باس پروكۋراتۋرا جەكە سوت ورىنداۋشىلارىنىڭ ءوندىرىپ الۋشىلارعا ارنالعان اليمەنتتى ۇرلاۋ فاكتىلەرىن جاريا ەتتى.

2022 جىلى پروكۋراتۋرا جەكە سوت ورىنداۋشىلارى ءوندىرىپ الۋشىلاردىڭ 1,1 ملرد تەڭگە اقشاسىن زاڭسىز يەلەنگەنىن انىقتادى.

«بورىشكەرلەردەن اقشا قاراجاتتارى اعىمداعى ەسەپشوتتارعا تۇسكەننەن كەيىن جەكە سوت ورىنداۋشىلارى ولاردى قولما-قول اقشامەن شەشىپ الىپ، بانكتىك دەپوزيتتەرىنە اۋدارعان جانە پايىز العان، جۇبايلارىنا اۋدارعان، ءوز قالاۋى بويىنشا يەلىك ەتكەن. انىقتالعان فاكتىلەر بويىنشا پوليتسەيلەر قىلمىستىق كودەكستىڭ 251-بابى (جەكە سوت ورىنداۋشىلارىنىڭ وكىلەتتىكتەرىن اسىرا پايدالانۋى) بويىنشا سوتقا دەيىنگى 16 تەرگەۋ باستادى. كەيىننەن زالالدىڭ تولىق وتەلۋىنە بايلانىستى قىلمىستىق ىستەر توقتاتىلدى»، - دەپ اتاپ ءوتتى ۆەدومستۆودان اگەنتتىكتىڭ رەسمي ساۋالىنا وراي.

وسىدان كەيىن باس پروكۋراتۋرا ادىلەت ءمينيسترىنىڭ اتىنا جەكە سوت ورىنداۋشىلارىنىڭ اعىمداعى ەسەپشوتتارىنا باقىلاۋ جۇيەسىن ەنگىزۋ ۇسىنىسىن جولدادى. جۇرگىزىلگەن تەكسەرۋلەر ناتيجەسىندە 9 جەكە سوت ورىنداۋشىسىنىڭ ليتسەنزياسىنىڭ قولدانىلۋى توقتاتىلدى جانە 55 ادام تارتىپتىك جازاعا تارتىلدى.

«جالپى، سوڭعى 2 جىلدا پروكۋراتۋرا ورگاندارىنا جەكە سوت ورىنداۋشىلارىنىڭ ءىس-ارەكەتىنە قاتىستى 6 973 شاعىم ءتۇستى. ولاردىڭ باسىم بولىگى سوت اكتىلەرىنىڭ ورىندالماۋىنا، سوت ورىنداۋشىلارىنىڭ ارەكەتسىزدىگىنە جانە ولاردىڭ بورىشكەرلەرگە شارا قولدانباۋىنا قاتىستى بولدى»، - دەدى پروكۋراتۋرادان.

Abai.kz