ۇكىمەت وتىرىسىندا وقۋ-اعارتۋ ءمينيسترى عاني بەيسەمباەۆ مەكتەپ اسحانالارىنداعى باستى ماسەلەلەردى اتادى.

بەيسەمباەۆتىڭ دەرەگىنشە، بۇگىنگى تاڭدا 1,7 ملن وقۋشى مەكتەپتەردە تەگىن ىستىق تاماقپەن قامتىلعان، بۇعان جەرگىلىكتى بيۋدجەتتەن 162 ملرد تەڭگە ءبولىندى.

ەلىمىزدەگى مەكتەپ اسحانالارىنىڭ سانيتاريالىق-ەپيدەميولوگيالىق تالاپتارعا سايكەستىگىنە قىركۇيەك-قازان ايلارىندا مونيتورينگ جۇرگىزىلدى.

- رەسپۋبليكالىق مونيتورينگ قورىتىندىلارى مەكتەپتەگى تاماقتاندىرۋدىڭ ۇيىمداستىرىلۋ ساپاسىنا قاتىستى سۇراقتاردىڭ تۋىنداۋى اتقارۋشى ورگاندار تاراپىنان ءالى دە بولسا باقىلاۋدىڭ جەتكىلىكسىزدىگىن كورسەتىپ وتىر، بۇل زاڭناما تالاپتارىنىڭ بۇزىلۋ فاكتىلەرىنەن دە بايقالىپ وتىر. دالىرەك ايتقاندا، مونيتورينگ جۇمىسىنىڭ بارىسىندا 771 بۇزۋشىلىق انىقتالعانىن اتاپ وتكىم كەلەدى، - دەدى مينيستر.

سونداي-اق مينيسترلىك مەكتەپتە تاماقتاندىرۋدى ۇيىمداستىرۋ بويىنشا جەرگىلىكتى اتقارۋشى ورگانداردىڭ جۇمىسىنا كەشەندى باعالاۋ جۇرگىزدى.

- باعالاۋ كەزىندە تاماقتاندىرۋ ساپاسىنا جۇرگىزىلگەن مونيتورينگ ناتيجەلەرى، اسحانالاردىڭ قاجەتتى ماتەريالدىق-تەحنيكالىق جابدىقتالۋى، 1 وقۋشىعا شاققانداعى وڭىرلەردەگى تاماقتانۋ قۇنى، اتا-انالار اراسىندا جۇرگىزىلگەن ساۋالناما ناتيجەلەرى ەسكەرىلدى. ماسەلەن، جامبىل، ماڭعىستاۋ، الماتى، اتىراۋ وبلىستارىنىڭ جانە شىمكەنت قالاسى اكىمدىكتەرىنىڭ تاراپىنان مەكتەپتەردە ساپالى تاماقتانۋدى ۇيىمداستىرۋعا ءتيىستى دەڭگەيدە كوڭىل بولىنبەي وتىرعاندىعى انىقتالدى. بۇل اتالعان وڭىرلەردەگى اكىمدىكتەردىڭ تاماقتاندىرۋ ساپاسىنا ەرەكشە نازار اۋدارىپ، باقىلاۋدى كۇشەيتۋ قاجەتتىلىگىن كورسەتەدى، - دەدى عاني بەكتايۇلى.

Abai.kz