنداعى ت. جۇرگەنوۆ اتىنداعى قازاق مەملەكەتتىك ونەر اكادەمياسىندا «ءسوز سويلەۋ» جانرىنىڭ اكتەرى ماماندىعىن مەڭگەرۋى — ونىڭ ونەر جولىن سانالى تۇردە تاڭداعانىن كورسەتەدى. بۇل — تىلگە عانا ەمەس، ويعا، مىنەزگە، ادام بولمىسىنا جاۋاپ بەرەتىن كۇردەلى سالا.

ەڭبەك جولىن الماتى قالاسىنىڭ مەملەكەتتىك قۋىرشاق تەاترىنان باستاعان ول، كەيىن تەلەراديو كەڭىستىگىندە دە وزىندىك قولتاڭباسىن قالدىردى. «حابار»، «شاحار»، «الماتى» تەلەارنالارى مەن قازاق راديوسىنداعى جۇرگىزۋشىلىك، دۋبلياج سالاسىنداعى قىزمەتى — ونىڭ سوزگە ۇقىپتى، تىڭدارمانعا جاۋاپتى ونەر يەسى ەكەنىن تانىتتى. قازاقكونتسەرت ساحناسىندا ۇزاق جىلدار بويى جۇرگىزۋشى بولۋى — كاسىبي سەنىمنىڭ بەلگىسى.

2017 جىلدان باستاپ ءناسىپجان بەيبىتۇلى «الاتاۋ» ءداستۇرلى ونەر تەاترىنىڭ اكتەرلىك قۇرامىنا قابىلدانىپ، تەاتردىڭ شىعارماشىلىق تىنىسىن قالىپتاستىرۋعا بەلسەنە ارالاستى. ول سومداعان قۇنانباي، مۇقاعالي، كوتىبار، شىعايباي سىندى بەينەلەر — جاي ءرول ەمەس، تاريح پەن حالىق جادىنداعى تۇلعالاردىڭ كوركەم بەينەسى ەدى. ءار كەيىپكەر ارقىلى ول كورەرمەنگە وي تاستاپ، ءسوزدىڭ سالماعىن سەزىندىرە ءبىلدى.

ونەر جولى — تەك تالانتتىڭ عانا ەمەس، مىنەز بەن جاۋاپكەرشىلىكتىڭ تارازىسى. ءال-فارابي «ادامعا ەڭ اۋەلى تاربيە بەرىلۋى كەرەك، تاربيەسىز بەرىلگەن ءبىلىم — ادامزاتتىڭ قاس جاۋى» دەپ ەسكەرتكەن. ءناسىپجان بەيبىتۇلى ءۇشىن ساحنا — جاي عانا ونەر كورسەتەتىن ورىن ەمەس، ادامدى تاربيەلەيتىن رۋحاني مەكتەپ. ال تەاتر — سول تاربيەنىڭ ورداسى.

ول اكتەر رەتىندە ءار رولگە جان ءبىتىرىپ قانا قويماي، ساحنا ادەبىن، ءسوز مادەنيەتىن، كورەرمەن الدىنداعى جاۋاپكەرشىلىكتى تەرەڭ سەزىنە ءبىلدى. سوندىقتان دا ونىڭ شىعارماشىلىق جولى بىرتە-بىرتە ۇجىمنىڭ ورتاق مۇددەسىنە قىزمەت ەتۋ دەڭگەيىنە ۇلاستى. ءناسىپجان بەيبىتۇلى تەاتردىڭ ىشكى تىنىسىن، اكتەرلىك قۇرامنىڭ الەۋەتىن، كوركەمدىك باعىتتىڭ ماڭىزىن جاقسى تۇسىنەتىن ازامات رەتىندە تانىلدى.

وسى سەنىمنىڭ ناتيجەسىندە ول «الاتاۋ» ءداستۇرلى ونەر تەاترىندا الدىمەن كوركەمدىك جەتەكشى، كەيىن ديرەكتوردىڭ شىعارماشىلىق ماسەلەلەرى جونىندەگى ورىنباسارى قىزمەتىنە تاعايىندالدى. بۇل — ونىڭ ونەرگە ادالدىعى مەن ادامدىق جاۋاپكەرشىلىگىنىڭ زاڭدى جالعاسى ەدى.

بۇل — كەزدەيسوق كوتەرىلگەن مانساپ ەمەس، جىلدار بويعى ەڭبەكتىڭ، سەنىم مەن تاجىريبەنىڭ جەمىسى. تەاتردىڭ يدەيالىق باعىتىنا، رەپەرتۋارلىق ساپاسىنا، اكتەرلىك قۇرامنىڭ شىعارماشىلىق وسۋىنە ىقپال ەتىپ جۇرگەن ءناسىپجان بەيبىتۇلى بۇگىنگى كۇنى «الاتاۋ» تەاترىنىڭ تىرەك تۇلعالارىنىڭ ءبىرى.

2026 جىلى ون جىلدىق بەلەسىن اتاپ وتكەلى وتىرعان «الاتاۋ» ءداستۇرلى ونەر تەاترى ءۇشىن ءناسىپجان بەيبىتۇلى — وسى شاڭىراقتا ون جىلعا جۋىق ۋاقىت بويى تاباندىلىقپەن ەڭبەك ەتىپ، ساحنادان باسشىلىق دەڭگەيىنە دەيىن وسكەن، ونەرگە ادال، جاۋاپكەرشىلىكتى ازامات. مۇنداي جاندار تەاتر تاريحىندا ءاردايىم قۇرمەتپەن اتالماق.

ونەرگە قىزمەت ەتۋ — وزىڭە ەمەس، ەلگە قىزمەت ەتۋ. ال ەل ءۇشىن ەتكەن ەڭبەك — ەشقاشان ەلەۋسىز قالمايدى.

Abai.kz