بۇلار ەندى "قازاقستاننىڭ ازاماتى" اتاناتىن بولدى.

Abai.kz اقپاراتتىق پورتالى وقىرمانداردان تاعى دا ءسۇيىنشى سۇرايدى. بۇعان دەيىن Abai.kz ارنايى ماقالا جازىپ, دابىل قاققان ماسەلە، ياعني قىتايدان ورالىپ، جامبىل وبلىستىق كوشى-قون پوليتسياسىنان ىقتيارحات العان 251 قانداستىڭ داۋلى ماسەلەسى شەشىمىن تاپقانىن جاريالاپ، ءسۇيىنشى سۇراپ ەدىك. جامبىل وبلىستىق كوشى-قون پوليتسياسى قازىر سول 251 قانداستىڭ تۇرمىستىق تۇيتكىلدى ماسەلەلەرىن شەشۋ ماقساتىندا قارقىندى جۇمىس جۇرگىزۋدە، - دەپ حابارلايدى اباي-اقپارات.

وسى اپتا باستالا سالىپ، ياعني دۇيسەنبى كۇنى 22-ءى، سەيسەنبى كۇنى 10 قانداسىمىزدىڭ قۇجاتى زاڭداستىرىلدى. بۇگىن جامبىل وبلىستىق كوشى-قون پوليتسياسىندا 19 قانداسىمىزدىڭ قۇجاتى قالىپقا كەلتىرىلىپ جاتىر. قۇداي قالاسا، ەرتەڭدەرى 51 قانداستىڭ بارلىق ماسەلەسى تولىعىمەن شەشىلەدى.

جەرگىلىكتى جەردىڭ زاڭىن بىلمەگەندىكتەن الاياق دەلدالدارعا جولىعىپ، سونىڭ سالدارىنان قازاقستاننان قۋىلىپ كەتە جازداعان باۋىرلارىمىزدىڭ قۋانىشىندا شەك جوق. ەگەر دە بيلىكتەگى ەلىم دەگەن ازاماتتار، قازىرگى جامبىل وبلىستىق كوشى-قون پوليتسياسىنداعى جۇرەگى وتانىم دەپ سوعاتىن قىزمەتكەرلەر، "نۇر-وتانداي" بەلسەندى پارتيا، جىلاعان انا مەن بالالاردىڭ كوز جاسىن جوعارىعا جەتكىزەر Abai.kz سەكىلدى اقپارات قۇرالى بولماعاندا 251 وتباسىنىڭ تاعدىرى كۇل-پارشا بولىپ كۇيرەر ەدى.

بۇل - اۋىزبەن ايتىپ، سوزبەن سۋرەتتەپ جەتكىزە المايتىن قۋانىش. وسى قۋانىشتى حابار جەتە سالا جامبىل وبلىستىق ءىىد كوشى-قون پوليتسياسى باسقارماسىنىڭ باستىعى، پوليتسيا پودپولكوۆنيگى ورال مۇستافاۇلى ۇدەرباەۆپەن تەلەفون ارقىلى تىلدەسكەن ەدىك.

ورال مۇستافاۇلى ۇدەرباەۆ، جامبىل وبلىستىق ءىىد كوشى-قون پوليتسياسى باسقارماسىنىڭ باستىعى، پوليتسيا پولكوۆنيگى:

- جامبىل وبلىستىق ءىىد كوشى-قون پوليتسياسى قازىر قاۋىرت جۇمىس جۇرگىزىپ، قانداستاردىڭ قۇجاتىن دۇرىستاپ بەرۋگە بارىن سالىپ جاتىر. دۇيسەنبى كۇنى 22 ادام قابىلداپ، ولاردىڭ بارلىق ماسەلەسىن شەشتىك. سەيسەنبى كۇنى 10 ادامنىڭ جۇمىسى تولىق اياقتالدى. بۇگىن 19 قانداستىڭ شارۋاسىن تەزىرەك ءبىتىرۋ ءۇشىن جانتالاسىپ جاتىرمىز. وسى ازاماتتاردىڭ ىشىندەگى 3 ازامات ازاماتتىعىن الدى. قۇدايعا شۇكىر، ءبارى رەت-رەتىمەن زاڭ شەڭبەرىندە ءوز ورنىنا كەلەدى. 

ەندى قالعان 197 ازاماتتىڭ قۇجاتىن جاساپ بەرۋ - ءبىزدىڭ باستى مىندەتىمىز. ولاردىڭ كەيبىرىنىڭ قايدا ەكەنىن بىلمەيمىز. وسى ماسەلەمەن شۇعىلدانىپ جۇرگەن بەلسەندى جىگىتتەر بولىپ، ءبىز بولىپ سول 197 ازاماتتىڭ ءبارىن تاۋىپ، قۇجاتتارىن زاڭداستىرىپ بەرسەك دەيمىز. 

جۇمىستى جەدەلدەتۋ ءۇشىن جامبىل وبلىستىق دەنساۋلىق ساقتاۋ باسقارماسىنا ارنايى حات جازىپ، قانداستاردى مەديتسينالىق ساراپتامادان تەزىرەك وتكىزۋدى سۇرادىم. سول سەكىلدى قولدان كەلگەنشە جان-جاققا حابارلاسىپ، وسى ازاماتتاردىڭ ازاماتتىق الۋىنا بار جاردەمىمىزدى اياپ جاتقان جوقپىز. الماتى قالالىق ءىىد كوشى-قون پوليتسياسى باسقارماسىنىڭ باستىعى ايدىن ەلەۋۇلى بەلگىباەۆقا،  الماتى وبلىستىق ءىىد كوشى-قون پوليتسياسى باسقارماسىنىڭ باستىعىنىڭ مىندەتىن اتقارۋشى قۋانىش قاناتۇلى كۇدەباەۆقا، استانا قالالىق ءىىد كوشى-قون پوليتسياسى باسقارماسىنىڭ باستىعى ەركەتاي مەيرامۇلى تۇتقىشەۆكە ارنايى حابارلاسىپ، بىزدەن قۇجاتتارىن تۋرالاعان ازاماتتاردىڭ جۇمىسىن توقتاتپاي، ارى جالعاپ ءبىتىرىپ بەرۋىن ءوتىندىم. 

اماندىق بولسا، ەندى از ۋاقىتتان كەيىن بارلىق ماسەلە تۇبەگەيلى شەشىلەدى. 

جامبىل وبلىستىق ءىىد كوشى-قون پوليتسياسى باسقارماسى باستىعىنىڭ ورىنباسارى رۋسلان ادىلعاپپارۇلى بەيىسوۆ بىزگە العاش 251 قانداستىڭ قۇجاتتارى زاڭداستىرىلاتىنىن مالىمدەگەن ەدى.

جامبىل وبلىستىق ءىىد كوشى-قون پوليتسياسىنىڭ قىزمەتكەرى بەكزات تۇياقبايۇلى دوسىباەۆ قانداستاردى قابىلداۋدا.

جامبىل وبلىستىق ءىىد كوشى-قون پوليتسياسىنىڭ قىزمەتكەرى اراي دانابەكقىزى ايىمبەك قانداستاردى قابىلداۋدا.

جامبىل وبلىستىق ءىىد كوشى-قون پوليتسياسى قىزمەتكەرلەرى قانداستارمەن قارقىندى جۇمىس جاساپ جاتىر

Abai.kz اقپاراتتىق پورتالىنىڭ تىلشىلەرى 251 قانداستىڭ ماسەلەسىمەن جامبىل وبلىستىق ءىىد كوشى-قون پوليتسياسى باسقارماسىنىڭ باستىعى، پوليتسيا پودپولكوۆنيگى ورال ۇدەرباەۆپەن كۇن سايىن حابارلاسىپ تۇر. بارلىق ماسەلەنىڭ وڭىنان شەشىلۋى ءۇشىن تەر توگىپ جاتقان ورال مۇستافاۇلىنا بۇكىل قازاق حالقى ريزا ەكەنىن ايتىپ، كولەمدى سۇحبات بەرۋىن سۇراعان ەدىك. بۇل جۇمىستى دۇرىستاپ شەشىپ بەرۋ جامبىل وبلىستىق ءىىد كوشى-قون پوليتسياسى باسقارماسىنىڭ ۇجىمىنا مىندەت بولىپ وتىرعانىن، وسى ابىرويلى ءىستى تولىعىمەن اتقارىپ شىعۋ بۇكىل ۇجىمدىق جۇمىس ەكەنىن، مەيىلىنشە ريزاشىلىق پەن العىس ايتۋ ۇجىمعا باعىتتالسا دەگەن نيەتىن ءبىلدىردى ول. وسىدان-اق، ورال مۇستافاۇلى باستاعان ۇجىمنىڭ ورايدى پايدالانىپ، ۇپاي جيناۋدان گورى ەلدىك ءىستى جوعارى قوياتىنىن بايقادىق.

جامبىل وبلىستىق ءىىد كوشى-قون پوليتسياسى باسقارماسىنا قۇجاتىن زاڭداستىرعان ءار قانداستىڭ كوزىنەن قۋانىشتىڭ جاسى تامادى. ولاردىڭ بۇگىندە قۇزىرەتتى ورگاندارعا دەگەن ىشكى ۇرەيلەرى سەيىلىپ، پوليتسيا قىزمەتكەرلەرىنە دەگەن كوزقاراستارى ءجۇز پايىزعا وزگەرگەن. ورال مۇستافاۇلىنا قازاقى جولمەن شاپان جاپقىلارى كەلەتىنىن ايتىپ، بىزگە ءوتىنىش جاساپ جاتىر.

تارازدان قايتقان قازاقتار

تارازدان قۋانىپ قايتقان قازاقتاردىڭ سەزىمىن جۇرتقا جەتكىزۋ ءۇشىن ءبىر-ەكى ۆيدەو-جازبانى نازارلارىڭىزعا ۇسىنۋدى ءجون ساناپ وتىرمىز.

ءتۇيىن

251 قانداس باۋىرىمىزدىڭ اتاجۇرتقا اڭساپ جەتكەندە كەزدەسكەن كۇردەلى جايتتاردىڭ وڭىنان شەشىلۋى - ء"ار قازاق مەنىڭ - جالعىزىم" دەگەن سانانىڭ ءوسىپ جەتىلگەنىن كورسەتەدى. 251 قانداس تاعدىرىنىڭ وڭىنان شەشىلۋى - قۇزىرەتتى ورگانداردىڭ حالىققا ءبىر تابان جاقىنداعانىن بىلدىرەدى. 251 قانداس تاعدىرىنىڭ وڭىنان شەشىلۋى - Abai.kz اقپاراتتىق پورتالىنىڭ حالىقتىق ماسەلەنى جەرىنە جەتكىزىپ كوتەرە الاتىنىن كەزەكتى رەت دالەلدەدى.

ازىرگە - وسى. بۇل ماسەلەنى ءالى دە ىندەتە جازاتىن بولامىز.

قانات بىرلىكۇلى

Abai.kz