پرەزيدەنت اكىمشىلىگىنىڭ
وتىنىشتەردى قاراۋدى باقىلاۋ
ءبولىمىنىڭ مەڭگەرۋشىسى
ق.ب. جايساڭباەۆ مىرزاعا!

قۇرمەتتى قاناتبەك باقىتۇلى!

مەنىڭ «ە-ءوتىنىش» اقپاراتتىق جۇيەسى ارقىلى مەملەكەتتىك كەڭەسشى ەرلان قارين مىرزانىڭ اتىنا جولداعان «ەرلان قارينگە شىرەنۋگە دە، شالقۋعا ءالى ەرتە!» جانە «ءسىزدىڭ تۇبىڭىزگە قۇلىباەۆ پەن ءماسىموۆ جەتسە، توقاەۆتىڭ تۇبىنە قارين جەتەيىن دەپ تۇر…» اتتى ماقالالارىم مەن حاتتارىم ءوز يەسىنە جەتكەن جوق.

ءبىر ەمەس، ەكى مارتە جولدادىم. ەكەۋىندە دە ەرلان تىنىمبايۇلىنىڭ ەمەس، قازاقستان رەسپۋبليكاسى پرەزيدەنتىنىڭ ىشكى ساياسات ماسەلەلەر جانە كوممۋنيكاتسيالار جونىندەگى كومەكشىسى رۋسلان جەلدىباي مەن پرەزيدەنت اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى ايجان شاينازاروۆانىڭ اتىنا تىركەلىپ، ارى قاراي قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆادان بىراق شىقتى...

ەرلان قارين مىرزانىڭ اتىنا جولدانعان بۇل حاتتاردىڭ ءبارى تيمۋر قۇلىباەۆ پەن كارىم ءماسىموۆ جاعىنان ۋرۋزپاتسيالانعان قازاقستانعا قاتىستى دۇنيەلەر.

ال، «ۋزۋرپاتسيالانعان مەملەكەت» تۋرالى بۇل ماسەلەنى شەشۋ رۋسلان جەلدىبايدىڭ دا، ايجان شاينازاروۆانىڭ دا، ايدا بالاەۆانىڭ قۇزىرەتىنە كىرمەيدى جانە ولاردىڭ دەڭگەيىندەگى شارۋا ەمەس!

ەرلان قاريننىڭ ءجونى بولەك، «باس يدەولوگ» دەگەن اتى بار، قازاقستان رەسپۋبليكاسىنىڭ پرەزيدەنتىنە ىشكى ساياسات سالاسى بويىنشا ستراتەگيالىق ۇسىنىستاردى تۇجىرىمدايتىن – سول كىسى.

باسىن اشىپ ايتايىن، مەنىڭ مەملەكەتتىك كەڭەسشىگە جولداعان بۇل دۇنيەلەرىمدى وزگە لاۋازىم يەلەرىنە تىركەدىڭ دەپ، ءسىزدى جانە ءسىزدىڭ ورىنباسارىڭىز بولات بايكەنوۆ مىرزانى دا ەشقاشان كىنالامايمىن!

سەبەبى، تيمۋر قۇلىباەۆ پەن كارىم ءماسىموۆ جاعىنان ۋزۋرپاتسيالانعان قازاقستانداعى باسقارۋ جۇيەسىنىڭ تابيعاتى سولاي: ءبىز سەكىلدى وتە بەلسەندى، پاتريوت ازاماتتاردىڭ مەملەكەت پەن ۇلتتىڭ تاعدىرىنا, پرەزيدەنتتىڭ تاريحي ورنىنا، ساياسي رەفورماعا، مەملەكەتتىك باسقارۋ جۇيەسىنە قاتىستى شىر-پىر بولىپ جازعان حاتتارى پرەزيدەنتكە جەتپەيدى.

ءبىزدىڭ مۇنداي حاتتارىمىزدى پرەزيدەنت اكىمشىلىگى كەز-كەلگەن مينيسترلىكتەرگە لاقتىرا سالادى. ماڭىزىن ءتۇسىنىپ تۇرىپ، كەلىپ شىعار كەساپاتىن ءبىلىپ تۇرىپ، ارى قاراي وتكىزبەيدى...

كەرىسىنشە، پرەزيدەنتكە مينيسترلىكتىڭ دەڭگەيىندە-اق شەشۋگە بولاتىن «ناسىباي» نەمەسە كوشەدە لاعىپ جۇرگەن بىرەۋلەردىڭ «ەلتاڭبانى وزگەرتۋ» تۋرالى تۇككە تۇرعىسىز ساندىراقتارى توقتاۋسىز، كەدەرگىسىز جەتەدى.

بۇرىن دا سولاي بولعان، قازىر دە سولاي!

ەسىڭىزدە بولسىن، ۋزۋرپاتسيالانعان مەملەكەتتە پرەزيدەنت ساناۋلى عانا ادامداردىڭ بلوكوداسىندا قالادى!

مەنىڭ  جوعارىداعى «تۇبىنە جەتەيىن دەپ تۇر…» دەگەن حاتىمداعى تۇڭعىش پرەزيدەنتكە قاراتا: «قازىر قاسىم-جومارت كەمەلۇلى دا كەشەگى ءسىز سەكىلدى ەرلان قاريننىڭ ايتقانىمەن عانا جۇرەتىن ساناۋلى عانا توبىردىڭ بلوكوداسىندا قالدى...»، - دەۋىمنىڭ سەبەبى – وسى، اينالايىن!

ەندى ءوزىڭىز ايتىڭىزشى، بەس اي بويى جازعان حاتتارىمنىڭ بىردە-بىرەۋى جەتپەسە، بۇل پرەزيدەنتتى بلوكودادا قالدىرعان ەمەي نەمەنە؟!

ەگەر، مەملەكەت پەن ۇلتقا شىنىمەن جانى اشىسا، پرەزيدەنتتىڭ ەرتەڭگى تاريحي ورنى جونىندە كۇيىنسە، ەرلان قارين وسىناۋ بەس اي بويى جازىلىپ جاتقان حاتتارعا ءوز اتىنان ءبىر اۋىز جاۋاپ بەرەتىن ەدى عوي! كورىپ وتىرسىز، مەملەكەتتىك كەڭەسشىمىز جۇمعان اۋزىن اشقان جوق!

ويتكەنى، ول ءوزى باس بولىپ جوباسىن جاساعان 2022 جىلعى «كونستيتۋتسيالىق رەفورمانىڭ» قازاقستاندى تيمۋر قۇلىباەۆ پەن كارىم ءماسىموۆتىڭ ۋزۋرپاتسياسىنان ءبىر سۇيەم العا الىپ شىعا الماعانىن وتە جاقسى بىلەدى...

قادىرلى قاناتبەك باۋىرىم!

جانە ءبىر مارتە قايتالاپ ايتايىن، مەنىڭ جوعارىداعى ەرلان قارين تۋرالى جازعان ماقالالارىم مەن وعان جازعان حاتتارىمنىڭ ءوز يەسىنە جەتپەي جاتقانى ءۇشىن ءسىز دە، ءسىزدىڭ ورىنباسارىڭىز بولات بايكەنوۆ مىرزا دا كىنالى ەمەس! مەنىڭ سىزدەرگە وكپەم دە، رەنىشىم دە جوق!

مۇنىڭ ءبارى – تيمۋر قۇلىباەۆ پەن كارىم ءماسىموۆتىڭ, ودان بەرگى جەردە ەرلان قارين باس بولىپ جوباسىن جاساعان 2022 جىلعى «كونستيتۋتسيالىق رەفورمانىڭ» نەگىزىندە قالىپتاسقان بۇگىنگى جۇيەنىڭ كەسىرىنەن بولىپ وتىرعان كەسەپاتتار!

بۇل ۋزۋرپاتسيالانعان جۇيە قاسىم-جومارت كەمەلۇلىن تۇڭعىش پرەزيدەنت باتقان قۇيعا باتىرىپ بارا جاتىر.

مەن قازاقستاننىڭ ۋزۋرپاتسيالانعان جۇيەدە قالعانىن، قاسىم-جومارت توقاەۆتىڭ «ەكىنشى نازارباەۆ» بولعانىن ەشقاشان قالامايمىن!

ءسوز سوڭىندا سىزگە ايتار ءبىر-اق ءوتىنىشىم بار، مەنىڭ ەرلان قارين مىرزانىڭ اتىنا جازعان حاتتارىمدى باسقا ءبىر لاۋازىمدى تۇلعالارعا ەمەس، تەك ەرلان تىنىمبايۇلىنىڭ وزىنە عانا تىركەپ وتىرىڭىزشى!

سوندا، ءبىرىنشى قۇدايدىڭ، سوسىن پرەزيدەنتتىڭ، بولاشاقتا بالا-شاعامىزدىڭ الدىندا ءسىز ەكەۋمىزدىڭ بەتىمىز جارىق، ارىمىز تازا بولادى!

ال، ەرلان تىنىمباپيۇلى مەنىڭ حاتتارىم تۋرالى قانداي شەشىمدەر قابىلدايدى، ول – ەرەكەڭنىڭ ءوزىنىڭ ارى مەن دەڭگەيىنە بايلانىستى شارۋا! نە ىستەيمىن دەسە، ءوزى ءبىلسىن! بىراق، كورەسىز، ەرتەڭ وسىنىڭ بارىنە باسىمەن جاۋاپ بەرەتىن بولادى!

قۇرمەتپەن، اۋىت مۇقيبەك،

«ەرەن ەڭبەگى ءۇشىن» مەدالىنىڭ، «قۇرمەت» وردەنىنىڭ يەگەرى

Abai.kz