قاڭتار ايىندا 139 مىڭ وقۋشى ۇلتتىق بىرىڭعاي تەستىلەۋدەن وتكەن. ولاردىڭ 76%-ى سىناقتى قازاق تىلىندە تاپسىرۋدى تاڭداعان. وسىنداي دەرەكتەردى تىلگە تيەك ەتكەن تەلەجۇرگىزۋشى ەرقانات كوپجاسار اتا زاڭنىڭ جاڭا جوباسىنداعى قازاق تىلىنە قاتىستى باپقا وزگەرتۋ ەنگىزۋدى تالاپ ەتىپ جۇرگەندەرگە ءۇن قاتتى، دەپ حابارلايدى BAQ.KZ ءتىلشىسى.

«بۇل قۇرعاق ستاتيستيكا ەمەس. بۇل ۇلتتىق رەنەسسانس، «كوش جۇرە تۇزەلەدى» دەگەن ۇعىمنىڭ جارقىن كورىنىسى. 1997 جىلى ەل استاناسى الماتىدان اقمولاعا كوشىرىلگەندە، ون ادامنىڭ بىرەۋى دە قازاقشا بىلمەيتىن ەدى. قازىر الاش دالاسى انا تىلىندە ەركىن سويلەيدى»، - دەيدى ول.

سونداي-اق تەلەجۇرگىزۋشى كونستيتۋتسيانىڭ جاڭا جوباسىنداعى 9 باپتىڭ 1 تارماعىندا «قازاقستان رەسپۋبليكاسىنىڭ مەملەكەتتىك ءتىلى – قازاق ءتىلى» دەپ تايعا تاڭبا باسقانداي جازىلىپ تۇرعانىن ايتادى.

«وسىنى ءتىلىمىز كونستيتۋتسيادان ايىرىلىپ قالعانداي شۋلاتۋ قاجەت دۇنيە ەمەس. قازىر الەمدە بارلىق گەوساياسي ويىنداردىڭ شارتتارى قايتا جازىلىپ جاتقانىن جاقسى بىلەسىزدەر. بۇگىنگى كەلىسۋ – ەرتەڭ ۇلكەن كەلىسپەۋشىلىككە اپارسا، نە بولماق»، - دەيدى ول.

سونىمەن قاتار، قوعامدا ءوزى انا تىلىندە سويلەمەيتىن، بالالارىن وزگە تىلدە وقىتىپ جۇرگەندەردىڭ كوپتىگىن تىلگە تيەك ەتتى.

«وسىنداي انا ءتىلىن بىلمەيتىن ازاماتتارعا اتا زاڭداعى ءبىر عانا ءسوز كەدەرگى بولىپ تۇر دەگەنگە سەنۋ قيىن. ۇرپاعىمىزعا ءوزى تۇراتىن جەر كەرەك، ءوز تىلىندە سويلەيتىن ەل كەرەك»، - دەدى كوپجاسار.

Abai.kz