قازاقستاندا يمپورتتىق اۋىل شارۋاشىلىعى ونىمدەرىن الماستىرۋ ءۇشىن 200-دەن استام جوبا ىسكە قوسىلادى.

پرەزيدەنتتىڭ ەكونوميكالىق ءوسىمنىڭ جاڭا مودەلىنە كوشۋ جونىندەگى تاپسىرمالارى شەڭبەرىندە ۇكىمەت ىشكى نارىقتى وتاندىق تاۋارلارمەن تولىق قامتۋعا نازار اۋدارىپ وتىر. ۇكىمەت وتىرىسىندا «تەرەڭ قايتا وڭدەۋ» جوبالارىن ىرىكتەۋ تەتىكتەرى تۋرالى «بايتەرەك» حولدينگىنىڭ باسقارما توراعاسى رۋستام قاراعويشين باياندادى.

ونىڭ ايتۋىنشا، دامۋ ينستيتۋتتارى رەسۋرستاردى 15-20 نەگىزگى يندۋستريالىق الپاۋىتتاردى ىسكە قوسۋعا جۇمىلدىرماق، ال شاعىن بيزنەستى قولداۋ 7 ملرد تەڭگەگە دەيىنگى مەملەكەتتىك كەپىلدىكپەن ەكىنشى دەڭگەيدەگى بانكتەرگە وتەدى. بۇل مەملەكەتكە مەتاللۋرگيا، حيميا جانە اوك يمپورتتارىن الماستىرا الاتىن زاۋىتتار جوباسىن تەزىرەك قارجىلاندىرۋعا مۇمكىندىك بەرەدى.

سونداي-اق ازىق-تۇلىك قاۋىپسىزدىگىن قامتاماسىز ەتۋ شەڭبەرىندە اۋىل شارۋاشىلىعى شيكىزاتىن تەرەڭ وڭدەۋگە باستى نازار اۋدارىلۋدا.

سالالىق مينيسترلىكپەن بىرلەسىپ ەت كومبيناتتارى مەن ءسۇت زاۋىتتارىنان باستاپ تەرى مەن ءجۇندى قايتا وڭدەۋ تسەحتارىنا دەيىن 2,3 ترلن تەڭگە سوماسىنا 208 جوبا ىرىكتەلدى. يندۋستريالىق بلوك بويىنشا مەتاللۋرگيادا 3,9 ترلن تەڭگەگە 23 جوبا جونىندەگى جۇمىستار جالعاسۋدا، ونىڭ ىشىندە كالتسيلەنگەن جانە كاۋستيكالىق سودا شىعارۋدى قوسا العانداعى، حيميا ونەركاسىبىن دامىتۋ جوبالارى بار.

«قازىرگى ۋاقىتتا 3,4 ترلن تەڭگە سوماسىنا 449 ينۆەستيتسيالىق جوبانىڭ تىزبەسى قالىپتاستىرىلدى. نەگىزگى باسىمدىق – قوسىلعان قۇنى جوعارى ءونىمدى شىعارۋعا كوشۋ. اتاپ ايتقاندا، قازاقستان دامۋ بانكى شيكىزاتتىق ەمەس ەكسپورتتى قولداۋعا 2 ترلن تەڭگە باعىتتايدى، ال اگرارلىق نەسيە كورپوراتسياسى مەن قازاگروقارجى تاماق ونەركاسىبى جوبالارىن 1 ترلن تەڭگەگە قارجىلاندىرۋدى قامتاماسىز ەتەدى»، — دەدى رۋستام قاراعويشين.

Abai.kz