بيىل الاش ارداقتىسى، ۇلى اعارتۋشى احمەت بايتۇرسىنۇلىنىڭ تۋعانىنا 150 جىل تولدى. وسىعان وراي، پرەزيدەنت قاسىم-جومارت توقاەۆ الدىن الا بەكىتىلگەن جۇمىس كەستەسىنە سايكەس، 5 قىركۇيەك كۇنى قوستاناي وبلىسىنا بارادى. جۇمىس ساپارى اياسىندا اعارتۋشى، ۇلت ۇستازى احمەت بايتۇرسىنۇلىنىڭ 150 جىلدىق مەرەيتويىنىڭ رەسمي ءىس-شارالارىنا قاتىسادى.

ۇلت ۇستازىنىڭ مەرەيتويى الەمنىڭ بىرنەشە ەلىندە يۋنەسكو كولەمىندە اتالىپ وتىلەدى.

قازاقستان احمەت بايتۇرسىنۇلىنىڭ 150 جىلدىعىنا دايىندىقتى ءبىر جىل بۇرىن باستاعان بولاتىن. بىلتىر قاراشادا ۇكىمەتتىڭ ارنايى قاۋلىسى قابىلدانىپ، مەرەيتويدى وتكىزۋگە جاۋاپتى كوميسسيانىڭ قۇرامى بەكىتىلدى. كوميسسيانىڭ ۇيىمداستىرۋىمەن قازاقتىڭ اردا ازاماتىنىڭ اتىن تانىتۋ ماقساتىندا 63 پۋنكتتەن تۇراتىن جوبا جاسالدى.

ونىڭ ىشىنە: عىلىمي كونفەرەنتسيا، سيمپوزيۋم، فورۋم تۇرىندەگى، ونلاين جانە وففلاين فورماتتاعى جيىندار وتكىزۋ،  عالىمنىڭ ەڭبەكتەرىن الەمنىڭ تانىمال تىلدەرىندە باسىپ شىعارىپ، حالىققا تاراتۋعا باعىتتالعان 8 شارانى وتكىزۋ، ايتىس، ءمۇشايرا، فەستيۆال، كونكۋرس فورماتىنداعى رەسپۋبليكالىق جانە وڭىرلىك دەڭگەيدەگى 12 بايقاۋ جاريالاۋ، احمەت مۇراسىن ساحنالىق قويىلىم، كينو، سپەكتاكل ارقىلى دارىپتەۋگە ارنالعان شارالار ۇيىمداستىرۋ، اقپاراتتىق-يميدجدىك باعىتتاعى شارالار وتكىزۋ، حالىقارالىق دەڭگەيدەگى  اۋقىمدى 7 شارا مەن ساۋلەت جانە رەستاۆراتسيالىق باعىتتاعى 7 شارا وتكىزۋ كىرەدى. سونداي-اق، ۇلت ۇستازىنىڭ 150 جىلدىعى بەلگىسى بار پوشتا ماركالارى مەن ۇلتتىق بانك مونەتالارىن شىعارۋ جوسپارلانعان.

حالىقارالىق دەڭگەيدە تۇركيانىڭ ستامبۇل قالاسىندا دوڭگەلەك ۇستەل مەن فوتوكورمە، ازەربايجان استاناسىندا «باكۋ كونگرەسى جانە احمەت بايتۇرسىنۇلى» اتتى كونفەرەنتسيا وتپەك.

الداعى ۋاقىتتا قوستاناي مەملەكەتتىك ۋنيۆەرسيتەتىنىڭ بازاسىندا احمەت بايتۇرسىنۇلىنىڭ ءومىر جولى، قىزمەتى، جازعان ەڭبەكتەرىن تانىتۋ ماقساتىندا «احمەت الەمى» اتتى ينتەراكتيۆتى پورتال قۇرىلادى. ساۋلەت قۇرىلىس جۇمىستارى دا قارقىندى جۇرمەك. ۇلت قايراتكەرىنىڭ اتىمەن اتالاتىن مۋزەي ۇيلەرگە جوندەۋ جۇمىستارىمەن قاتار ءىرى مەگاپوليستەر: نۇر-سۇلتان، الماتى، شىمكەنتتە احاڭا ارنالعان ەسكەرتكىشتەر بوي كوتەرمەك.

مارالتاي ىبىراەۆ، اقىن:

- احمەت بايتۇرسىنۇلى قازاق رۋحانياتىنداعى الىپ تۇلعا، قازاقتىڭ بەس ارىسىنىڭ ءبىرى. ونىڭ قازاق ءتىلى مەن ادەبيەتىنە قوسقان ۇلەسى ۇشان-تەڭىز. «ادەبيەت تانىتقىش» اتتى ەڭبەگىندە قازاق ادەبيەتتانۋ عىلىمىن تەرەڭىنەن زەرتتەپ، دامۋ كەزەڭدەرىنە ءبولىپ بەردى. حالىق اۋىز ادەبيەتى ۇلگىلەرىن جينادى. ول قازاقتىڭ ۇلتتىق ءالىپبيىن جاساپ شىعاردى. «وقۋ قۇرالى» اتتى زەرتتەۋ ەڭبەگى وسى العاشقى قازاق الىپبيىمەن جازىلىپ، باسىلىپ شىقتى. بۇل ەڭبەك ءالى كۇنگە دەيىن ءوز قۇندىلىعىن جوعالتپاعان وقۋلىق. احاڭ قازاق جۋرناليستيكاسىنىڭ نەگىزىن سالۋشى. ول «قازاق» گازەتىن ۇيىمداستىرىپ، ساناعا سىلكىنىس جاسادى. وتكىر ماقالالارىمەن قوعامنىڭ كۇيىپ تۇرعان ماسەلەلەرىن كوتەردى. ءبىزدىڭ مىندەت وسىناۋ ۇلى اعارتۋشى، عالىم، الاشتىڭ اردا ۇلى احمەت بايتۇرسىنۇلىنىڭ اتىن وشىرمەي، ەڭبەگىن ۇرپاق ەسىندە ماڭگى ساقتاۋعا اتسالىسۋ.

Abai.kz