تۇنەۋگۇنى تۇركيا پرەزيدەنتى رەجەپ تايىپ ەردوعان جاھاندىق باق پەن ساياسي كەڭىستىكتى ءبىر شۋلاتتى. بۇل تۋرالى Mezgil.kz اقپاراتتىق پورتالى جازدى. 

ەردوعان: پالەستينانى قورعاۋ ءۇشىن يزرايلگە اسكەر كىرگىزەمىز!

تۇركيا پرەزيدەنتى ەردوعاننىڭ سوزدەرىن «Halk» تەلەارناسى بىلاي دەپ كەلتىرەدى: «ءبىز قاراباققا كىرگەنىمىز سەكىلدى، ليۆياعا كىرگەنىمىز سەكىلدى يزرايلگە دە اسكەر كىرگىزە الامىز! مۇمكىن ەمەس ەشتەڭە جوق. بىزگە وسى قادامدى جاساۋ ءۇشىن كۇشتى بولۋىمىز كەرەك»، - دەدى ەردوعان.

ازەربايجان مەن ليۆياداعى تۇرىك اسكەرى ءھام يزرايلگە سەس!

وسىلايشا، ەردوعان پالەستينانى كەز كەلگەن جولمەن قولداۋعا دايىن ەكەنىن تاعى ءبىر رەت مالىمدەدى.

2020 جىلعى قاراباق سوعىسىنان كەيىن قاراباقتاعى ازەربايجان مەن ارمەنيا جانە ارميان سەپاراتيستەرى تاراپىنان اسكەري ءىس-قيمىلدار مەن وق اتۋدى بولدىرماۋ ماقساتىندا «رەسەي-تۇركيا» بىرلەسكەن مونيتورينگ ورتالىعى قۇرىلعانى بەلگىلى.

2021 جىلدىڭ قاڭتارىندا تۇركيا پارلامەنتى وسى بىتىمگەرلىك ميسسياعا بارعان تۇركيا اسكەرىن ازەربايجان جەرىندە تاعى ءبىر جىلعا قالدىرۋ تۋرالى شەشىم قابىلداعان.

ال 2023 جىلدىڭ قاراشاسىندا تۇركيا پارلامەنتى ليۆياداعى تۇرىك اسكەري ميسسياسىن 24 ايعا، ياعني تاعى 2 جىلعا قالدىرۋ تۋرالى شەشىمدى بەكىتكەن. ول جەردە تۇركيا مەن ۇكىمەت اراسىندا قول قويىلعان اسكەري ىنتىماقتاستىق تۋرالى ۇلتتىق كەلىسىم بار.

ەردوعان: ءاي، ابباس، ەشكىمنەن قورىقپاي، بىزگە كەل!

ەردوعان سونداي-اق، پالەستينا پرەزيدەنتى ماحمۇد ابباستىڭ جىگەرسىزدىگىن سىناپ مالىمدەمە جاسادى. رەنىشىن ءبىلدىردى.

تۇركيا پرەزيدەنتى ەردوعان پالەستينا پرەزيدەنتى ابباستى تۇركيا پارلامەنتىنە شاقىرىپ، ءسوز سويلەۋ قۇقىعىن ۇسىنعان. يدەيا بويىنشا نەتانياحۋ اقش كونگرەسسىندە بايانداما جاساپ جاتقان ساتتە، پالەستينا باسشىسى ابباس تۇركيا پارلامەنتىندە سويلەپ جاتۋى ءتيىس ەدى. الايدا ماحمۇد ابباس ناقتى جاۋاپ قاتپاي، كەلە الماعان.

«ارينە بارلىعىن تۇسىنەمىن. ءبىز ابباستى شاقىردىق، الايدا ول ناقتى جاۋاپ بەرمەدى. ابباس مىرزا رەنجىمەسىن، دەي-تۇرا ول بىزدەن كەشىرىم سۇراۋى ءتيىس شىعار. پالەستيناداعى باۋىرلارىمىز بەن قارىنداستارىمىزدىڭ ءسوزىن سويلەپ، ءۇنىن الەمگە ەستىتىپ ءجۇرمىز. ءبىزدىڭ پارلامەنت ەسىگى ادىلدىكتى جاقتايتىندارعا ارقاشان اشىق»، – دەيدى ەردوعان.

ابباس ەردوعاننىڭ اقىلىن تىڭدادى!

پالەستينا كوشباسشىسى ەردوعاننىڭ سىنىنا قۇلاق استى. پالەستينا كوشباسشىسى ماحمۋد ابباس تۇركيا پارلامەنتىندە ءسوز سويلەۋگە نيەتتى، دەپ مالىمدەدى انكاراداعى اۆتونوميا ەلشىسى فاەد مۋستافا.

ديپلوماتتىڭ ايتۋىنشا، پالەستينا باسشىسى تۇركيا پارلامەنتىنىڭ سپيكەرى نۋمان كۇرتۇلمۋشتان رەسمي شاقىرۋ الدى. قازىرگى ۋاقىتتا ديپلوماتيالىق ارنالار ارقىلى ابباستىڭ ءسوز سويلەۋ كۇنىن انىقتاۋ جۇمىستارى جۇرگىزىلۋدە.

Abai.kz