بۇگىن ايماقتىق كوممۋنيكاتسيالار قىزمەتىندە وبلىس پروكۋرورىنىڭ ورىنباسارى مۇرات الىبەكوۆتىڭ قاتىسۋىمەن ەلباسىنىڭ «100 ناقتى قادام» ۇلت جوسپارىن جۇزەگە اسىرۋ بويىنشا ءباسپاسوز ءماسليحاتى ءوتتى.

وندا ول سوت پروتسەستەرىن جەڭىلدەتۋ جانە سوت پروتسەسىن جىلدامداتۋ ماقساتىندا پروكۋروردىڭ ازاماتتىق-قۇقىقتىق داۋلى ماسەلەلەر بويىنشا سوتقا قاتىسۋىن قىسقارتۋدىڭ تيىمدىلىگىن اتاپ ءوتتى. ماسەلەن، وسى جىلى جاڭا ازاماتتىق-پروتسەستىك كودەكستىڭ قابىلدانۋىنا بايلانىستى، پروكۋروردىڭ قاتىسۋى مىندەتتى بولىپ تابىلاتىن ىستەردىڭ مولشەرى 23%-عا ازايعان.

سونىمەن قاتار، سپيكەر ۇلت جوسپارىنىڭ 32-ءشى قادامىندا ايتىلعان «قىلمىستىق قۇقىق بۇزۋشىلىقتار كارتاسى» ەلىمىز بويىنشا العاشقىلاردىڭ ءبىرى بولىپ وڭتۇستىك قازاقستان وبلىسىندا جۇزەگە اسىرىلىپ وتىرعانىن جەتكىزدى.

«اتالعان كارتاعا وبلىستاعى بارلىق قىلمىستىق قۇقىق بۇزۋشىلىقتار تىركەلەتىن بولادى. بۇل ءوز كەزەگىندە قوعامعا ىشكى ىستەر ورگاندارى جۇمىسىنىڭ تيىمدىلىگىن باقىلاۋعا مۇمكىندىك بەرەدى. كارتاعا قول جەتىمدىلىك كەز – كەلگەن ازامات ءۇشىن قامتاماسىز ەتىلەدى. سوتقا دەيىنگى تەرگەپ-تەكسەرۋ بىرىڭعاي تىزىلىمىندە تىركەلگەن قىلمىستىق قۇقىق بۇزۋشىلىقتار تۋرالى مالىمەتتەر پورتالدىڭ نەگىزگى اقپاراتتىق كوزى بولادى»،-دەدى مۇرات الىبەكوۆ.

ونىڭ حابارلاۋىنشا، بۇگىندە ەلەكتروندىق كارتانى قۇرۋ ءۇشىن وبلىستان 88 ملن.تەڭگە مولشەرىندە قاراجات بولىنگەن. اتالمىش ەلەكتروندى كارتا قازان ايىندا ىسكە قوسىلادى دەپ كۇتىلۋدە.

ءباسپاسوز ءماسليحاتىندا بايانداماشى وتىز بەسىنشى قادامدا ايتىلعان اۋىل شارۋاشىلىق ماقساتىنداعى جەرلەردى ءتيىمدى پايدالانۋ جانە باسقا ماقساتتا پايدالانىلاتىن جەر ايماقتارىن مەملەكەتتىك مەنشىككە قايتارۋدى قامتاماسىز ەتۋ بويىنشا اتقارىلعان جۇمىستارعا توقتالدى.

وبلىستىڭ پروكۋراتۋراسى اتالمىش سالادا ءبىرشاما جۇمىس اتقارعان. ماسەلەن، پروكۋراتۋراعا كەلىپ تۇسكەن تالاپ ارىزدار بويىنشا تەك سوڭعى 2 جىل ىشىندە مەملەكەتكە جالپى قۇنى 1,3 ملرد.تەڭگەنى قۇرايتىن 42 مىڭ. گا جەر قايتارىلعان.

Abai.kz