«جانكۇيەرلىك ءوتىلى» مول جاسامىس وقىرماندارىمىز ايگىلى گرۋزين كوممەنتاتورى مارقۇم كوتە ماحارادزەنىڭ جاعىمدى باريتون داۋسىن ءالى ۇمىتا قويماعان بولار. 17 قاراشادا ونىڭ تۋعانىنا 90 جىل تولدى. تومەندەگى سۇحباتتى ول دۇنيەدەن وتەرىنەن ءبىر جىل بۇرىن بەرگەن ەكەن. ءبىز ءسال ىقشامداي اۋداردىق.

– كوتە يۆانۇلى، اكتەرلەردىڭ ءبارى بىردەي شىعارماشىلىق كارەراسىنىڭ شىرقاۋ شاعىندا سپورت كوممەنتاتورى بولا بەرمەيتىنىنە كەلىسەرسىز...

– ارينە. سپورت شولۋشىسى بولۋ مەنىڭ دە ومىرلىك ارمانىم بولعان ەمەس، دەگەنمەن سوعان اپاراتىن سەبەپ-سالدارلاردىڭ جاس كەزىمدە-اق اڭعارىلعانى راس. 1959 جىلى مەن سپورت تاقىرىبىندا «ەكى رەكورد» اتتى پەسا جازعام. پالەندەي الىپ بارا جاتقان ەشتەڭەسى جوق، ايتسە دە، تەاترلاردا ول ون شاقتى جىل بويىنا ۇزبەي قويىلىپ ءجۇردى... سونداي-اق ستۋدەنت كەزىمدە ءبىراز باسكەتبولمەن اينالىستىم. جاستار اراسىندا گرۋزيا چەمپيونى اتاندىم، ءتبيليسيدىڭ «ديناموسىندا» وينادىم. مەن ينستيتۋتتى اياقتاعان كەزدە كومانداعا كىلەڭ بويشاڭ جىگىتتەر قابىلدانا باستادى دا، 180 سم-گە ارەڭ جەتەتىن بويىممەن الىسقا بارا المايتىنىمدى ءوزىم دە ءتۇسىنىپ، ءبىرجولا تەاترعا اۋىستىم.

– ءسىزدىڭ العاشقى رەپورتاجىڭىز، قاتەلەسپەسەك، 1957 جىلى ەفيرگە شىعىپتى.

– ءيا. سول جىلى تبيليسيگە باسكەتبولدان اقش قۇراماسى كەلدى. ويىندى كىم جۇرگىزۋى كەرەكتىگى جونىندە اڭگىمە قوزعالعاندا، بىرەۋلەر مەنى ۇسىنىپتى: «ءتىلى جاتىق، ءوزى اكتەر، ءارى باسكەتبولدى دا ءتاۋىر بىلەدى» دەسە كەرەك. تۇڭعىش رەپورتاجىم اسا ءساتسىز شىقپاعاندىقتان بولار، كوپ ۇزاماي مەنى فۋتبول ماتچىن («دينامو» تب – «زەنيت») جۇرگىزۋگە دە شاقىردى. ال 1960 جىلى بۇل پاقىرىڭىز بۇكىلوداقتىق ارەناعا شىعىپ كەتتى. ۆاديم سينياۆسكي اۋىرىپ قالىپ، «پاحتاكور» – «دينامو» تب ويىنىن ورىس تىلىندە ورتالىق تەلەديداردان مەن جۇرگىزۋگە ءتيىس بولدىم. اۋەلدە اكتسەنتىمنەن ۇيالىپ، باس تارتىپ ەدىم، ماسكەۋدەگىلەر «باسقا ەشكىمنىڭ ىڭعايى بولماي تۇر، ءبىر جولعا قۇتقارا گور!» دەپ ءوتىندى. سودان بەرى 40 جىل بويى «قۇتقارۋمەن» اينالىستىم.

– ءوزىڭىز وتە ناشار بىلەتىن سپورت تۇرىنەن رەپورتاج جۇرگىزىپ كورىپ پە ەدىڭىز؟

– ونداي جاعدايعا مەن 1972 جىلعى وليمپيالىق ويىنداردا تاپ بولدىم. وليمپيادانىڭ ەندى قىزىپ جاتقان شاعىندا نيكولاي وزەروۆ اياق استىنان كاناداعا – كسرو حوككەيشىلەرىنىڭ جولداستىق كەزدەسۋلەرىنە ۇشىپ كەتتى. ەرتەڭىنە كوممەنتاتورلار بريگاداسى ادەتتەگىدەي لەزدەمەگە جينالدىق. ءبارىمىزدىڭ دە كوڭىل-كۇيىمىز جاقسى. شەتىمىزدەن كەزەكتى جارىستارعا ءبولىپ جاتىر: «ەرەمين – اندا، سپاررە – مىندا، سەمەنوۆ – اندا، ال ماحارادزە ء(سال ۇنسىزدىكتەن سوڭ) – بوكسقا». مەن ءوزىمدى بوكستان مۇلدە بەيحابارمىن دەي المايمىن، ءبىراز گرۋزين بوكسشىلارىن بىلەتىنمىن. بىراق ودان رەپورتاج جۇرگىزۋ؟ بۇل دەگەنىڭىز ناعىز ارسىزدىق قوي! ال «بۇل سپورتتى مەن ونشا بىلمەيتىن ەدىم» دەپ قالاي ايتاسىڭ؟ «وندا وليمپياداعا نەمەنەگە كەلدىڭ؟» دەپ بىردەن باس سالماي ما ءبارى؟..

امال جوق، بوكسقا بارۋعا تۋرا كەلدى. رەپورتاج باستالدى. ابىرجىعانىم سونشالىق، باسىم مىڭ-دىڭ، نە ايتىپ، نە قويعانىمدى ءوزىم تۇسىنبەيمىن. قارسىلاستاردى تانىستىرىپ جاتىرمىن: «رينگتىڭ سول جاعىندا – فينليانديا بوكسشىسى كەسكينەن، وڭ جاقتا – كونگولىق نكۋا موتۋ». ەكەۋىنىڭ دە شورتى اق، بىراق ءبىرىنىڭ جەيدەسى قىزىل دا، ەكىنشىسىنىكى كوك ەكەن. اق-قارا ءتۇستى تەلەديداردان قىزىل مەن كوكتى ايىرۋ قيىن شىعار دەدىم دە، كونگولىقتىڭ ءنومىرىنىڭ 352, ال فيندىكىنىڭ 172 ەكەنىن حابارلادىم. ودان سايىن ناقتىلاي تۇسكىم كەپ، بوكسشىلاردىڭ ءبىرىنىڭ جەيدەسىندە ءبىر اق سىزىق، ەكىنشىسىندە قوس جولاق بار ەكەنىن دە ايتىپ تاستادىم. سوندا دا توقتايتىن ەمەسپىن: كەلەسى مينۋتتى قارسىلاستاردىڭ شۇلىعىنىڭ ءتۇسىن تۇستەۋگە ارنادىم. سودان كەيىن بارىپ ميىما بىردەڭە جەتتى... نە دەپ ويلايسىز؟

– بوكسشىلاردىڭ قۇرىعاندا بىرەۋىنىڭ نەگر ەكەنى مە؟

– سول...

– بۇدان كەيىن رەپورتاجدارعا تىڭعىلىقتى ازىرلەنەتىن بولعان شىعارسىز؟

– مەنەن «رەپورتاجعا قالاي دايىندالاسىز؟» دەپ جۇرت ءجيى سۇرايدى. مەن تۇك تە دايىندالمايمىن. بالكىم، كەرىسىنشە، ءومىر بويى دايىندالاتىن شىعارمىن. ايتەۋىر كورەرمەندەردى تاڭعاجايىپ تاپقىر سوزبەن تاڭ قالدىرۋدى ماقسات تۇتىپ، ءتۇنى بويى كىتاپ اقتارمايتىنىم انىق. كابيناعا دا قۇشاق-قۇشاق قاعاز، گازەت اپارمايمىن، مەنىڭ الدىمدا ادەتتە ويىن تەڭ اياقتالسا (نەمەسە كوماندالاردىڭ ءبىرى ۇتسا) ءارى قاراي نە بولاتىنى جازىلعان ءبىر پاراق قاعاز عانا جاتادى. ال قالعان مالىمەتتىڭ ءبارى سەنىڭ باسىڭدا بولۋى ءتيىس. ەگەر الەم چەمپيوناتىن الساق، كەم دەگەندە 200 فۋتبولشى تۋرالى اقپارات جادىڭدا جاتتالىپ تۇرۋى كەرەك.

– ءسىزدى جانكۇيەرلەردىڭ وتە جاقسى كورەتىنىن قالاي تۇسىندىرەر ەدىڭىز؟

– بىلمەيمىن. بالكىم، جۇرتقا مەنىڭ اكتسەنتىم ۇنايتىن بولار. بالكىم، باسقا نارسە... مەن ايتەۋىر كوممەنتاتورلىق كابيناعا ەشقاشان اشۋلانىپ نەمەسە بىرەۋگە رەنجىپ كەلمەيمىن، بۇكىل رەپورتاج بويىنا ءبىر كوماندانىڭ نەمەسە ويىنشىنىڭ اتىنا كەكەسىن، كەلەكە ءسوز ايتىپ، بىلگىشسىنىپ وتىرۋ دەگەن مەندە مۇلدە بولمايدى. كوممەنتاتور ءادىل دە مەيىرىمدى بولۋى كەرەك. سونداي-اق ول ءوز اۋديتورياسىنىڭ ەرەكشەلىكتەرىن دە ەسكەرگەنى ءجون. ەلۋ جىل بويى بىردە-ءبىر رەت جول ەرەجەسىن بۇزباعان نيۋ-يوركتىك ءبىر تاكسيستەن سول تابىسىنىڭ سەبەبىن سۇراعاندا، ول: «بۇعان تاڭ قالاتىن تۇك تە جوق: مەن الدىمدا كەلە جاتقان نەمەسە ءوزىمدى باسىپ وزىپ بارا جاتقان كولىكتەردىڭ جۇرگىزۋشىلەرىنىڭ ءبارىن جىندى دەپ ەسەپتەدىم دە، سوعان ساي ارەكەت ەتتىم»، – دەپتى. ءبىزدىڭ جۇمىس تا سول سياقتى: رەپورتاجدى ميلليونداعان «جىندىلار» تىڭدايدى، ەگەر سۇيىكتى كوماندالارىنىڭ اتىنا ءبىر ورىنسىز سىن ايتىلسا، ولار كوممەنتاتوردى ءتۇتىپ جەۋگە شاق قالىپ وتىرادى.

– سىزدىڭشە، ماحارادزەنى كسرو حالقىنىڭ قاي الەۋمەتتىك توبى ەرەكشە جاقسى كوردى؟

– ءسوز جوق، ايەلدەر. ونىڭ ىشىندە، باسىم بولىگى – ەنەلەر. بىردە ماسكەۋدە، ءياشيننىڭ مەرەيتويىندا ستاديوندا تۇرمىن، ماعان قارسى ءبىر ادەمى ورىس قىزى كەلە جاتتى. قولىندا – ءبىر دەستە گۇل. تاياپ كەلىپ، گۇلدى ۇسىندى دا، «بەتىڭىزدەن سۇيۋگە بولا ما؟» دەپ سۇرادى. «ارينە» دەدىم. ءسۇيدى، مەن كوكتەمگى قارشا ەرىپ كەتە جازداپ، ءارى قاراي نە بولارىن كۇتىپ تۇرمىن. سويتسەم، ول سۇلۋىم: «بىلەسىز بە، ءسىزدى مەنىڭ ەنەم وتە جاقسى كورەدى، مىنا گۇلدى سول كىسى بەرىپ جىبەردى»، – دەپ قاراپ تۇر... راس، مەنىڭ ءۇي شارۋاسىنداعى ايەلدەر اراسىندا ابىرويىم جوعارى بولدى. «ەگەر الگى گرۋزين جۇرگىزەتىن بولسا قالدىر، ايتپەسە باسقا ارناعا اۋىستىر!» دەپ تەلەديدار الدىندا قوجايىندارىنا قىر كورسەتكەندەردىڭ تالايىنان حات تا العام.

– ايەل زاتىنىڭ سىزگە دەگەن ىستىق ىقىلاسى نەگە بايلانىستى ەكەن؟

– ونى، بالكىم، سوفيكودان سۇراپ كورگەن ءجون بولار. ول ەكەۋىمىز ءبىر سپەكتاكلدە ويناپ ءجۇرىپ تابىستىق. ءبارى دە كۇتپەگەن جەردەن بولدى. ول كەزدە ەكەۋىمىزدىڭ دە باسىمىز بوس ەمەس ەدى عوي.

– وندا ماحابباتتارىڭىزدا اسا رومانتيكالىق رەڭك بولا قويماعان شىعار؟

– قايداعى رومانتيكا، قايتا كريمينالدىق رەڭك باسىمىراق بولدى ما دەيمىن: ەكى جاقتان دا تالاي كەدەرگىلەر جاسالىپ، كوپ قينالعانىمىز راس.

– ال فۋتبولدا جاعىمسىز جايتتارعا كوپ كەزىكتىڭىز بە؟

– كەزىكتىم. كەڭەس داۋىرىندە ءبارى دە بولدى عوي. قازىر ۇنامايتىنى – تورەشىلەردى كىم كورىنگەننىڭ تىلدەي بەرۋگە ەركىندىك العانى. رەسەيدىڭ ءبىر سپورتتىق گازەتىنەن «تورەشى – ورىس كومانداسىن ورعا جىققان جەندەت» دەگەن ءسوزدى وقىعانىم بار. بۇل – كەڭەستىك كەزەڭدە قۇلاشىن كەڭ جايعان ورىس ءشوۆينيزمىنىڭ بۇگىنگى كورىنىسى ەمەي، نەمەنە؟..

– وسى پىكىرىڭىزدى جوققا شىعارۋعا تىرىسايىن: وندا نەگە 1982 جىلعى الەم چەمپيوناتىنداعى كەڭەس قۇراماسىنىڭ ەڭ شەشۋشى ويىنىن جۇرگىزۋ گرۋزين كوممەنتاتورىنا جۇكتەلدى؟

– ول ۇزاق اڭگىمە. يسپانيادا وتكەن سول چەمپيوناتتا ۆلاديمير ماسلاچەنكو گەرمانيا – الجير ماتچىنان رەپورتاج جۇرگىزۋگە ءتيىس بولدى. ول ءۇشىن ۆولوديا سوناۋ يت ارقاسى قيانداعى حيحونعا بارۋى كەرەك ەدى. «ونسىز دا كىمنىڭ ۇتاتىنى ءمالىم قىزىقسىز ويىنعا بولا جەردىڭ تۇبىنە بارام با؟» دەپ ول قايتا-قايتا اھىلاپ-ۇھىلەي بەرگەن سوڭ، ونىڭ ورنىنا مەن باراتىن بوپ كەلىستىم. ال الجير، ەسىڭىزدە بولسا، نەمىستەردى جەڭىپ كەتتى. وسىدان سوڭ ماسكەۋ «سەن سەنساتسيا تۋدىرا الادى ەكەنسىڭ» دەپ، كسرو قۇراماسىنىڭ ويىندارىنا دا مەنى جىبەرەتىن بولدى. الگى ءوزىڭ ايتقان شەشۋشى ماتچتان (پولياكتارمەن) رەپورتاج جۇرگىزگەنىمنىڭ سەبەبى سول.

ايتپەسە مەن ءۇشىن ءبارى دە ءساتتى باستالىپ ەدى. ەكىنشى توپتىق كەزەڭدە ماعان «س» توبى ءتۇستى – يتاليا، برازيليا، ارگەنتينا. بۇدان ارتىق نە كەرەك؟ كىمدى قالاي تىلدەيمىن دەسەڭ دە ءوزىڭ بىلەسىڭ: مارادونانى بۇزاقى دەيسىڭ بە، دجەنتيلەنى بانديت، فالكاونى گوموسەكسۋاليست...

– قالاي-قالاي؟

– قالجىڭ عوي. ايتەۋىر مۇندا «وسىلاي دەسەم، ماسكەۋ نە دەپ قالادى...» دەپ قىلپىلداپ وتىرمايسىڭ. ايتپەسە كسرو قۇراماسىنىڭ ويىندارىندا ءار ءسوزىن ابايلاپ جۇپتاپ، ساق سويلەپ وتىراتىن كوليا وزەروۆتىڭ ءحالىن مەن بىلمەيدى دەيمىسىڭ. الگى پولياكتارمەن ويىندا مەن دە ءوزىمدى كاۆكازدىڭ اقباس شىڭدارىنىڭ ۇستىندە ەركىن قالىقتاپ جۇرگەن قىرانشا سەزىنە قويعام جوق. ومىرىمدەگى ەڭ سولعىن رەپورتاجىم سول بولعان شىعار دەپ ويلايمىن.
ول كەزدە ءبىز ۇنەمى قىسىمعا ۇشىراپ جاتاتىنبىز. ەشقاشان اتىن ايتىپ، ءوزىن تانىستىرمايتىن ءبىر ادام (ونى ءبىز، كوممەنتاتورلار، «ميستەر يكس» دەپ اتاپ كەتكەنبىز) ماسكەۋدەن ناۋشنيك ارقىلى «ولاي ايتپا، بىلاي ايت» دەپ، ۇنەمى ءار سوزىمىزدەن استار ىزدەپ وتىراتىن. 1972 جىلى مەن ەرەۆاننىڭ «اراراتى» مەن نەمىستىڭ «كايزەرسلاۋتەرنى» اراسىنداعى قارىمتا ماتچتان رەپورتاج جۇرگىزدىم. ءبىرىنشى تايم بىتكەن كەزدە ناۋشنيكتەن «ءسىز نەگە قايتا-قايتا ارميان فۋتبولشىلارى دەي بەرەسىز؟» دەگەن نارازىلىق ەستىلدى. «نە، ارميان فۋتبولشىلارى ەكەنى وتىرىك پە؟» دەپ ەدىم، «ارمياندار ەكەنى راس، بىراق ءبىز «كەڭەس فۋتبولشىلارى» دەپ ايتۋىڭىزدى قاتاڭ تالاپ ەتەمىز» دەپ ەسكەرتتى «ميستەر يكس».

ال 1981 جىلعى كۋبوك يەلەرىنىڭ كۋبوگى جارىسىنىڭ فينالىنان جاساعان رەپورتاجىم ءۇشىن مەن ءتىپتى سوگىس الدىم. ۇمىتپاسام، تەلەترانسلياتسيا سوڭىندا مەن بىلاي دەدىم: «ءدال قازىر تبيليسيدە، گرۋزيانىڭ كونە استاناسىندا نە بولىپ جاتقانىن كوزگە ەلەستەتۋدىڭ ءوزى قيىن! بۇل – گرۋزين فۋتبولىنىڭ... (باياعى ەسكەرتۋ ەسىمە ءتۇسىپ كەتتى) جانە بۇكىل كەڭەس فۋتبولىنىڭ اسا ءىرى تابىسى!». بىراق ءبارىبىر كەيىن مەنى شاقىرىپ الىپ، «گرۋزين فۋتبولى» دەگەن تىركەستىڭ استارىندا نە جاتقانىن تەرگەپ-تەكسەرىپ، بالە بولدى...

مەن ءاۋ باستان ماسكەۋمەن جاقسى بولمادىم. ونداعىلار ماحارادزەنىڭ تىكەلەي رەپورتاج كەزىندە ەفيردەن «كەڭەس عارىشكەرلەرى گرەچكو مەن رومانەنكو كەشە جەر شارىن اينالىپ شىقتى» ىسپەتتى اقپاراتتى ءومىرى ايتپايتىنىن بىردەن ءتۇسىندى. سوسىن مەنىڭ زىعىردانىمدى قايناتقانى – مەمتەلەراديو سپورت رەداكتسياسى جاڭا باسشىلىعىنىڭ «كوممەنتارينوست» دەگەن ءستيلدى بىزگە كۇشتەپ ەنگىزۋگە تىرىسۋى. ونىڭ نە ەكەنىن بىلەسىز بە؟ بىلاي. ويىن قىزىپ جاتىر، قوس قاقپانىڭ الدىندا دا كەزەك-كەزەك قاۋىپتى ساتتەر تۋىنداۋدا، جانكۇيەر بىتكەن جانىن قويارعا جەر تاپپاي تۇر، ال كوممەنتاتور بەي-جاي دا بەيتاراپ داۋىسپەن «4+4+2 سحەماسىن ۇستانعان باپكەردىڭ سۇڭعىلا تاكتيكاسى تۇرعىسىنان كەلگەندە، ورتالىق شابۋىلشىنىڭ ءىس-ارەكەتى وعان بەلگىلى دارەجەدە ۇيلەسپەي جاتقانى اڭعارىلادى» دەپ مىڭگىرلەپ وتىرۋى كەرەك. بۇدان اسقان بىلجىراق بولا ما؟ مەن ويىن قانداي قارقىندا ءوتىپ جاتسا، جانكۇيەردىڭ جان-دۇنيەسىن دە سوعان لايىق احۋالدا ۇستاپ وتىرۋىم كەرەك ەمەس پە؟

– وندا ءسىزدىڭ نەگىزگى كرەدوڭىزدى انىقتاپ الايىق. ءسىز فۋتبول مامانىسىز...

– مەن ەشقانداي دا فۋتبول مامانى ەمەسپىن. جالپى، جۋرناليستەر – فۋتبول ماماندارى ەمەس. ەڭ سورلى دەگەن جاتتىقتىرۋشىنىڭ ءوزى بۇل ويىننىڭ تاكتيكاسىن، تەحنيكاسىن جانە مەتوديكاسىن الەمدەگى ەڭ تالانتتى دەگەن جۋرناليستەن الدەقايدا جاقسى بىلەدى. شىنىم وسى: مەن فۋتبولدى بىلمەيمىن. كەيبىرەۋلەر سۇراپ جاتادى: «ەگەر سىزگە ءتبيليسيدىڭ «ديناموسىنا» باپكەر بول دەسە، بارار ما ەدىڭىز؟» دەپ. مەن قالاي باپكەر بولامىن، ول مەنىڭ قولىمنان كەلمەيدى عوي! ال كەيبىر جۋرناليستەردىڭ ماتەريالدارىنان الدەقانداي ءبىر ءالسىز كلۋبتى جاتتىقتىرىپ، ونى الەمدىك دەڭگەيگە كوتەرىپ جىبەرۋگە دەگەن اڭساردى اڭعارۋ قيىن ەمەس. نارتسيسسيزم دەگەن جۋرناليستەر قاۋىمى اراسىنداعى ەڭ قاۋىپتى دەرت قوي.

– جالپى، ءسىزدىڭ سۇيىكتى باپكەرىڭىز كىم؟

– نودار احالكاتسي. ارينە، مەن ونى الەمدىك دەڭگەيدەگى مامان دەپ ايتا المايمىن، دەگەنمەن ونىڭ ءوزىن وزگەلەردەن ەرەكشەلەپ تۇراتىن بىرنەشە قاسيەتتەرى بار-تىن. ماسەلەن، تالانتتى ويىنشىلاردى تاپ باسىپ تاني ءبىلۋ قابىلەتى. كەزىندە زاۋر سۆانادزەنى كۋتايسيدەن الىپ كەتكەلى كەلگەندە، ونداعىلار «ويباي-اۋ، ول بىزدە دە جارىتىپ ويناپ جۇرگەن جوق قوي!» دەپ شالقاسىنان تۇسە جازداپتى. ال كەلەسى جىلى سول سۆانادزە تبيليسيلىك «دينامونىڭ» قۇرامىندا ەۋروكۋبوكتاردا جارقىلداپ ءجۇردى.

ماعان ۆالەري لوبانوۆسكي دە قاتتى ۇنايدى، تەك ونىڭ «ويىندا ەڭ باستىسى – ناتيجە» دەگەن دەۆيزىن جاقتىرمايمىن. ايتسە دە، ونىمەن قارىم-قاتىناسىم وتە جاقسى بولدى. مەنى «بلوحين، لوبانوۆسكي جانە باسقالار» اتتى ءفيلمنىڭ ءتۇسىرۋ جۇمىستارىنا شاقىرعاندا ادەپكىدە تاڭ قالعان ەدىم: فيلم ۋكراين فۋتبولى جايىندا، ال كوممەنتاتور نەگە گرۋزيادان؟ بىراق ماعان «ءبارى دە كەلىسىلگەن» دەستى. كيەۆكە ۇشىپ كەلدىم دە، 16 كۇن بويىنا... دەنساۋلىعىمدى قۇرتۋمەن اينالىستىم. نەگىزى، لوبانوۆسكي ەشقاشان ىشپەيتىن، بىراق سول كەزدە ونىڭ قالاي ىشكەنىن كورسەڭىز! سويتسەم، ۆالەري ۆاسيليۇلىنىڭ تانىس فيزيكتەرى وتە كوپ بولاتىن، سولاردىڭ ءبىرى «ومىرتقاداعى ءسترونتسيدى كەتىرۋ ءۇشىن ەڭ ابزالى – اراق ءىشۋ» دەپ كەڭەس بەرىپتى. ءارى چەرنوبىل اپاتىنىڭ دا اسەرى جويىلا قويماعان ۋاقىت ەدى، سوندىقتان كەز كەلگەن ماسەلەگە اسقان كاسىبيلىكپەن كىرىسەتىن باپكەردىڭ ونىسىن تۇسىنۋگە بولادى. ونىڭ ۇستىنە، مۇنداي «ەمدىك پروتسەدۋرادان» لوبانوۆسكي اسا قاتتى قينالا قويعان جوق، ال مەنىڭ جاعدايىم، كەرىسىنشە، جامان بولدى. ەندى... ەكى اپتا اراق ءىشۋ وڭاي ما؟ ايتەۋىر ءوزىمدى «كۇن وتكەن سايىن مەنىڭ دە ومىرتقامداعى سترونتسي ازايىپ جاتقان شىعار» دەپ جۇباتقان بولدىم... اتالمىش كەزدەسۋلەردىڭ ءبىر ناتيجەسى – مەن لوبانوۆسكيمەن ءۇش ساعاتتىق (!) تەلەسۇحبات جاسادىم. سۇحبات تاسپاعا جازىلىپ بولعان سوڭ، رەجيسسەر ماعان: «ءسىزدى نەگە ارنايى الدىرعانىمىزدى ەندى ءتۇسىندىڭىز بە؟ باسقالارمەن ول 15 مينۋتتان ارتىق سويلەسپەس ەدى!» – دەپ سىبىرلادى...

ساكەن سىبانبايدىڭ

Facebook-تەگى جازباسى

Abai.kz