الاش ارداگەرلەرىنىڭ ارمانىن ارقالاعان ازامات ەدى
بولاتحان اعامەن بىرگە بولعان سول ءبىر كۇندەر، سول ءبىر كەزدەر ءالى ەسىمدە...
بۇل كىسى جونىندە ەڭ العاش رەت بەلگىلى جازۋشى سماعۇل ەلۋبايدان ەستىگەن ەدىم. سمەكەڭمەن پراگاداعى «ازاتتىق» راديوسىندا بىرگە قىزمەت ىستەگەن ۋاقىتىمىز. جۇمىس اراسىندا ول كىسى ەكەۋىمىز قازاقتىڭ نەبىر مىقتىلارى مەن نار قاسقالارىن ءسوز ەتەمىز. ءبىر جولى سمەكەڭ بولاتحان اعا تۋرالى ءسوز قوزعاي وتىرىپ، ماسكەۋ بيلىگى كەزىندە ونىڭ مۇرات اۋەزوۆپەن بىرلەسىپ ماسكەۋ قالاسىندا قازاق جاستارىنىڭ «جاس تۇلپار» دەگەن ۇيىمىن قۇرعانىن، كەڭەستىك قازاقستانداعى قازاقتان شىققان العاشقى ديپلوماتتاردىڭ ءبىرى بولا تۇرا ۇلت مۇددەسى ءۇشىن كۇرەسكەن ناعىز كۇرەسكەر ازامات بولعانىن مايىن تامىزا ماقتاپ، تانىستىردى. سول ساتتەن باستاپ بولاتحان اعامەن قالاي كەزدەسسەم، قالاي جۇزدەسىپ، اڭگىمەلەسسەم ەكەن دەپ اڭسارىم اۋعانى شىندىق.
قازاقستاننىڭ مىسىر ەلىندەگى توتەنشە ءارى وكىلەتتى ەلشىسى قىزمەتىندەگى بولاتحان تايجاننىڭ (سۋرەتتە) كايردەگى جۇمىس تەلەفونىن تاۋىپ الىپ، 1998 جىلعى كوكتەم ايىندا پراگادان حابارلاستىم.
شەتەلدە تۋىپ وسكەن قازاقتىڭ ءبىرى ەكەنىمدى ايتقانىمدا، بوكەڭ بىردەن: «سەنىڭ تۋىپ وسكەن ەلىڭ موڭعوليانىڭ مىسىرداعى ەلشىسى قادىر سايران دەگەن قازاق ازاماتى وسىندا، سەن ونى تانيسىڭ با؟»، - دەپ وزىمە سۇراق قويدى.
بولاتحان اعامەن بىرگە بولعان سول ءبىر كۇندەر، سول ءبىر كەزدەر ءالى ەسىمدە...
بۇل كىسى جونىندە ەڭ العاش رەت بەلگىلى جازۋشى سماعۇل ەلۋبايدان ەستىگەن ەدىم. سمەكەڭمەن پراگاداعى «ازاتتىق» راديوسىندا بىرگە قىزمەت ىستەگەن ۋاقىتىمىز. جۇمىس اراسىندا ول كىسى ەكەۋىمىز قازاقتىڭ نەبىر مىقتىلارى مەن نار قاسقالارىن ءسوز ەتەمىز. ءبىر جولى سمەكەڭ بولاتحان اعا تۋرالى ءسوز قوزعاي وتىرىپ، ماسكەۋ بيلىگى كەزىندە ونىڭ مۇرات اۋەزوۆپەن بىرلەسىپ ماسكەۋ قالاسىندا قازاق جاستارىنىڭ «جاس تۇلپار» دەگەن ۇيىمىن قۇرعانىن، كەڭەستىك قازاقستانداعى قازاقتان شىققان العاشقى ديپلوماتتاردىڭ ءبىرى بولا تۇرا ۇلت مۇددەسى ءۇشىن كۇرەسكەن ناعىز كۇرەسكەر ازامات بولعانىن مايىن تامىزا ماقتاپ، تانىستىردى. سول ساتتەن باستاپ بولاتحان اعامەن قالاي كەزدەسسەم، قالاي جۇزدەسىپ، اڭگىمەلەسسەم ەكەن دەپ اڭسارىم اۋعانى شىندىق.
قازاقستاننىڭ مىسىر ەلىندەگى توتەنشە ءارى وكىلەتتى ەلشىسى قىزمەتىندەگى بولاتحان تايجاننىڭ (سۋرەتتە) كايردەگى جۇمىس تەلەفونىن تاۋىپ الىپ، 1998 جىلعى كوكتەم ايىندا پراگادان حابارلاستىم.
شەتەلدە تۋىپ وسكەن قازاقتىڭ ءبىرى ەكەنىمدى ايتقانىمدا، بوكەڭ بىردەن: «سەنىڭ تۋىپ وسكەن ەلىڭ موڭعوليانىڭ مىسىرداعى ەلشىسى قادىر سايران دەگەن قازاق ازاماتى وسىندا، سەن ونى تانيسىڭ با؟»، - دەپ وزىمە سۇراق قويدى.
مەن ەلشى ق.سايران جانە ونىڭ ايەلى عيبادەتپەن ورتا مەكتەپتەگى سىنىپتا بىرگە وقىعانىمدى، تەلەفون ءنومىرىن سولاردان العانىمدى جاسىرماي ايتتىم جانە «ازاتتىق» راديوسىنا حالىقارالىق ساياسي تاقىرىپتارعا بايلانىستى ارا تۇرا بولسا دا پىكىر ءبىلدىرىپ تۇرۋىن سۇرادىم.
بوكەڭ ديپلوماتيالىق جۇمىسىنا قاراماستان «ازاتتىققا» تەك حالىقارالىق ساياسي تاقىرىپتار عانا ەمەس، سونداي-اق، قازاق ۇلتىنىڭ جاعدايى، ءتىلى، ءدىنى تاعى باسقاداي ۇلتتىق ماسەلەلەر توڭىرەگىندە ۇنەمى بولماسا دا كەيدە پىكىر ءبىلدىرىپ تۋرۋعا ۋادە بەردى. بوكەڭدەي ادامدى تاۋىپ العانىمىزعا بىزدە قۋانىپ جۇردىك. الايدا كوپ ۇزاماي، بولاتحان اعانىڭ ديپلوماتيالىق قىزمەتى باسقا ەلگە، مالايزياعا ەلشى بولىپ اۋىسۋىنا بايلانىستى ءبىر-ەكى جىلداي اراداعى بايلانىسىمىز ءۇزىلىپ قالدى.
«ازاتتىق» راديوسىنىڭ پراگاداعى ورتالىعىندا 7 جىلداي قىزمەت ىستەپ، 2002 جىلدىڭ كوكتەمىندە وسى حالىقارالىق راديونىڭ قازاقستان بويىنشا ءتىلشىسى بولىپ ەلگە جاڭادان ورالعان كەزىم. الماتىعا كەلىسىمەن بىردەن مۇرات اۋەزوۆ اعانى ىزدەپ تاۋىپ الدىم. ول كىسى «سوروس-قازاقستان» قورىن باسقاراتىن. مۇرات اعادان قازاقستان قوعامىندا بولىپ جاتقان دەموكراتيالىق وزگەرىستەر جايىندا كولەمدى سۇحبات الىپ، سونى ەفيرگە دايىنداپ جۇرگەن كۇندەردىڭ بىرىندە، ول الماتىداعى بيۋرومىزعا تەلەفون شالىپ، بولاتحان تايجان اعانىڭ ەلگە ورالعاندىعىن، سول كىسىمەن دە ءبىر جاقسى سۇحبات وتكىزسەڭدەر قايتەدى دەگەن تىلەگى بارلىعىن جەتكىزدى جانە ول كىسىنىڭ تەلەفون ءنومىرىن بەردى.
تەلەفونمەن سويلەسكەن كۇننىڭ ەرتەڭىندە بيۋروعا بولاتحان اعا كەلدى. راديو جۇمىسىنىڭ قىزىپ تۇرعانىنا قاراماستان ارا-تۇرا ءازىل ايتقاندى جاقسى كورەتىن بولاتحان اعامەن ەسكى تانىستارداي سىرلاسىپ، 3 ساعاتقا جۋىق اڭگىمەلەسكەن ەدىك. اڭگىمە اراسىندا وزىنە سىرتقى ىستەر مينيسترلىگىنىڭ باسشىلارى تاراپىنان «ەلگە قايت» دەگەن شاقىرۋ بويىنشا كەلگەنىن جەتكىزدى. «قانشا ارابتانۋشى ديپلومات مامان بولسام دا تاياۋ شىعىس ەلدەرىندە ەلشىلىك قىزمەتتە ۇزاق جىلدارى وتىردىم، بۇل دەنساۋلىعىما ءبىراز اسەر ەتكەندەي، سوندىقتان باسشىلاردان ەۋروپا ەلدەرىنىڭ بىرىنە جىبەرۋىن ءوتىنىش ەتكەن جايىم بار، بالكىم سولاي قاراي جىبەرگەلى وتىر ما، ول جاعى دا ازىرگە بەلگىسىز»، - دەگەندى ايتتى. كوپ ۇزاماي بولاتحان اعا «وتان» پارتياسى توراعاسىنىڭ مىندەتىن اتقارۋشى امانكەلدى ەرمەگياەۆكە كەڭەسشىسى قىزمەتىنە باردى.
وسىدان باستاپ بولاتحان اعامەن جاقىنىراق سويلەسىپ، ول كىسىنىڭ اعالىق اقىل كەڭەسىن تىڭداي ءجۇرىپ، كەيدە شىن دوستارشا ارالاسىپ، قازاق قوعامىنداعى كۇرمەۋى كەلمەي جاتقان سان ءتۇرلى ماسەلەلەر بويىنشا ەركىن پىكىرلەسەتىن بولدىق. بوكەڭ اعامىزدى «ازاتتىق» رادياسىنىڭ حابارلارىنا بۇرىنعىدان دا كوبىرەك تارتا باستادىق. ۇلت ماسەلەسى بولسىن، ەكونوميكا تاقىرىبىندا بولسىن، حالىقارالىق ساياسي تاقىرىپتا بولسىن قازاقشا ەركىن سويلەي الاتىن جانە وسىعان بايلانىستى وي پىكىرىن ەشكىمنەن جاسقانباي اشىق ايتا الاتىن ونداي ادامدى تاۋىپ الۋ سول جىلدارى وڭاي ءىس ەمەس ەدى. شەتەلدە تالاي جىلدارى ەلشىلىك قىزمەتتە ءجۇرىپ، كوپ نارسەنى كورىپ، كوپتى ويىنا تۇيگەن، سول ارقىلى وزىندىك جەكە پىكىرىن قالىپتاستىرا بىلگەن بولاتحان اعا ءبىز ءۇشىن تاپتىرماس ادام بولدى جانە ءوزى دە كاسىبي ديپلومات، شىڭدالعان ساياساتكەر رەتىندە وسىنداي بيىكتەن، ۇلكەن تالاپتان كورىنە الدى.
بىردە بولاتحان اعادان پرەزيدەنتتىڭ «وتان» پارتياسىندا كەڭەسشىلىك قىزمەت ىستەيسىز، كەيدە بيلىكپەن قاتار ونىڭ قىزمەتىن دە سىنايسىز، بۇل بولا ما دەگەن سۇراعىما «ونى مەن ايتپاسام باسقا بىرەۋ ايتۋى كەرەك، ازىرشە ونداي ادامدى كورمەي تۇرمىن»،- دەۋشى ەدى مارقۇم ازىلدەپ. بوكەڭ، سوڭعى جىلدارى ەلدەگى وپپوزيتسيالىق باعىتتاعى ساياسي پارتيالاردىڭ جەتەكشىلەرىمەن جانە ۇلتشىل-پاتريوتشىل باعىتتاعى قوزعالىس، ۇيىمداردىڭ باسشىلارىمەن تىعىز قارىم-قاتىناستا بولدى. كەيدە ولاردىڭ دا جۇمىستارىنا كوڭىلى تولمايتىندىعىن اشىق ايتۋشى ەدى.
«ازاتتىق» راديوسىنىڭ تىلشىلەرى بولاتحان اعانىڭ پىكىرلەرىن كۇن سايىنعى حابارلارىنا قوسۋدى جيىلەتتى. ءبىز اعانى قايدا جۇرسە دە قول تەلەفونى ارقىلى تاۋىپ الاتىنبىز. بىردە بوكەڭە قاتىستى «ازاتتىق» راديوسى قازاق قىزمەتىنىڭ سول كەزدەگى باسشىلارى ماعان اۋىزشا ەسكەرتۋ جاساپ: «قازاقستاندا بولاتحان تايجان مەن دوس كوشىمنەن باسقا «ازاتتىق» راديوسىنا ءجوندى پىكىر ايتاتىن ادام جوق پا؟ حابارلارىڭىزعا ول كىسىلەردىڭ پىكىرىن قوسۋدى وسىدان بىلاي ازايتىڭىز» - دەگەن ەسكەرتۋدى بىرنەشە رەت ايتتى. بىراقتا مەن ءوز تاراپىمنان بوكەڭنىڭ پىكىرلەرىن قوسۋدى توقتاتپادىم.
«ازاتتىق» راديوسى قازاقستانداعى دەموكراتيانىڭ دامۋى، ءسوز بوستاندىعى جانە ادام قۇقىعىنىڭ قورعالۋى، نارىق ەكونوميكاسى جاعدايى ماسەلەلەرىن كوتەرىپ، سول جونىندە حابارلاۋدى باستى ماقساتى ەتكەن بولسا، وندا وسى ماسەلەلەر توڭىرەگىندە بوكەڭداي ادامنىڭ پىكىرلەر ىمەن ونىڭ ويلارىنىڭ قاجەت ەكەندىگىن راديو باسشىلارى دا، راديو تىڭداۋشى قاۋىم دا جاقسى بىلەتىن.
بىردە بوكەڭ كەرەك بولىپ، ىزدەسەم ول كىسى:
- مالايزيادا ءجۇرمىن، نەعىلاسىڭدار اقشالارىڭ كوپ كەتىپ قالادى، ەلگە بارعان سوڭ جاقسىلاپ ايتىپ بەرەيىن، - دەدى.
- اقشانى تولەيتىن مۇحيتتىڭ ارعى جاعىنداعى الپاۋىت ەلدىڭ باسشىلارى سىزدەي كىسىدەن قاي جەردە جۇرسە دە سۇحبات الىڭدار دەپ تاپسىرما بەرىپتى، - دەمەسىم بار ما، وعان بوكەڭ اعا بالاشا قۋانىپ قالدى دا الىس ەلدەن دەرەۋ سۇحبات بەردى. بىردە تاعى دا بوكەڭدى ىزدەپ تاپپاعان سوڭ، ايسۇلۋ جەڭگەيمەن حابارلاستىم. سويتسەم بوكەڭ لوندوندا وتەتىن ءبىر حالىقارالىق كونفەرەنتسياعا قاتىسۋ ءۇشىن سولاي ۇشىپ كەتكەنىن ايتىپ، اعاڭدى سول جاقتان ىزدەيسىڭ دەدى. مەن دە ايسۇلۋ جەڭگەمە ازىلدەپ:
- اعامىز سوڭعى كەزدە كوپ شاپقىلاپ كەتتى، ءسويتىپ جالعىز ءوزىن جىبەرە بەرەسىز بە دەسەم ايسۇلۋ جەڭگەم:
-بوكەڭ سەكىلدى حالقى ءۇشىن تۋعان ەر ازاماتتىڭ ۇيدە وتىرعانى جاراسپايدى، ونىڭ ەل ىشىندە، ەل سىرتىندا كوبىرەك جۇرگەنى جاراسادى، -دەپ ايتقانى اسىل جارىنىڭ بوكەڭە بەرگەن ناعىز باعاسى ەدى. سول كۇندەرى لوندوندا باستالعان «قازاقستانداعى شەتەل ينۆەستيتسياسىنىڭ بۇگىنگى جاعدايى جانە الداعى بولاشاعى» اتتى حالىقارالىق كونفەرەنتسيا قوناعى ب.تايجان اعانى قول تەلەفونى ارقىلى ىزدەي باستادىم. ءبىراز ۋاقىت ءۇنسىز بولعان تەلەفونعا جان ءبىتىپ، ار جاقتان اقىرىن داۋىسپەن بوكەڭنىڭ «بۇل كىم» دەمەسى بار ما؟ مەن كونفەرەنتسياعا قاتىستى ءبىراز سۇراقتارىم بار ەدى دەيمىن. بوكەڭ ءسال ويلانىپ تۇرىپ، الماتىدا قازىر ساعات قانشا دەدى؟ مەن ويىمدا ەشنارسە جوق ساعات تاڭەرتەڭگى 10-نان باياعىدا اسىپ كەتكەنىن ايتتىم. بوكەڭ بولسا لوندون حالقىنىڭ ءالى ءتاتتى ۇيقى قۇشاعىندا ەكەنىن، شاماسى 2-3 ساعاتتان كەيىن قايتا حابارلاسساڭ قايتەدى دەگەن ءوتىنىشىن سىپايى تۇردە ءبىلدىردى.
جۇمىس قاربالاسىمەن ءجۇرىپ الماتى مەن لوندون اراسىندا 6 ساعاتتىڭ ايىرماشىلىعى بارىن ۇمىتىپپىن. قازاقستان ەكونوميكاسى جانە ەلدەگى ينۆەستيتسيالىق حال-احۋالعا قاتىستى باتىستىڭ ەكونوميستەرى مەن بىلىكتى ساراپشىلارى قاتىسقان لوندون كونفەرەنتسياسى جايىنداعى اقپاراتى مول، جەدەل حابارىما راديو باسشىلىعى جاقسى باعا بەردى. شىنىمدى ايتسام، بۇل حاباردىڭ جاقسى شىعۋىنا لوندوندا جۇرگەن بوكەڭنىڭ ۇلكەن ۇلەسى بولعانىن ايتۋىم كەرەك.
كەيبىر وزدەرىن «ساياساتكەرمىز» دەيتىندەر مەن بيلىكتەگى شەنەۋنىكتەر «ازاتتىق» دەگەن اتتى ەستىگەندە شوشىپ، قالايدا ءبىر پىكىر ايتۋدان جالتارىپ، قاشقاقتاپ جۇرگەن سول جىلدارى «ازاتتىققا» تايسالماي كەز كەلگەن ۋاقىتتا، قانداي دا تاقىرىپ بولسىن ەركىن پىكىر بەرۋشىلەر قاتارىندا وسى بوكەڭ اعامىز بولدى.
بوكەڭ اعامەن بىرنەشە رەت شەتەلگە - قىرعىزستان، موڭعوليا جانە قىتاي ەلدەرىنە بىرگە ساپارلاس بولعانىم بار. 2002 جىلى كۇزدە قىرعىزستاندا ورتا ازيا حالىقتارىنىڭ مادەني قايراتكەرلەرىنىڭ «ىستىق-كول فورۋمى» وتكەندە، سوعان بىرگە بارىپ قاتىستىق. بوكەڭ فورۋم قوناقتارى اراسىندا قازاق تىلىنەن باسقا شەتەلدىڭ ءۇش تىلىندە: ورىس، اعىلشىن جانە اراب تىلدەرىندە ەركىن سويلەيتىندىگىمەن جانە ورتا ازيا حالىقتارىنىڭ تاريحى مەن مادەنيەتى ماسەلەسىندە كوپ بىلەتىن ساراپشى رەتىندە تانىلدى. قايتىپ 2003 جىلى كوكتەمدە م.اۋەزوۆ باسقاراتىن «سوروس-قازاقستان» قورى مەن «وتان» پارتياسى بىرلەسىپ موڭعولياداعى قانداستارمىزعا ارناپ، سوندا ءوتىپ جاتقان حالىقارالىق كىتاپ جارمەڭكەسىنە تارتۋ رەتىندە «الاتاۋدان التايعا دەيىن» دەگەن اتپەن 5 مىڭعا جۋىق قازاق تىلىندەگى ادەبي كىتاپتار مەن قازاق ءانىنىڭ التىن قورىنان الىنعان نەشە جۇزدەگەن دىبىس-كەسكىن تاسپالارى بار كوشپەندى كىتاپحانا كەرۋەنىن جەتكىزگەن كەزدە موڭعولياعا بىرگە باردىق.
سول جولى بولاتحان اعانىڭ ءوتىنىشى بويىنشا باي-ولكەدەن ۇلانباتىرعا بىرگە ۇشىپ، ۇلانباتىردان ارىقاراي ماشينامەن ارحانگاي، وۆورحانگاي ايماقتارى جەرىنە بارىپ، سونداعى ءبىر كەزدە موڭعول يمپەرياسىنىڭ استاناسى بولعان قاراقورىم قالاسىنىڭ ورنىنا جانە سول جەردەن الىس ەمەس (45 كم) جەردەگى تۇرىك قاعاناتىنىڭ كوسەم باسشىلارى كۇلتەگىن، بىلگە حانننىڭ تاس جازۋلى ەسكەرتكىشتەرى باسىنا بارىپ زيارات ەتىپ قايتقان ەدىك. سول جولى بولاتحان اعا شىڭعىس حان يمپەرياسىنىڭ استاناسى بولعان قالا ورنىنان ءبىر دوربا توپىراقتى الماتىعا الىپ كەلگەن ەدى. توپىراقتى نە قىلاسىز دەپ سۇراعانىمدا، «الماتىدا تۇراتىن ۇلتى موڭعول-بۋرياد، ءوزى قاتتى ناۋقاس ءبىر جازۋشى دوسىم بار سونىڭ ءوتىنىشى بويىنشا اكەلە جاتىرمىن» -دەدى. كەيىن ەستىسەم ءتىرى كەزىندە موڭعولياعا بارۋعا تالاي رەت قامدانسا دا ءبىر جولى بولماعان سول دوسى، ءبىر كەزدەرى اتا باباسى جورتقان نەشە مىڭ شاقىرىم جەردەن الماتىعا توپىراق الىپ كەلگەن بوكەڭە قاتتى ريزا بولىپ، و دۇنيەگە اتتانىپتى. مىنە، دوسقا دەگەن دوستىڭ قىزمەتى وسىنداي بولسا كەرەك.
سوڭعى جولى 2006 جىلى قىستا بولاتحان اعامەن بىرگە قىتايدىڭ قۇلجا، ءۇرىمشى قالالارىنا بىرگە باردىق. ءبىزدى ارنايى شاقىرعان ىلە پەداگوگيكالىق ۋنيۆەرسيتەتىنىڭ وقىتۋشى، پروفەسسورلارى مەن ستۋدەنتتەرى الدىندا قازاقستان-قىتاي قارىم-قاتىناسى تاقىرىبىندا ءدارىس وقىدىق، ۇرىمشىدە ورتالىق ازيا زەرتتەۋ ورتالىعىنىڭ ساراپشى ماماندارىمەن بىرلەسكەن دوڭگەلەك ءۇستول جيىنىن وتكىزدىك. سول جولى بولاتحان اعاعا ىلە پەداگوگيكا ۋنيۆەرسيتەتەتىنىڭ قۇرمەتتى پروفەسسورى دەگەن اتاق ديپلومىمەن قوسا بەرىلگەن بولاتىن.
بوكەڭ اعا شەتەلدە جۇرگەن قازاقتار جايىنا اسا ماڭىز بەرىپ، ولار تۇگەلدەي اتاجۇرتقا كەلۋلەرى كەرەك دەگەندى ۇنەمى ايتاتىن. مىسىردا ەلشى بولىپ تۇرعان كەزىندە، يوردانيادا تۇراتىن ونشاقتى ءۇي قازاقتارعا قالاي كومەك جاردەم كەرسەتكەنى، موڭعولياداعى قازاقتارعا رۋحاني قولداۋ كومەكتىڭ قاجەت ەكەندىگىن دەر كەزىندە ءتۇسىنىپ، «وتان» پارتياسى باسشىلىعىنا بۇل ماسەلەنى جەتكىلىكتى تۇسىندىرگەنى ءۇشىن باي-ولكەگە كوشپەندى كىتاپحانانى اپارعاندىعى جونىندە بوكەڭنىڭ ءوزىنىڭ قاتىسۋىمەن «ازاتتىق» راديوسىنىڭ «شەتەل قازاقتارى» باعدارلاماسىنان ارنايى حابارلار بەرىلدى. سونداي-اق، قىتايداعى قازاقتاردىڭ اتاجۇرتقا كەلۋى ماسەلەسىندە كوپتەگەن قيىندىقتار ورىن الىپ وتىرعاندىعىن، ونى شەشۋ جولدارىن قازاقستاننىڭ سىرتقى ىستەر مينيسترلىگىنە ادەيى تانىستىرعانىن قازاق ءباسپاسوزى بەتتەرىندە جانە راديو، تەلەارنالاردان تالاي رەت ايتتى.
بوكەڭ بۇگىنگى تاۋەلسىز قازاقستاندا الاش كوسەمدەرى ارمان ەتكەن قازاق ماسەلەسىنىڭ تولىق شەشىلىپ، شەتەلدە تارىداي شاشىراپ جۇرگەن ءيسى قازاقتىڭ ءبىر شاڭىراق استىنا جينالىپ، ۇلت مۇددەسىنىڭ كوسەگەسى كوگەرگەنىن كورسەم دەيتىن. تاعدىردىڭ ىسىنە امال قانشا، ۇلت پاتريوتى، ساياساتكەر بولاتحان تايجان بۇگىندە ارامىزدا جوق. مارقۇمنىڭ جاتقان جەرى جانناتتا بولسىن!
دوسان بايمولدا،
عىلىم دوكتورى، ساياساتتانۋشى
