وپەك+ قۇرامىنا كىرەتىن سەگىز ەل 5 ساۋىردەگى كەزدەسۋدە مامىر ايىنان باستاپ مۇناي ءوندىرۋ كۆوتاسىن تاۋلىگىنە 206 مىڭ باررەلگە ارتتىرۋعا ۋاعدالاستى. دەگەنمەن، Reuters اگەنتتىگىنىڭ حابارلاۋىنشا، بۇل شەشىم نەگىزىنەن فورمالدى سيپاتقا يە جانە ازىرگە نارىققا جەتكىزىلىمنىڭ ايتارلىقتاي وسۋىنە اكەلمەيدى.

بۇعان باستى سەبەپ — تاياۋ شىعىستاعى قاقتىعىس سالدارىنان ورمۋز بۇعازى ارقىلى ءوتۋ مۇمكىندىگىنىڭ شەكتەلۋى. الەمدىك مۇنايدىڭ ەداۋىر بولىگى وسى باعىت ارقىلى تاسىمالدانادى، ال كەمە قاتىناسىنداعى ىركىلىستەر ەكسپورتتى تەجەپ وتىر.

وسى جاعدايدا كۆوتالاردىڭ ۇلعايۋى نارىقتان شىعىپ قالعان كولەمنىڭ 2%-دان ازىن عانا جابادى. بۇل ماردىمسىز ءوسىم نەگىزىنەن قاعاز جۇزىندە قالا بەرمەك، ويتكەنى وپەك-ءتىڭ نەگىزگى مۇشەلەرى بۇعازدىڭ جابىلۋىنا بايلانىستى ءوندىرىستى ءىس جۇزىندە ارتتىرا المايدى. بۇل شەشىمدى نارىققا بەرىلگەن بەلگى دەپ اتاۋعا بولادى: ەلدەر ورمۋز بۇعازى تولىق اشىلىپ، لوگيستيكا قالپىنا كەلگەن بويدا ءوندىرىستى ۇلعايتۋعا دايىن.

ەنەرگەتيكالىق ينفراقۇرىلىمنىڭ زاقىمدانۋى دا قوسىمشا فاكتور بولىپ وتىر. پارسى شىعاناعى ەلدەرىندەگى مۇناي سالاسىنىڭ نىساندارى زىمىران سوققىلارى مەن درون شابۋىلدارىنان زارداپ شەكتى. ساراپشىلاردىڭ باعالاۋىنشا، سوعىس اياقتالعاننان كەيىن دە قۋاتتاردى قالپىنا كەلتىرىپ، بۇرىنعى ءوندىرىس كولەمىنە ورالۋ ءۇشىن ايلار قاجەت بولۋى مۇمكىن.

ءوندىرىستى ارتتىرۋدا كەلىسىمنىڭ باسقا قاتىسۋشىلارىندا دا قيىندىقتار بار. سونىڭ ىشىندە، رەسەي سانكتسيالارعا جانە بۇۇ (بپلا) شابۋىلدارى كەزىندەگى ينفراقۇرىلىمنىڭ زاقىمدانۋىنا بايلانىستى شەكتەۋلەرگە تاپ بولۋدا.

بۇعان قوسا، وپەك+ مونيتورينگى جونىندەگى بىرلەسكەن مينيسترلىك كوميتەتى ەنەرگەتيكالىق نىساندارعا جاسالعان شابۋىلدارعا الاڭداۋشىلىق ءبىلدىردى. ۇيىم قالپىنا كەلتىرۋ جۇمىستارى ۇلكەن شىعىندار مەن ۋاقىتتى تالاپ ەتەتىنىن، بۇل جەتكىزىلىم كولەمىنە تىكەلەي اسەر ەتەتىنىن اتاپ ءوتتى.

سوعىس سالدارىنان مۇناي باعاسى وتە قۇبىلمالى بولىپ تۇر. بۇل الەمدىك ەكونوميكاعا قىسىمدى كۇشەيتىپ، جانارماي باعاسىنىڭ وسۋىنە اكەلۋدە.

ناۋرىز ايىنىڭ سوڭىندا يران ورمۋز بۇعازى ارقىلى ءوتۋ شەكتەۋلەرىن ءىشىنارا جەڭىلدەتىپ، بىرقاتار ەلدەرگە، سونىڭ ىشىندە رەسەي، قىتاي، ءۇندىستان، يراك جانە پاكىستانعا كەمە قاتىناسىنا رۇقسات بەردى. الايدا، جەتكىزىلىمدى تولىققاندى قالپىنا كەلتىرۋ ماسەلەسى ءالى دە كۇماندى.

Abai.kz