سارسەنبى, 18 قاراشا 2026
جاڭالىقتار 74 0 پىكىر 18 قاراشا, 2026 ساعات 15:37

قازاقستان قورعانىس زاۋىتىن ساتىلىمعا قويدى

سۋرەت: sauda.e-qazyna.kz سايتىنان الىندى.

«قازاقستان ينجينيرينگ» ۇلتتىق كومپانياسى «سەمەي ينجينيرينگ» اق-نىڭ 100% اكتسياسىن ساتىلىمعا شىعاردى. تانكتەردى جوندەپ، جاڭعىرتۋمەن اينالىساتىن زاۋىتپەن بىرگە ساتىپ الۋشىعا 339 بىرلىك ەسكى بروندى تەحنيكا، سونىڭ ىشىندە 177 ت-72 تانكى بەرىلەدى.

لوت ماتەريالدارىنا سايكەس، زاۋىت 70,8 ملرد تەڭگەگە باعالانعان. بۇل سومانىڭ تورتتەن ءۇش بولىگىنە جۋىعى، ياعني 52,8 ملرد تەڭگەسى تەحنيكاعا تيەسىلى. ولاردىڭ قاتارىندا تانكتەردەن بولەك 104 جاياۋ اسكەردىڭ جاۋىنگەرلىك ماشيناسى (بمپ-1), 35 برونەترانسپورتەر (بتر-70) جانە 23 بروندى بارلاۋ-شولعىنشى ماشيناسى (بردم-2) بار.

تەحنيكا زاۋىتقا سوناۋ 2013 جىلى بەرىلگەن. سودان بەرى قاراجات بولماعاندىقتان بىردە-ءبىر رەت جوندەۋ جۇرگىزىلمەگەن. ماشينالار سوڭعى رەت 2017–2018 جىلدارى تەك كوزبەن شولىپ تەكسەرىلگەن، اقاۋلارىن انىقتاۋ ءۇشىن تولىق دياگنوستيكا جاسالماعان. دەمەك، ساتىپ الۋشى ناقتى جاعدايى ەشكىمگە بەلگىسىز بروندى تەحنيكانىڭ ۇلكەن قويماسىنا يە بولادى.

زاۋىت 2025 جىلدى 105 ملن تەڭگە شىعىنمەن جاپتى. رەسەيدەن كەلەتىن قوسالقى بولشەكتەر قىمباتتاپ كەتكەن، ماسەلەن كەيبىر قوزعالتقىشتاردىڭ باعاسى 18 ملن-نان 54 ملن تەڭگەگە دەيىن، ياعني ءۇش ەسەگە وسكەن. بۇعان قوسا، قورعانىس مينيسترلىگى جوندەۋگە كەلىسىمشارتتا كورسەتىلگەننەن الدەقايدا ناشار كۇيدەگى تەحنيكانى ءجيى جىبەرەدى. بۇرىن زاۋىت بۇل شىعىنداردى ءوز ەسەبىنەن جاۋىپ كەلسە، ەندى تاپسىرىس بەرۋشىمەن سوتتاسۋدى ويلاستىرىپ وتىر. «سەمەي ينجينيرينگ» وڭىردەگى تانكتەر مەن وزگە دە بروندى تەحنيكانى تولىق جوندەپ، جاڭعىرتا الاتىن جالعىز كاسىپورىن بولىپ قالا بەرۋدە.

جاڭا يەسى ءبىر جىل ىشىندە اكتسيالاردى قايتا ساتا المايدى جانە زاۋىتتىڭ قورعانىس باعىتىن ساقتاۋعا مىندەتتى بولادى. سونداي-اق وعان جالاقى مەن سالىق بويىنشا بەرەشەكتەردى وتەۋگە تۋرا كەلەدى. زاۋىت جىلىنا 53 ەمەس، 100 بىرلىك تەحنيكا جوندەۋى ءۇشىن ونى جاڭعىرتۋعا تاعى شامامەن 1,5 ملرد تەڭگە ينۆەستيتسيا سالۋ قاجەت.

ەسكە سالايىق، قاراشا ايىنىڭ باسىندا «قازاقستان ينجينيرينگ» پەتروپاۆلداعى كيروۆ اتىنداعى زاۋىتتى 9,1 ملرد تەڭگەگە ساۋداعا شىعارعان بولاتىن. ونىڭ ءتۇسىمىنىڭ 80%-عا جۋىعىن اسكەري تاپسىرىستار مەن قوس ماقساتتاعى ونىمدەر قۇرايدى. ودان دا ەرتەرەك پەتروپاۆل اۋىر ماشينا جاساۋ زاۋىتى ساتىلىمعا قويىلعان ەدى. ونىڭ بۇرىنعى باس ديرەكتورى 2024 جىلى قورعانىس مينيسترلىگىنە ارنالعان «توچكا-ۋ» زىمىران كەشەندەرىن جوندەۋ ءىسى بويىنشا پارا العانى ءۇشىن 11 جىلعا باس بوستاندىعىنان ايىرىلعان.

Abai.kz

0 پىكىر