وزدەرىڭىز بىلەسىزدەر، 16 كۇنگە سوزىلعان پاريج وليمپياداسىندا 205 ەلدىڭ وكىلدەرى جۇزدەگەن جۇلدەنى ساراپقا سالدى. وسىنشاما ەلدىڭ تەك 93-ءى عانا مەدال الا الدى. قازاقستان وليمپياشىلارى 1 التىن، 3 كۇمىس، 3 قولامەن جالپى كوماندالىق ەسەپتە 43-ورىنعا تابان تىرەدى.

بۇل كورسەتكىش وسىنىڭ الدىنداعى توكيو وليمپياداسىندا العان 84-ورىنمەن (0 التىن، 0 كۇمىس، 4 قولا) سالىستىرعاندا ءسال يمانتارازىلاۋ. ال ريو-2016 ويىندارىنداعى 30-ورىن (2 التىن، 5 كۇمىس، 10 قولا) بۇل كۇندە ارمان بولىپ قالعانى راس (ونىڭ الدىنداعى جەتىستىكتەردى ەسكە الماعاننىڭ وزىندە).

قازاق سپورتىندا ىلگەرىلەۋ جوق!

دەمەك، قازاق سپورتىندا ىلگەرىلەۋدىڭ، دامۋدىڭ جوق ەكەنىن مويىنداعان ءجون، بۇل جايت وسى سالا جەتەكشىلەرىن ويلاندىرۋى، باتىل شەشىمدەر قابىلداۋعا جەتەلەۋى قاجەت. بوكس، كۇرەس، دزيۋدو سەكىلدى جۇلدەدەن ءۇمىتتى سپورت تۇرلەرىمەن قوسا سپورتتىق گيمناستيكا، كوركەم گيمناستيكا، ۇزىندىققا سەكىرۋ، بيىكتىككە سەكىرۋ، سۋ سپورتى تۇرلەرى، جەڭىل اتلەتيكا تۇرلەرى سەكىلدى سالالارعا كوپ كوڭىل ءبولۋ قاجەت. كوماندالىق سپورت تۇرلەرىندەگى جاعداي ءتىپتى سىن كوتەرمەيدى. شەتتەن ورالعان ءوز قانداستارىمىز ەل ازاماتتىعىن دەر كەزىندە الا الماي، زارىعىپ جۇرگەندە ءبىزدىڭ شەنەۋنىكتەر كەنيادان الىپ كەلىپ، لەزدە قازاقستان ازاماتتىعىن بەرە قويعان «لەگيونەر جەلاياقتارىمىز» 17-ورىننان اسا الماي ءجۇر، سولاردىڭ ورنىنا ءوز ۇل-قىزدارىمىزدى تاربيەلەسەك، ايتەۋىر كوز قۋانىش بولماس پا ەدى. پالەندەي جەتىستىككە جەتپەسە دە وليمپيادانىڭ پاريج تورىندەگى جابىلۋ سالتاناتىندا ەل تۋىن تىك ۇستاپ شىققان باتىرحان تولەۋعالي مەن ەلجانا تانيەۆانى كورىپ، كوڭىل شالقىعان جوق پا؟.. جالپى سپورت سالاسىنا رەفورما كەرەك، ۇلتتىق ۇستانىم، وتانشىلدىق كوزقاراس قاجەت.

ءمينيستردىڭ قورىتىندىسى: نە ايتىلدى؟

بۇگىن قر سپورت جانە تۋريزم ءمينيسترى ەرمەك مارجىقپاەۆ پاريج وليمپياداسىنىڭ قورىتىندىسىنا ارنالعان القا وتىرىسىن وتكىزدى. بۇل تۋرالى مينيسترلىكتىڭ تەلەگرام ارناسى جازدى.

وتىرىسقا پرەزيدەنت اكىمشىلىگىنىڭ، ۇكىمەت اپپاراتىنىڭ، دەپۋتاتتىق كورپۋستىڭ وكىلدەرى، سالا ارداگەرلەرى، وليمپيادا جۇلدەگەرلەرى، قۇرمەتتى باپكەرلەر، وڭىرلىك باسقارمالاردىڭ، فەدەراتسيالاردىڭ، ۆەدومستۆوعا باعىنىستى ۇيىمداردىڭ باسشىلارى، سونىمەن بىرگە باق وكىلدەرى قاتىسقان.

ءبىز اتالعان جيىندا مينيستر مارجىقپاەۆتىڭ نە دەگەنىن Abai.kz وقىرماندارىنىڭ تالقىسىنا ۇسىنعاندى ءجون كوردىك...

مينيستر بايانداماسىن وليمپيادادا جۇلدە العان سپورتشىلار تۋرالى سوزبەن باستادى. ونان سوڭ مينيستر مارجىقپاەۆ: «وزدەرىڭىز بىلەسىزدەر، كەشە عانا مەملەكەت باسشىسى قاسىم-جومارت كەمەلۇلى توقاەۆ وليمپيادا جۇلدەگەرلەرىمەن كەزدەستى. سپورتشىلار مەن باپكەرلەردى مەملەكەتتىك ناگرادالارمەن ماراپاتتادى. سپورتقا جۇيەلى قولداۋ كورسەتىپ، جان-جاقتى دامىعان، سالاۋاتتى ۇلت قالىپتاستىرۋ ماڭىزدى ەكەنىن اتاپ ءوتتى. جەكەلەگەن سپورت تۇرلەرى بويىنشا ناتيجەنى جاقسارتۋ كەرەك. ءبىز ءۇشىن ءداستۇرلى سانالاتىن سپورت تۇرلەرى بار. سولاردان دايىندىق تومەن، ناتيجە ناشار بولىپ شىقتى. بىلتىر حانچجوۋدا ازيا ويىندارى ءوتتى. ازياداعا قاتىسقان سپورتشىلاردىڭ 80 پايىزى بيىل پاريجگە باردى. ال حانچجوۋدان ۇلتتىق قۇرامانىڭ قانداي ناتيجەمەن كەلگەنى بارىمىزگە بەلگىلى. تاريحتاعى ەڭ ناشار ازيادا بولدى. سوعان قاراماستان از ۋاقىت قالسا دا، جاعداي جاسادىق. بىراق پاريجدەگى ناتيجەنى وزدەرىڭىز ءبىلىپ وتىرسىزدار», - دەدى.

مينيستر وليمپياداداعى بوكسشىلاردىڭ ناتيجەسى تۋرالى بۇيدەدى:

«بوكستان ەرلەر قۇراماسى بارلىق سالماق دارەجەسىندە ونەر كورسەتتى. مىندەتتەمەلەر  بويىنشا ولار 1 التىن، 1 كۇمىس جانە 1 قولا مەدال الۋعا ۋادە بەرگەن. كوماندا تەك 1 كۇمىس جەڭىپ الدى. ەكىنشى ويىن قاتارىنان سپورتشىلار بىردە-ءبىر التىنعا قول جەتكىزە المادى. قازاقستاندىق بوكس مەكتەبى ءوزىنىڭ جەتەكشى پوزيتسيالارىمەن الەمدىك سپورت ارەناسىندا ارقاشان داڭقتى بولدى. ءبىزدىڭ بوكسشىلار 1996 جىلدان بەرى جارىستارعا قاتىسىپ، بارلىعى 22 مەدال جەڭىپ الدى: 7 التىن، 7 كۇمىس جانە 8 قولا. بۇل وليمپيادادا بوكستان ۇلتتىق قۇراما ۇزدىك ناتيجە كورسەتە المادى!»، - دەدى.

ونان سوڭ جەڭىل اتلەتيكا ناتيجەلەرى بويىنشا سويلەدى:

«جەڭىل اتلەتيكا كومانداسىنىڭ 8 ليتسەنزياسى بولدى. العان مىندەتتەمەلەرى بويىنشا كوماندا 1 كۇمىس مەدالدى ۋادە ەتكەن ەدى، شىن مانىندە، سپورتشىلاردىڭ ەڭ جاقسى ناتيجەسى 9-ورىن عانا بولدى.

2000 جىلدان بەرى, توكيو ويىندارىن قوسپاعاندا، سپورتشىلار تۇراقتى تۇردە جۇلدەلى ورىندارعا يە بولدى. بارلىعى 87 سپورتشى جارىستارعا قاتىسىپ، 5 مەدال جەڭىپ الدى: 2 التىن، 1 كۇمىس جانە 2 قولا. وسى مەدالدىڭ 3-ەۋى ءبىر سپورتشىعا عانا – ولگا رىپاكوۆاعا تيەسىلى.

نادەجدا دۋبوۆيتسكايانىڭ بۇل ماۋسىمداعى ەڭ جاقسى كورسەتكىشى – 1,92 م. ەدى. پاريجدە وتكەن ىرىكتەۋ كەزەڭىندە ول نەبارى 1,83 م. بيىكتىكتى باعىندىردى. ال ماتۆەەۆا ەليزاۆەتا جاقسىراق ناتيجە كورسەتە الار ەدى، سەبەبى بۇرىن ول 1,92 م. كورسەتكىشتى باعىندىرعان بولاتىن. بۇل ويىنداردا ول 1,88 م. عانا سەكىردى. جەڭىل اتلەتيكادان جاقسى ناتيجە كۇتكەن ەدىك، ءۇمىتىمىز اقتالمادى!»، - دەدى.

مينيستر ەركىن كۇرەس ناتيجەلەرى تۋرالى:

ەرمەك مارجىقپاەۆ ەركىن كۇرەس كومانداسى قولا مەدال الۋعا ۋادە بەرگەنىن اتاپ ءوتتى. الايدا سپورتشىلار شيرەك فينالعا وتە الماي، ءبىرىنشى اينالىمنان شىعىپ قالدى. ءتىپتى مەدال جەڭىپ الۋ جاعىنان ەڭ ءساتسىز دەگەن توكيو وليمپياداسىندا قولا مەدال بولعان ەدى.

«تاريحتا العاش رەت ايەلدەر كۇرەسىنەن سپورتشىلار ويىندارعا قاتىسقان جوق. بۇرىن بىزدە ءداستۇرلى تۇردە جاقسى پوزيتسيالار بولعان»، - دەدى مينيستر.

ءارى قاراي مينيستر ەرمەك مارجىقپاەۆ وڭىرلەردىڭ جاعدايىنا توقتالدى.

«ۇلتتىق قۇراماعا 17 ءوڭىردىڭ سپورتشىلارى كىردى. الماتى (17), استانا (14) جانە شىمكەنت (12) وكىلدەرى كوپ جولداماعا يە بولدى. ال قوستاناي، ۇلىتاۋ جانە ماڭعىستاۋ وبلىستارىنىڭ سپورتشىلارى بىردە-ءبىر ليتسەنزيا العان جوق. جۇلدەگەر سپورتشىلار كەلەسى وبلىستاردان شىقتى: جامبىل وبلىسى (التىن – سمەتوۆ ە.), الماتى قالاسى (كۇمىس – ن. قۇربانوۆ، 3 قولا: ع. قىرعىزباەۆ، ن. قىزايباي، ي. ساتپاەۆ جانە ا. لە), استانا قالاسى (كۇمىس –ن.ورالباي), الماتى وبلىسى (كۇمىس – د. جادىراەۆ)»، - دەپ اتاپ ءوتتى مينيستر.

ەرمەك مارجىقپاەۆ جەرگىلىكتى اتقارۋشى ورگاندار وليمپيادالىق سپورت تۇرلەرىنە باسىمدىق بەرىپ، سالانى دامىتۋ ساياساتىن قايتا قاراۋى قاجەت ەكەنىن ايتتى.

«قازىردەن باستاپ مۇددەلى تاراپتارمەن بىرگە اقپاراتتىق-ءتۇسىندىرۋ جۇمىستارىن جۇرگىزۋ كەرەك. 6 ايدان كەيىن حاربيندە 9-شى قىسقى ازيا ويىندارى وتەدى. ميلان مەن كورتينا-دامپەتستسو قالالارىندا وتەتىن 25-ءشى قىسقى وليمپيادا ويىندارىنا دا از ۋاقىت قالدى. ۇلتتىق قۇرامانىڭ دايىندىعىن كۇشەيتۋ قاجەت»، - دەدى مينيستر.

مينيستر پاريج وليمپياداسىنىڭ قورىتىندىسىنا ارنالعان القا وتىرىسىنداعى بايانداماسىن اياقتاي كەلە جوعارىدا اتاعان شارالار الداعى ۋاقىتتا جەمىسىن بەرەتىنىنە سەنىم ءبىلدىردى.

«سپورتتى باسقارۋعا، سپورتشىلاردىڭ دايىندىعىنا جاقسى اسەر ەتەدى دەپ ويلايمىن. ءبىز جاڭا وليمپيادالىق تسيكلدى قازىردەن باستادىق. الدا لوس-اندجەلەس وليمپياداسى كۇتىپ تۇر. ماڭىزدى دوداعا قازىردەن دايىندالۋ كەرەك. مينيسترلىك، فەدەراتسيالار، باپكەرلەر، اكىمدىكتەر، ۇلتتىق وليمپيادا كوميتەتى پاريجدەگى جاعدايدان ساباق شىعارىپ، ساپالى جۇمىس جۇرگىزۋى قاجەت. بۇل – بارىمىزگە ورتاق مىندەت»، - دەپ قورىتىندىلادى القا وتىرىسىن.

Abai.kz