ابسوليۋت جەكپە-جەك چەمپيوناتىنىڭ (UFC) جەڭىل سالماق دارەجەسى بويىنشا چەمپيونى رەسەيلىك حابيب نۋرماگومەدوۆ ەكى سالماق دارەجەسى بويىنشا ەكس-چەمپيون يرلانديالىق كونور ماكگرەگوردى جەڭدى.

ارالاس جەكپە-جەك جانكۇيەرلەرى اسىعا كۇتكەن كەزدەسۋ لاس-ۆەگاستاعى T-Mobile Arena-دا ءوتتى. بۇگىن تاڭ اتا تەلەديدارعا تەلمىرگەن كورەرمەن رەسەيلىك سپورتشىنىڭ جەڭىسىنە كۋا بولدى. تورتىنشى راۋندتا نۋرماگومەدوۆ قىلقىندىرۋ ءادىسىن قولدانىپ، ماكگرەگوردىڭ مىسىن باستى.

سپورت الەمىندەگى بيزنەس شوعىن ءبىر كىسىدەي ۇرلەپ جۇرگەن قوس مىقتى سەگىزبۇرىشتا كەزدەسىپ ءبىرى جەڭدى، ءبىرى جەڭىلدى. ەكەۋىنىڭ ەسەبى تۇگەل. الاتىن اقشاسىن الدى، جاسايتىن شوۋىن جاسادى. الا شاپقىن بولىپ ءالى ساباسىنا تۇسە الماي جاتقاندار الاڭ سىرتىنداعى جانكۇيەرلەر عانا. جانكۇيەر بولعاندا ءوز ەلىنىڭ، ءوز ۇلتىنىڭ ۇلاندارى ايقاسىپ جاتقان حالىق جايلى ەمەس، ايدالادا وتىرىپ بايبالام سالعان ءوزىمىزدىڭ قازاقتار جايلى ايتىپ وتىرمىز.

ارينە، اركىمنىڭ سپورتتىق ويىنداردى تاماشالاپ، ءوزى قالاعان سپورتشىعا جانكۇيەر بولۋعا قاقىسى بار. بىراق، قازاقستاندىقتاردىڭ رەسەي مەن وزگە ەلدىڭ وكىلى كۇش سىناسا قالسا بولدى مىندەتتى تۇردە سولتۇستىكتەگى كورشىمىزدىڭ سويىلىن سوعاتىنى قىزىق. بۇگىن قازاقتار ءۇشىن حابيبكە قولداۋ كورسەتۋگە سەبەپ جەتكىلىكتى بولىپتى. بىرەۋى الىستاعى يرلانديادان جاقىنداعى رەسەي جاقسى دەسە، ەندى ءبىرى ءحابيبتى "مۇسىلمان باۋىرىم" دەپ بىلەدى ەكەن. ءبىزدىڭ قازاق قىزىق، ءوزىنىڭ تۋىس-تۋعانىن تاني الماي ءجۇرىپ، بەرىسى كورشىسىن، ءارىسى بۇكىل مۇسىلمان جۇرتىن جارىلقاعىسى كەلەدى.

اتالعان جەكپە-جەكتى "Qazsport" تەلەارناسى تىكەلەي ەفيردە كورسەتتى. تىكەلەي كورسەتىلىم بارىسىندا ءسوز العان كوممەنتاتوردىڭ دا ءبىر بۇيرەگى حابيبكە بۇرىپ وتىردى. ماكگرەگورمەن سەگىزبۇرىشتا قازاقستاندىق سپورتشى كۇش سىناسىپ جاتىر ما دەرسىز. بۇل از دەسەڭىز، جەكپە-جەك اياقتالعان سوڭ اتالعان تەلەارنانىڭ Instagram جەلىسىندەگى رەسمي پاراقشاسىندا "كونوردىڭ دارمەنسىز قالعان ءساتى جانە سپورتقا ساي ەمەس ارەكەتتەرى" دەگەن اتپەن قىسقا ۆيدەو جاريالاندى. وسىدان-اق، ءبىزدىڭ تەلەارنانىڭ كىمگە جانكۇيەر بولعانى كورىنىپ تۇر.

بۇدان بولەك وقىرماندار الەۋمەتتىك جەلىدە "Qazsport" تەلەارناسىنىڭ رەسەيلىكتىڭ جەڭىسىمەن ارنايى قۇتتىقتاعانىن تالقىلاۋدا. ەگەر مىنا سۋرەت شىنىمەن وتاندىق تەلەارنانىڭ رەسمي پاراقشاسىندا جاريالانعان بولسا، وندا ولار رەسەيلىك سپورتشىنىڭ جەڭىسىمەن كىمدى قۇتتىقتاپ وتىر دەگەن سۇراق تۋادى. قازاقشا جازعانىنا قاراعاندا قازاقتارعا ارنالعان سەكىلدى. ەندەشە، رەسەيلىك سپورتشىنىڭ جەڭىسىمەن قازاقستاندىقتاردى قۇتتىقتاعانى قاي ساسقانى؟! بىراق، ءبىز تەلەارنانىڭ Instagram-داعى پاراقشاسىنان بۇل سۋرەتتى تابا المادىق. بالكىم، وقىرمانداردىڭ قارسىلىعىنان كەيىن الىپ تاستاعان بولۋى مۇمكىن.

بىراق، ءبىز بۇنداي جاعدايعا ءبىرىنشى رەت كەزدەسىپ وتىرعان جوقپىز. وتاندىق جالعىز سپورتتىق ارنانىڭ رەسەيلىك سپورتشىلار مەن رەسەيلىك كوماندالارعا وزگە شەتەلمەن سالىستىرعاندا باسىمدىلىق بەرەتىنىن بۇرىننان بايقاپ ءجۇرمىز.

ماسەلەن، بيىل كوكتەمدە (15 ناۋرىز) فۋتبولدان ەۋروپا ليگاسىنىڭ 1/8 فينالى اياسىنداعى قارىمتا كەزدەسۋلەردى كورسەتۋ بارىسىندا ۇلكەن داۋ تۋعان ەدى. ەۋروپا ليگاسىنىڭ ەرەجەسىنە ساي، بۇل كەزەڭدەگى 8 ماتچتىڭ بارلىعى ءبىر كۇندە وتەدى. ال "Qazsport" تەلەارناسى سول كۇنى ءۇش بىردەي ماتچتى تىكەلەي ەفيردە كورسەتتى. ءبىر قىزىعى، ۇشەۋى دە رەسەيلىك كوماندالاردىڭ قاتىسۋىمەن وتەتىن ويىندار. ءدال سول كۇنى انگليانىڭ، يتاليانىڭ، گەرمانيانىڭ الپاۋىت كوماندالارى وينايتىنىنا قاراماستان، رەسەيدىڭ كوماندالارىن تاڭدادى.

باسقاشا ايتقاندا، قازاق جانكۇيەرلەرىنە رەسەيلىك كوماندالاردى كۇشتەپ كورسەتتى. تەلەارنا باسشىلىعى "Qazsport" ارناسىن تەك قازاقتار كورەتىنىن ءبىلۋى كەرەك ەدى. مىڭ جەردەن جاعاتسىنىپ رەسەيلىك كوماندانى جارنامالاعانىمىزبەن ەلىمىزدەگى وزگە ۇلت وكىلدەرى قازاقستاندىق تەلەارنالارعا پىسقىرىپ تا قارامايدى. سەبەبى، ەلىمىزدە حابار تاراتاتىن رەسەيلىك ارنالار وزىمىزدىكىنەن كوپ. سول ءۇشىن وتاندىق تەلەارنالار مەن ءباسپاسوز رەسەي جايلى ايتا بەرۋدى توقتاتقانى ءجون. ءبىزدىڭ ويىمىزشا، ەلىمىز جانكۇيەرلەرىنىڭ رەسەيلىك سپورتشىلاردى ءوزىمسىنىپ، سولارعا جانكۇيەر بولۋىنا ەل بيلىگى مەن ءباسپاسوز تۇرتكى بولىپ وتىر.

قۋانىش قاپپاس

Abai.kz