جۇما, 19 شىلدە 2024
اقمىلتىق 3608 46 پىكىر 19 جەلتوقسان, 2022 ساعات 12:24

بۇۇ قارارلارى: قازاقستان بيلىگى ۋكراينانى ەشقاشان قولداعان جوق!

بۇۇ رەسەيدىڭ ۋكرايناداعى باسقىنشىلىق سوعىسىن ايىپتاپ، بىرنەشە مارتە رەزوليۋتسيا مەن باسقا دا قارارلار قابىلدادى. كەشەگى كۇنگە دەيىن رەسەيدىڭ اگرەسسياسىنا بەيتاراپ ۇستانىمدا بولعان قازاقستان 15 جەلتوقساندا ءوزىنىڭ رەسەي جاعىندا ەكەنىن كورسەتتى. بۇۇ-نىڭ وسىعان دەيىن قابىلداعان قارارلارىنىڭ حرونولوگياسىن ۇسىنامىز.

2 ناۋرىز. بۇۇ باس اسسامبلەياسىنىڭ توتەنشە ارنايى سەسسياسىندا رەسەيدىڭ ۋكرايناعا جاساپ وتىرعان باسقىنشىلىق ارەكەتىن ايىپتايتىن قارار قابىلداندى. قاراردا: «رەسەي سوعىس قيمىلدارىن توقتاتسىن، ۋكراينانىڭ حالىقارالىق مويىندالعان شەكاراسىنان، ونىڭ ىشىندە 2014 جىلى اننەكتسيالانعان قىرىمنان اسكەرىن الىپ كەتسىن»، دەگەن تالاپ قويىلدى. 141 مەملەكەتىنىڭ كوپشىلىگى قولداپ داۋىس بەردى. 35 مەملەكەت داۋىس بەرۋدەن قالىس قالدى، ونىڭ ءىشىندە قازاقستان بار. بەس ەل: رەسەي فەدەراتسياسى، بەلارۋس، سولتۇستىك كورەيا، سيريا جانە ەريترەيا قارسى داۋىس بەردى.

24 ناۋرىز. بۇۇ باس اسسامبلەياسى ۋكراينانىڭ بەيبىت حالقى مەن ينفراقۇرىلىمىن قورعاۋدى، سونداي-اق، ەلدەگى سوعىستى دەرەۋ توقتاتۋدى تالاپ ەتەتىن قارار قابىلدادى. بۇل شەشىمنىڭ زاڭدى كۇشى جوق تەك ۇسىنىس رەتىندە جۇرەدى. 140 ەل داۋىس بەردى. قازاقستان بۇل جولى دا قالىس قالعان 38 ەلدىڭ ىشىنە كىردى. بەس ەل: بەلارۋس، سولتۇستىك كورەيا، سيريا جانە ەريترەيا، رەسەي قارسى بولدى.

قۇجاتتا بەيبىت ازاماتتاردى، مەديتسينالىق قىزمەتكەرلەردى، گۋمانيتارلىق ۇيىمداردىڭ قىزمەتكەرلەرىن، سونداي-اق، جۋرناليستەردى قورعاۋ قاجەتتىلىگى تۋرالى ايتىلدى. رەسەيدىڭ كەلتىرگەن زالالى سىنالدى.

7 ءساۋىر. بۇۇ باس اسسامبلەياسى رەسەيدىڭ ۋكرايناعا باسىپ كىرگەنىنەن باستاپ، ادام قۇقىقتارىن ورەسكەل بۇزعانى ءۇشىن اگرەسسوردى ادام قۇقىقتارى جونىندەگى كەڭەستىڭ مۇشەلىگىنەن شەتتەتۋگە شاقىراتىن قارار قابىلدادى. 93 ەل قولداپ داۋىس بەردى، 58 ەل قالىس قالدى، 24 ەل قارسى داۋىس بەردى. رەسەيدىڭ ادام قۇقىقتارى جونىندەگى كەڭەس مۇشەلىگىنەن شىعۋىنا قازاقستاندى قوسقاندا ورتالىق ازيانىڭ 3 ەلى: قىرعىزستان، تاجىكستان، وزبەكستان قارسى بولدى. تۇركىمەنستان داۋىس بەرۋگە قاتىسپادى.

12 قازان. بۇۇ باس اسسامبلەياسى توتەنشە ارنايى سەسسياسىندا رەسەيدىڭ دونەتسك، لۋگانسك، زاپوروجە جانە حەرسون وبلىستارىن اننەكسيالاۋ ارەكەتىن ايىپتايتىن قاراردى كوپشىلىكتىڭ قولداۋىمەن ماقۇلدادى. قاراردى قابىلداۋعا بۇۇ-عا مۇشە 193 مەملەكەتتىڭ 143-ءى قاتىستى. رەسەي، بەلارۋسسيا، سولتۇستىك كورەيا، سيريا جانە نيكاراگۋا قارسى داۋىس بەردى. قىتاي، وڭتۇستىك افريكا، ارمەنيا، قازاقستان جانە تمد-نىڭ بىرقاتار ەلدەرى، بارلىعى 35 ەل، قالىس قالدى.

14 قاراشا. بۇۇ باس اسسامبلەياسى رەسەي ۋكرايناعا سوعىس اشىپ، كەلتىرگەن زالالى ءۇشىن وتەماقى تولەۋگە مىندەتتى دەپ ەسەپتەيتىن قارار قابىلدادى. بۇل شەشىمدى 94 مەملەكەت قولدادى. بەلارۋس، كۋبا، يران، زيمبابۆە تاعى باسقا دا 14 ەل قارسى بولدى. اسسامبلەيانىڭ 73 مۇشەسى، سونىڭ ىشىندە قازاقستان، قىرعىزستان، وزبەكستان، تاجىكستان، ارمەنيا سەربيا، برازيليا جانە ءۇندىستان قالىس قالدى. پوستكەڭەستىك ەلدەردەن تۇرىكمەنستان مەن ءازىربايجان داۋىس بەرۋگە قاتىسقان جوق.

15 جەلتوقسان. بۇۇ باس اسسامبلەياسى رەسەيدەن اگرەسسيانى توقتاتۋ جانە ۋكراينانىڭ بۇكىل اۋماعىنان اسكەرىن الىپ شىعۋدى تالاپ ەتكەن رەزوليۋتسيانى قابىلدادى. «ۋاقىتشا وككۋپاتسيالانعان قىرىم اۆتونومدى رەسپۋبليكاسى مەن سەۆاستوپولدەگى ادام قۇقىقتارى تۋرالى» قۇجاتتى 82 مەملەكەت قولداپ، 80-ءى قالىس قالدى. رەسەيدى قولداپ، قۇجاتقا قارسى داۋىس بەرگەندەر قاتارىندا قازاقستان دا بار. بارلىعى 14 مەملەكەت قارسى داۋىس بەردى: رەسەي، بەلارۋس، قازاقستان، قىتاي، يران، سولتۇستىك كورەي، سيريا.

نۇرگەلدى ابدىعانيۇلى

Abai.kz

46 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1281
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 2010
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 2068