قازاقستان ۇلتتىق ارناسى باسشىلىعىنان كەمەلبەك ويشىباەۆتىڭ كەتكەنىنە دە بىرقانشا ۋاقىت ءوتتى.

كەمەلبەكتىڭ كەلۋىنەن كەتۋى تەز بولدى. قازاقستان تەلەارناسىنىڭ ون توعىزىنشى تىزگىنشىسى تىندىرعان شارۋا مىناۋ دەيتىندەي بولمادى. سەبەبى، وعان بەرىلگەن مەرزىم تىم قىسقا ەدى.

ءوزى الەۋمەتتىك جەلى ارقىلى، وقۋ-عىلىمعا بەت بۇرماقپىن دەگەنىمەن، بىزدەگى توپتىق تالاس-تارتىستار ويشىباەۆتىڭ ويىسۋىنا سەبەپ بولدى دەيتىندەر كوپ. مۇمكىن، ارينە. نە دەسەك تە ويشىباەۆتىڭ ورىنتاعى ون كۇننەن بەرى بوس. ول ورىنتاققا  قۇلشىنىپ وتىرعاندار دا كوپ سەكىلدى.

بەيرەسمي دەرەكتەرگە سۇيەنسەك، قۇلشىنىپ وتىرعانداردىڭ ءبىرى - ەكس-باسشى نۇرجان مۇحامەدجانوۆا كورىنەدى.

نۇرجان جالاۋقىزىنىڭ باسشىلىق ەتكەن تۇسىن كورپوراتسياعا سەگىز جىل تىزگىنشى بولعان حاميت حاسەنوۆپەن سالىستىرۋعا كەلمەس. ول كەزدە تەلەۆيزيا ءتۇرلى-ءتۇستى حابار تاراتۋعا كوشتى. 17 وبلىستىڭ ءوز راديوسى بولدى. 15 تەلەۆيزيالىق ستۋديا جۇمىس ىستەپ جاتتى. كەمەلبەكپەن سالىستىرعاندا نۇرجان جالاۋقىزى باقانداي 5 جىلدان استام باسشىلىق جاسادى. ول كىسىنىڭ ەڭبەگىن جوققا شىعارۋدان اۋلاقپىز. ءدال نۇرجان حانىمنىڭ تۇسىندا ارنا 100 پايىز مەملەكەتتىك تىلدە قىزمەت كورسەتۋگە كوشتى. دەگەنمەن، ول كىسىنىڭ جۇمىسىنا جۇرت باعاسىن بەرىپ قويعانى دا راس. 

بۇل جاققا بارۋعا باستى ۇمىتكەرلەر – ءلاززات تانىسباي مەن دارحان مىڭباي دەيدى جۇرت. حوش، بۇلار دا جۇرتقا ءمالىم. شاما-شارقىن كورگەنبىز. ءبىزدىڭ پايىمىمىزعا سىيمايتىنى – تەلەۆيزيا سالاسىنىڭ وتىمەن كىرىپ، كۇلىمەن شىعىپ جۇرگەن قانشاما ازاماتتار بار ەمەس پە؟.. وسى سالانىڭ وزىق ماماندارى قورا-قوپسىنىڭ ماڭايىندا جۇرە بەرۋى كەرەك پە؟ مودەرنيستەر نەگە جوق؟ ەلدىڭ ەڭ ءبىرىنشى اقپاراتتىق يدەولوگياسىن جاسايتىن شەبەرحانانىڭ جاڭا باسشىسى ەتىپ، قايتادان ەسكى كادرلاردى تاعايىنداي ما؟

ايتا كەتەيىك، ءسال ەرتەرەكتە عانا ەلگە ورالعان مارات ءتاجيننىڭ رف-داعى ەلشىلىك كرەسلوسى دا بوساپ تۇرعانىنا ءبىراز ۋاقىت ءوتتى.  ول تۋرالى ىلگەرىدە جازعانبىز. بولجام بىرەۋ: يا بىزدە ءتاجيندى الماستىراتىن ادام جوق. يا بولماسا – رەسەي ءبىزدىڭ كانديتاتتاردى قابىلداماي جاتىر.

بۇدان بولەك، قازاقستاننىڭ تۇركياداعى توتەنشە جانە وكىلەتتى ەلشىسى بولعان جانسەيىت تۇيمەباەۆتىڭ دا ەلشىلىكتەگى ورىنى قاڭىراپ تۇر. تۇيمەباەۆتىڭ وڭتۇستىككە اكىم بولعانىنا دا جىل جاقىنداپ كەلە جاتىر. ءبىزدىڭ تۇركيادا ەلشىمىز جوق.

ءبىرىنشى كەزەكتە ساياسي ءام سالالىق كادر تاپشىلىعى باستالعانىن اڭعارتسا كەرەك. سونىمەن ويشىباەۆتىڭ ورنىنا كىم لايىق؟ بۇل تاقىرىپ توڭىرەگىندە جۋرناليستيكا سالاسىنىڭ ماماندارى "Abai.kz" پورتالىنا پىكىر ءبىلدىردى.

تىزگىندى كىم-كورىنگەنگە ۇستاتا سالۋعا بولمايدى

قۋاندىق شاماحايۇلى، قر مادەنيەت قايراتكەرى، حالىقارالىق جۋرناليست:

- قازاقستان" ترك توراعاسى جۋىقتا عانا ءوز ەركىمەن قىزمەتىنەن كەتكەن سوڭ، ونىڭ ورنىنا ءازىر ەشكىم تاعايىندالا قويعان جوق. ارينە، بۇل سالانى باسقارۋعا مىقتى باسشى مەنەدجەر تابىلماي وتىر دەي المايمىز. دەگەنمەن مۇنداي ءىرى كورپوراتسيانىڭ تىزگىنىن كىم قالاسا سوعان ۇستاتىپ جىبەرۋگە بولمايتىنى بارىمىزگە ءمالىم. ەلىمىزدەگى قازاق تىلىندە حابار تاراتاتىن جالعىز تەلەارنامەن قاتار وبلىستارداعى تەلەكومپانيالار دا اتالمىش كورپوراتسياعا قارايتىنىن ەسكەرسەك، ۇلتتىق وي مەن يدەيانىڭ مۇنداي ءىرى وشاعىن جۋرناليستيكا سالاسىندا ابدەن ىسىلعان، ساياسات پەن ەكونوميكا سالاسىن جىلىكشە شاعاتىن، حالىق اراسىندا بەدەلى زور تانىمال تۇلعا باسقارعانى ابزال.

ءوز باسىم وسى سالانى عىلىمي تۇرعىدان ءبىراز جىل زەرتتەپ جۇرگەن مامان رەتىندە ايتارىم: كورپوراتسيا توراعالىعىنا لايىق ەكى تۇلعانى ەرەكشە اتاپ ايتار ەدىم. ونىڭ ءبىرى - دارحان قامزابەكۇلى مىڭباي، ەكىنشىسى - بيبىگۇل نۇرعاليقىزى جەكسەنباي. بۇدان بۇرىن باسقارعان جۋرناليست ماماندار بولدى، ەندى، ولاردى قايتا اكەلىپ قويىپ شيىرلاي بەرۋدىڭ قاجەتى شامالى شىعار. مەن اتاعان ەكى تۇلعا دا مەن ءۇشىن بەيتاراپ جاندار. مەن اتاعان وسى ەكى تۇلعانىڭ بازالىق ماماندىقتارى جۋرناليست ءارى ءبىزدىڭ سالادا وزدەرىنىڭ كوشباسشىلىق قابىلەتتەرىن مويىنداتقان ادامدار.

مۇنداي جاعدايدى كادر تاپشىلىعىمەن بايلانىستىرۋدىڭ ەش قيسىنى جوق. ماماندار بارشىلىق. ەلشى ماسەلەسىنە كەلسەك، ونداي ديپلوماتتاردى ءبىزدىڭ مەملەكەت ۇسىنعانىمەن كەلەسى جاق باتا بەرمەگەن سوڭ ۇمىتكەر وتپەي قالاتىن تۇستارى دا بولادى. تاقتىڭ بوس تۇرۋى وعان يە تابىلماۋدان ەمەس، سوعان بارعىسى كەلەتىن ىزدەنۋشىلەر مەن ۇمىتكەرلەردىڭ تىم كوپتىگى، تالاستىڭ قارقىندىلىعىنان بولۋى دا ىقتيمال. "قازاقستان" تەلەراديو كورپوراتسياسىن قازىرگىدەي كەزدە ەڭ سەنىمدى اقپارات كوزىنە اينالدىرۋ بارىنەن دە ماڭىزدى. ونداعى باعدارلامالاردىڭ سالماعى اۋىر، كوتەرەتىن ماسەلەلەرى ساليقالى بولۋعا ءتيىس. جەڭىل-جەلپى كوڭىل كوتەرۋ باعدارلامالاردى كوممەرتسيالىق ارنالاردىڭ ەنشىسىنە قالدىرىپ، "قازاقستان" ۇلتتىق ارناسى ساياسي-ەكونوميكالىق وزەكتى ماسەلەردى قاۋزايتىن ءىرى نىسان اينالۋى ءۇشىن تەرەڭ بىلىكتىلىك كەرەك.

بيلىككە تاۋەلدى بولعان ارنانىڭ تاۋەلسىز اقپارات تاراتۋى ەكىتالاي 

ەسەنگۇل كاپقىزى، تاۋەلسىز جۋرناليست:

- كەمەلبەك كەلدى دە كەتتى. ونىڭ بۇل قادامىن باعلان مايلىباەۆپەن بايلانىستىرىپ جاتقاندار بار. بالكىم سولاي دا شىعار. ول جاعى ءبىز ءۇشىن بۇلىڭعىر. بىراق مەنىڭ ويىمشا، كەمەلبەكتىڭ ورنىن الماستىراتىن كەمەل باسشى نەمەسە قارىمدى جۋرناليست جوق دەسەك، قاتەلەسەمىز.

وسى تەلەۆيزيانىڭ اينالاسىندا جۇرگەن، ونىڭ وتىمەن كىرىپ، كۇلىمەن شىققان، بۇل سالانى بەس ساۋساعىنداي بىلەتىن جاندار، شۇكىر، جەتەرلىك. بىراق، جۇرتتىڭ جۇرەگى مەملەكەتتىك قىزمەتتەن شايلىعىپ قالعان سىندى. ويتكەنى، جەمقورلىقپەن اتى شىعىپ، ءىستى بولىپ جاتقاندار تىم كوبەيىپ بارادى. ءارى سول تۇتقىنداۋلاردىڭ ارتىندا ءبىر بەلگىسىز كلاندىق سوعىس ءجۇرىپ جاتقان سىندى سەزىلەدى. شىعارىلعان ۇكىمدەر دە تۇسىنىكسىز. مىسالى، سەيىتقازى ماتاەۆ پەن بيگەلدى عابدۋلليننىڭ ىسىنە پاراللەل جۇرگىزىپ كورىڭىزشى. جاساعان ىسىنە وكىنىپ، كەشىرىم سۇراعان ادام سوت زالىنان بوساپ شىعادى دا، ءوزى ىسىنەن بەلگىلى ساياسي استاردىڭ بار ەكەنىن ايتقان ءارى ءوز كىناسىن مويىنداماعان ادام التى جىلعا سوتتالادى.

سول ءۇشىن دە بەلگىلى ءبىر مەملەكەتتىك لاۋازىمنىڭ قۇلاعىنان ۇستاۋعا جۇرت جۇرەكسىنىپ وتىر.

بۇل ورىنعا لايىقتى مىقتى مەنەدجەرلەر، تەلەارنانىڭ قازانىندا بۇلكىلدەپ قايناعان ماماندار جەتەدى. كىم باسقارسا دا، ادال جۋرناليستىك پرينتسيپتەرگە لايىق ادام باسقارۋى كەرەك

قازاقستان ۇلتتىق تەلەارناسى 24 ساعات قازاق تىلىندە اقپارات تاراتاتىن بىردەن-ءبىر ارنا. وكىنىشكە قاراي، بۇل ارنادا جەڭىل-جەلپى ءازىل-وسپاق پەن كوڭىل-كوتەرەرلىك باعدارلامالارمەن، تۇرىك پەن ءۇندىنىڭ ارزان تەلەحيكايالارىنان كوز اشپايتىن ارنانىڭ بىرىنە اينالدى. ارينە، كەيبىر كورەرمەننىڭ كوزايىمىنا اينالعان "دارا جول", "ايتۋعا وڭاي", سەكىلدى توك-شوۋلار مەن "كەلبەت", "جانساراي" دەگەن باعدارلامالار بار.

"اپتا" اقپاراتتىق-ساراپتامالىق باعدارلاماسى جاڭارتىلىپ، كوپتەگەن ماسەلەلەردى كوتەرۋگە بەل بايلاپ جاتىر ەكەن. دەسە دە، بيلىككە تاۋەلدى بولعان ارنانىڭ تاۋەلسىز اقپارات تاراتۋى ەكىتالاي.

ول بيلىكتىڭ سويىلىن سوعۋدى توقتاتىپ، ءومىردىڭ شىنايى بەت پەردەسىن بەرمەسە، ودان كورەرمەنگە كەلەر پايدا جوق

نۇرگەلدى ابدىعانيۇلى

Abai.kz