الەۋمەتتىك جەلىدە الماتى قالاسىنىڭ اكىمى باقىتجان ساعىنتاەۆتىڭ وتستاۆكاعا كەتكەنى تۋرالى اقپارات تارادى. بۇنداي اقپاراتتىڭ شىعۋىنا اكىمنىڭ ورنىنا رەسمي قۇجاتتارعا س.قۇسايىنوۆتىڭ قول قويعانى سەبەپ بولعان.

«ۆىحود ك پراۆدە» تەlegram ارناسى: «الماتىلىقتاردا جاقىندا جاڭا اكىم پايدا بولۋى مۇمكىن. ساعىنتاەۆ جاقىندا قىزمەتىنەن كەتۋى مۇمكىن دەگەن اڭگىمەلەر جيىلەپ كەتتى. وعان سەبەپكەر بولعان اكىمنىڭ ورنىنا سوڭعى ۋاقىتتا قۇجاتتاردى ونىڭ سەنىمدى وكىلى س. قۇسايىنوۆتىڭ قول قويىپ كەلۋى بولىپ وتىر»، - دەپ جازادى.

ال الماتى قالاسىنىڭ اكىمىنىڭ ءباسپاسوز قىزمەتى اكىمنىڭ ورنىنا باسقا قولدىڭ تۇرۋىن اكىمنىڭ ەڭبەك دەمالاسىندا بولۋىمەن بايلانىستىرادى.

اكىمنىڭ ءباسپاسوز حاتشىسى اسەت مۇقاجانوۆ بۇل اقپاراتتى جوققا شىعارىپ: «الماتى اكىمى باقىتجان ساعىنتاەۆ قىسقا مەرزىمدى دەمالىستا»  - دەپ قىسقا قايىرعان.

الايدا مۇقاجانوۆ اكىمنىڭ قاي ۋاقىتتان بەرى ەڭبەك دەمالىسىنا كەتكەنىن، قىزمەتىنە قاشان ورالاتىنىن ناقتىلاماعان.

الماتىداعى العاشقى جۇمىس كۇندەرىن «كوشە ارالاۋدان» باستاعان باقىتجان ءابدىرۇلىنىڭ دوعارىسقا كەتۋى جايلى العاش رەت ايتىلىپ وتىرعان جوق. 2019 جىلى ساعىنتاەۆتىڭ ءوزى سويلەپ، قاراماعىنداعى مەملەكەتتىك قىزمەتكەرلەردىڭ ءبىرى جەمقورلىققا شاتىلىپ، ونىسى دالەلدەنسە، ءوز ەركىمەن وتستاۆكاعا كەتەتىنىن مالىمدەگەن ەدى.

«قۇداي ساقتاسىن، ەگەر مەنىڭ قاراماعىمداعىلاردىڭ ءبىرى جەمقورلىق ءىسى بويىنشا سوتقا تارتىلىپ، سوت ايىپتاۋ ۇكىمىن شىعاراتىن بولسا، زاڭعا سايكەس، مەن وتستاۆكاعا ءوتىنىش جازۋعا مىندەتتىمىن»، - دەگەن. دەگەن دە، «مەنىڭ وتستاۆكاعا كەتۋ تۋرالى ءوتىنىشىمدى قابىلداۋ يا قابىلداماۋدى پرەزيدەنت قاسىم-جومارت توقاەۆ شەشىتىن بولادى»، - دەگەندى قوسىپ ايتقان.

ساعىنتاەۆ ءبىر جىلدا 4 قىزمەت اۋىستىرعان اكىم

باقىتجان ساعىنتاەۆ جامبىل وبلىسىنىڭ تۋماسى. 13 قازاندا 58-گە تولادى. ارىدەگىسىن ايتپاعاندا، سوڭعى 5 جىلدىڭ ىشىندە ءبىراp «كرەسلو» اۋىستىرعان.

2016 جىلدىڭ قىركۇيەگىندە قر پرەمەر-ءمينيسترىنىڭ مىندەتىن اتقارۋشى، كەيىن پرەمەر-مينيستر بولدى. پرەمەرلىكپەن قاتار، «سامرۇق-قازىنادا» ديرەكتورلار كەڭەسىن باسقاردى.

2019 جىلى سول كەزدەگى پرەزيدەنت نۇرسۇلتان نازارباەۆتان سوگىس ەستىپ، ۇكىمەت تولىق قۇرامدا وتستاۆكاعا كەتكەن. نازارباەۆ: «ءوسۋ جوق. الەۋمەتتىك-ەكونوميكالىق تۇراقتىلىقتى ۇستاپ تۇرۋ – بۇگىنگى ۋاقىت ءۇشىن جەتكىلىكسىز»، - دەگەن ەكس-پرەزيدەنت. بۇل 2019 جىلدىڭ اقپانى اياقتالار ۋاقىت ەدى.

ناۋرىزدىڭ 1-ءى كۇنى باقىتجان ءابدىرۇلى قازاقستاننىڭ مەملەكەتتىك حاتشىسى بولىپ تاعايىندالدى. بۇل قىزمەتتە تۇپ-تۋرالى 23 كۇن ىستەپ، 24 ناۋرىزدا پرەزيدەنت اكىمشىلىگىن باسقارۋعا اۋىستى. سودان اراعا 3 اي سالىپ، الماتىعا اكىم بولىپ كەلدى (28 ماۋسىم 2019 جىل).

ساعىنتاەۆتىڭ «پرەمەرلىگى» تۋرالى ەكى اۋىز ءسوز، تاقىرىپقا تۇزدىق رەتىندە. ول ۇكىمەتتىڭ تىزگىنىن 2016 جىلدىڭ قىركۇيەگىندە ۇستادى. تاۋەلسىزدىك العان جىلداردان بەرگى 10-شى ادام ەدى، ۇكىمەتتى باسقارعان. ونىڭ الدىندا پرەمەر كرەسلوسىندا ءماسىموۆ دەيتىن مۇرتتى اعاي وتىرعان.

باقىتجان ءابدىرۇلى ۇكىمەتكە كەلگەندە كوپ قازاقتىڭ ءىشى جىلىپ، ۇكىمەتتەن ۇزىلەيىن دەگەن ءۇمىتى قايتا تۇتانعانداي بولعان. پرەزيدەنتتىڭ قاتال سىنىنان كەيىن ءبىر-اق كۇندە قىزمەتىنەن كەتتى. جۇرت ساعىنتاەۆ ۇكىمەتىن – «كوپ بالالى انالار كەتىرگەن ۇكىمەت» دەپ باعالادى.

ەندى مىنا قىزىقتى قاراڭىز: جۇرت الدىندا ەكى-ءۇش جىلدىق جۇمىسىن تۇككە العىسىز ەتىپ سىناعان ەكس-پرەزيدەنت نۇرسۇلتان نازارباەۆ كەيىن سول ساعىنتاەۆتى «ىسكەر، ادال جىگىت» دەپ ماقتاعان. ساعىنتاەۆ تا قاراپ وتىرماي، ەلباسىنا العىس ايتىپ، «مەملەكەتتىڭ نەگىزىن قالاعان كورەگەن كوسەم، بۇكىل ۇلتتىڭ اكەسىنە» تەڭەگەن.

سويتكەن، باقىتجان ساعىنتاەۆتىڭ «وتستاۆكاعا كەتەتىنى» جايلى كەزەكتى ءسوز تاراپتى. ال اكىمدىك: «ساعىنتاەۆ ەڭبەك دەمالىسىندا»، - دەپ قىسقا قايىرعان ەكەن. حوش. سولاي بولسىن. الدا-جالدا جەلىدەگى ءسوز جان الىپ، باقىتجان ءابدىرۇلى وتستاۆكاعا كەتىپ جاتسا، الماتى اكىمدىگىن كەلەسى بولىپ كىم باسقارۋى مۇمكىن؟ تالقىلايىق...

Abai.kz