سارسەنبى, 7 جەلتوقسان 2022
انە، كوردىڭ بە؟ 1476 24 پىكىر 30 قىركۇيەك, 2022 ساعات 13:22

مۋسين مىرزا، قاشقىندارعا نەگە قۇراق ۇشىپ ءجۇرسىز؟

رەسەيلىكتەر قازاقستانعا جاپپاي اعىلىپ جاتىر. 24 اقپاننان كەيىن رەسەيلىكتەردىڭ العاشقى لەگى قازاقستانعا كەلە باستادى، ال 21 قىركۇيەكتەن كەيىن رەسەيلىكتەردىڭ ەكىنشى اعىنى باستالعان ەدى.

رەسەيدە كرەمل جارتىلاي موبيليزاتسيا جاريالاپ، سوعىسقا شاقىرىلۋ قاۋپىن سەزگەن رەسەيلىكتەر قازاقستان، موڭعوليا، ارمەنيا، گرۋزيا، بەلارۋس شەكاراسىنا اعىلدى. ءبىر اپتانىڭ ىشىندە قازاقستانعا رەسمي دەرەك بويىنشا 98 مىڭ رەسەيلىك كەلگەن.

رەسەيلىكتەردىڭ جاپپاي اعىلۋى ەلىمىزدە ءبىرشاما ماسەلەنى كۇردەلەندىردى. پاتەر اقىسىنىڭ ەسەلەپ ءوسۋى، تاكسي باعاسىنىڭ قىمباتتاۋى بىردەن بايقالدى. موبيليزاتسيادان قاشقان قاشقىندار قازاقستاندا جسن جاساتىپ، بانكتىك كارتوچكالار راسىمدەۋگە تىرىسۋدا. رەسەيدىڭ "مير" تولەم جۇيەسىنە الەم ەلدەرى تىيىم سالۋدا. رەسەيلىكتەر "ميردان" باس تارتىپ، بارۋشى ەلدىڭ تولەم جۇيەسىن جىلدام راسىمدەۋگە تالپىنۋدا.

حقكو-لىقتارىندا ۇزىن-سونار كەزەك. مىڭداعان رەسەيلىكتەر جىلدام جسن جاساتۋ ءۇشىن جۇگىرىپ ءجۇر. جۇگىرىپ جۇرگەن رەسەيلىكتەرگە قۇجاتتى قالاي راسىمدەۋ كەرەكتىگىن اناۋ-مىناۋ ەمەس، قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ ءوزى بارىپ ءتۇسىندىرىپ الەك. بۇل نەتكەن جاناشىرلىق؟!

مينيستر مۋسين ءوزىنىڭ پاراقشاسىنا بىلاي دەپ جازبا قالدىردى:

"بۇگىن ءبىز استانا اكىمدىگىمەن بىرگە «جاستار» سارايىندا جەدەل تۇردە اشىلعان حالىققا قىزمەت كورسەتۋ ورتالىعىندا بولىپ، جاعدايدى ءوز كوزىممەن كورىپ قايتتىم.

اتالعان حالىققا قىزمەت كورسەتۋ ورتالىعى نەگىزگى ورتالىقتارعا تۇسەتىن جۇكتەمەنى ازايتۋ ءۇشىن اشىلعان بولاتىن. قازىرگى ۋاقىتتا ءوز وتانداستارىمىزعا ءبىرىنشى كەزەكتە، كەدەرگىسىز، شتاتتىق رەجيمدە قىزمەت كورسەتىلىپ جاتقانىن اتاپ وتكىم كەلەدى.

رەسەي فەدەراتسياسىنان كەلگەن ازاماتتار سانىنىڭ كوپتىگىنەن، وپەراتورلار ۇزىن-سونار كەزەكتە تۇرعانداردى قابىلداپ ۇلگەرمەۋدە.

بۇگىنگى كۇنگە دەيىن جاعداي بىلاي ءوربىدى: رەسەي ازاماتتارى حقكو-عا كەلىپ، قۇجاتتارىن ۇسىنادى، ولاردىڭ دەرەكتەرى بازاعا ەنگىزىلگەننەن كەيىن قايتىپ، ەكىنشى كۇنى جسن الۋ ءۇشىن حقكو-عا قايتا بارادى. بۇل ولاردىڭ دا، حقكو وپەراتورلارىنىڭ دا كوپ ۋاقىتىن الادى. سونىمەن قاتار، عيماراتتاعى ادام سانىنىڭ كوپتىگىنە سەبەپ بولادى.

ەندى جسن الۋعا ءوتىنىش بەرگەن ادامدارعا ەكىنشى رەت كەلۋدىڭ قاجەتى جوق، جسن ولاردىڭ تەلەفون نومىرىنە 1414 قىزمەتىنەن سمس-حابارلاما تۇرىندە جىبەرىلەتىن بولادى. بۇل دايىن جسن الۋ ءۇشىن كەزەكتە تۇرعان بارلىق حقكو كليەنتتەرىنە قاتىستى. بۇل ءوز كەزەگىندە ادامداردىڭ حالىققا قىزمەت كورسەتۋ ورتالىقتارىندا شوعىرلانباۋىنىڭ الدىن الادى.

بۇگىن ءبىز ەكىنشى دەڭگەيلى بانكتەرگە جسن دەرەكتەر بازاسىندا بەرىلەتىنى تۋرالى اقپاراتتى جەتكىزەمىز، ءنومىردى ەنگىزگەن كەزدە كەز-كەلگەن ازامات تۋرالى اقپارات اۆتوماتتى تۇردە شىعاتىن بولادى.

حقكو قىزمەتكەرلەرىنە ەشتەڭەگە قاراماستان، جەدەل تۇردە قىزمەت اتقارىپ جاتقاندارى ءۇشىن العىس ايتقىم كەلەدى.
ءبىز جاعدايدى باقىلاۋدا ۇستايمىز".

باعدات ءمۋسيننىڭ استانالىق حقكو-عا بارىپ، رەسەيلىكتەرگە رەسەي تىلىندە قۇجاتتى راسىمدەۋگە قاتىستى تۇسىندىرمە ايتىپ تۇرعان ۆيدەوسى جاريالاندى. بۇل كوپشىلىكتىڭ اشۋىن تۋدىرعان جايت بولدى. "رەسەيگە قازاقتار ءدال وسىلاي اعىلسا، ءبىر مينيستر كەلىپ تۇسىندىرمەك تۇگىلى، جينالعان حالىقتى كۇزەتشى قۋىپ شىعار ەدى" دەيدى كوپشىلىك.

مينيستر ءمۋسيننىڭ سبەر-مەن كەلىسىمدى بارىنشا جارنامالاپ، ارتىنشا ۋكراينا سوعىسىنان كەيىن ىسكە اسپاي قالعانى تاعى بار. ەندى مىنە رەسەيلىكتەر ءۇشىن ءدارىس وقىپ ءجۇر. بۇنى قالاي تۇسىنۋگە بولادى؟ قۇجات راسىمدەۋدى تۇسىندىرەتىن مينيستردەن باسقا قىزمەتكەر جوق پا؟ وزگە ەلدەن كوشىپ كەلگەن قانداسقا بارىپ، قۇجات راسىمدەۋدى تۇسىندىرمەگەن مينيسترلەر، رەسەيلىكتەر كەلگەندە ەلپەڭدەپ جۇرگەنى قالاي؟! بۇ قالاي، رەسەيدەن قاشقىن كەلدى مە، قوجايىن كەلدى مە؟..قوعامدا سۇراق كوپ، مينيستردە جاۋاپ جوق!

Abai.kz

24 پىكىر

ۇزدىك ماتەريالدار

قۇيىلسىن كوشىڭ

قانداستار قازاققا، قازاقستانعا نە بەردى؟

رايىس ءارىپجانۇلى 2532
الاشوردا

تۇركىلىك تەك جانە تۇركى-موعول بىرلىگى

ءجادي شاكەنۇلى 1559
قاۋىپ ەتكەننەن ايتامىن

گازدىڭ گەوساياسي «گەموررويى»

ءامىرجان قوسان 1817