.png)
مەملەكەتتىك ايىپتاۋشى داداەۆقا ومىرلىك تۇرمە جازاسىن سۇرادى
ماسكەۋ اسكەري سوتىندا مەملەكەتتىك ايىپتاۋشى شەشەنستان ءىىم "سەۆەر" باتالونىنىڭ بۇرىنعى جاۋىنگەرى زاۋر داداەۆقا ومىرلىك تۇرمە جازاسىن سۇرادى. القا بيلەر سوتى ونى ساياساتكەر بوريس نەمتسوۆتىڭ ولىمىنە كىنالى دەپ شەشكەن.
"ينتەرفاكس" اگەنتتىگىنىڭ حابارلاۋىنشا، مەملەكەتتىك ايىپتاۋشى قالعان سوتتالۋشىلاردى 17 جىلدان 23 جىلعا باس بوستاندىعىنان ايىرۋدى سۇراعان. بۇعان قوسا، پروكۋرور سوتتالۋشىلاردىڭ ارقايسىنا 200 مىڭ رۋبل ايىپپۇل سالۋىن ءوتىندى. ادۆوكاتتار ولاردى اقتاپ شىعۋىن سۇرادى. داداەۆتىڭ قورعاۋشىسى القا بيلەر سوتىن تاراتىپ، پروتسەستى قايتا باستاۋىن ءوتىندى.
نەمتسوۆتىڭ تۋىستارى مەن جاقتاستارى ساياساتكەردىڭ ولىمىنە شەشەنستان پرەزيدەنتى رامزان قادىروۆتىڭ قاتىسى بار دەپ وتىر. بىراق ول تەرگەلگەن جوق.
بوريس نەمتسوۆتى 2015 جىلى 27 اقپاندا ماسكەۋدەگى ۇلكەن موسكۆورەتسك كوپىرىندە ءولتىرىپ كەتتى.
Abai.kz
