ترامپ «ءادىل بەيبىتشىلىككە» قول جەتكىزە الا ما؟
بۇگىن Abai.kz وقىرماندارىنىڭ تالقىسىنا رەسيە مەن ۋكارينا اراسىندا ءۇشىنشى جىل جالعاسىپ جاتقان سوعىسقا قاتىستى ماڭىزدى اقپاراتتارعا شولۋ ۇسىنامىز...
ترامپ «ءادىل بەيبىتشىلىككە» قول جەتكىزە مە؟
اقش-تىڭ جاڭا سايلانعان پرەزيدەنتى دونالد ترامپ ۋكراينادا ءادىل جانە تۇراقتى بەيبىتشىلىككە ۇمتىلادى. بۇل تۋرالى Fox ارناسىنا بەرگەن تۇسىنىكتەمەسىندە جاڭا اكىمشىلىكتە اقش-تىڭ ۋكراينا ماسەلەلەرى جونىندەگى ارنايى وكىلى قىزمەتىن اتقارۋى ءتيىس گەنەرال كيت كەللوگ مالىمدەدى.
«پرەزيدەنت ترامپتىڭ قانقاساپ ۇرىستى توقتاتىپ، ايماققا بەيبىتشىلىك اكەلۋدى قالايتىنى وتە-موتە ورىندى. بۇل ونىڭ حالىقارالىق ساياساتىنىڭ باستى باسىمدىعى بولىپ تابىلادى. بىراق ول ادىلەتتى بەيبىتشىلىكتى قالايدى. ول تۇراقتى بولادى. ول قاۋىپسىز بولادى»، - دەپ سەندىردى كەللوگ.
ول سونداي-اق ۋكرايناداعى ورنىقتى بەيبىتشىلىككە قول جەتكىزۋ ارەكەتتەرىنە ارنالعان مينسك پروتسەسىنىڭ «ءساتسىز اياقتالعانىن» اتاپ ءوتتى.
«ول (ترامپ) ءوزىنىڭ وداقتاستارىمەن، سونداي-اق ۆلاديمير پۋتينمەن قارىم-قاتىناسىنىڭ ماڭىزدىلىعىن تۇسىنەدى. جانە ول مۇنى اياعىنا دەيىن جەتكىزە الاتىن ادام»، - دەپ سەندىرەدى كەللوگ.
ۋكراينا كۋرسكىدە رەسەي وفيتسەرلەرىن جويدى
ۋكراينا كۋرسك قالاسىندا جوعارى لاۋازىمدى رەسەيلىك وفيتسەرلەردى جويدى. رەسەيدىڭ كۋرسك وبلىسىنداعى لگوۆو قالاسىنداعى رەسەيلىك ارميانىڭ 810-شى بريگاداسىنىڭ كوماندالىق پۋنكتىنە ۋكراينا سوققى جاساپ، ناتيجەسىندە بريگادا كومانديرىنىڭ ورىنباسارى جانە تاعى 17 رەسەيلىك اسكەري قىزمەتشى قازا تاپتى. ولاردىڭ كوپشىلىگى - شتاب وفيتسەرلەرى. سوققى 25 جەلتوقساندا جاسالدى.
سونىمەن كوزى جويىلعان جوعارى لاۋازىمدى وفيتسەر كىم؟
رەسەي ارمياسىنىڭ كۋرسك وبلىسىنداعى شتابىنا ۋكراينا HIMARS-پەن سوققى جاسادى. بۇل سوققىدان رف قك تەڭىز جاياۋ اسكەرلەرى 810-شى بريگاداسى كومانديرىنىڭ ورىنباسارى پودپولكوۆنيك ءسالىم پاشتوۆتىڭ كوزى جويىلدى.
ۋكرايناداعى سوعىس: ترامپ پۋتينمەن كەزدەسۋدى كۇتىپ وتىر
اقش-تىڭ جاڭا سايلانعان پرەزيدەنتى دونالد ترامپ رەسەيلىك ارىپتەسى ۆلاديمير پۋتينمەن ۋكرايناداعى قاقتىعىستى شەشۋ جونىندەگى كەزدەسۋدى كۇتەتىنىن ايتتى. «پرەزيدەنت پۋتين مەنىمەن تەز ارادا كەزدەسكىسى كەلەتىنىن ايتتى. سوندىقتان ءبىز مۇنى كۇتەمىز، بۇل سوعىستى توقتاتۋىمىز كەرەك»، - دەدى ول.
ەردوعان كەلىسسوز الاڭى رەتىندە ىستامبۇلدى ۇسىنادى
تۇركيا پرەزيدەنتى رەجەپ تايىپ ەردوعاننىڭ اكىمشىلىگى رەسەي مەن ۋكراينا اراسىندا قايتادان ىستامبۇلدا ءوتۋى مۇمكىن بەيبىت كەلىسسوزدەردى باستاۋ ءۇشىن قولداۋ كورسەتۋگە دايىن ەكەنىن مالىمدەدى.
قىركۇيەكتە ەردوعان «بەلگىلى ءبىر لوببيلەر» تۇركيانىڭ ۋكرايناداعى سوعىستى توقتاتۋ جونىندەگى ىستامبۇلدىق باستامالارىنا سابوتاج جاساعانىن مالىمدەدى. «ىستامبۇلداعى كەلىسسوزدەر تۇركيانىڭ بەلسەندى ءرولىنىڭ تابىستى ەكەنىن دالەلدەدى. الايدا بەلگىلى ءبىر لوببيلەر بۇل كۇش-جىگەردىڭ ءوز ماقساتىنا جەتۋىن قالامادى»، - دەدى ەردوعان اكىمشىلىگى.
ورىس-ۋراين سوعىسى: ماجارستان مەن يتاليا قانداي ويدا؟
ۆەنگريا پرەمەر-ءمينيسترى ۆيكتور وربان: «ۋكرايناداعى سوعىس 2025 جىلى اياقتالادى»، - دەپ مالىمدەدى.
وربان: «ءۇش-اق نۇسقا بار. سوعىس 2025 جىلى اياقتالادى. سوعىس نە بەيبىت كەلىسسوزدەرمەن اياقتالادى نەمەسە سوعىسۋشى تاراپتاردىڭ ءبىرى ەكىنشىسىن تولىق جويادى»، - دەپ مالىمدەدى.
ورباننىڭ ايتۋىنشا، بۇل جىل تەك ۋكراينا ءۇشىن عانا ەمەس، جالپى الەم ءۇشىن دە «شۇعىل بەتبۇرىس جىلى» بولادى.
بۇل جولى ماجارستان پرەمەرى امەريكا مەن ەۋروپا سوعىسقا شامامەن 300 ميلليارد ەۋرو جۇمساعانىن ايتتى. ونىڭ پىكىرىنشە، بۇل ءومىر ءسۇرۋ دەڭگەيىن جاقسارتۋ، كوشى-قوندى توقتاتۋ جانە جاڭا ەۋروپالىق قورعانىس جۇيەسىن قۇرۋ ءۇشىن «نەگىز» بولا الاتىنىن اتاپ ءوتتى.
يتاليا ۇكىمەتى ۋكرايناعا اسكەري كومەك كورسەتۋ تۋرالى دەكرەتتى ماقۇلدادى. يتاليا ۇكىمەتى ونىڭ ىشىندە اسكەري كومەك كورسەتۋدى تاعى ءبىر جىلعا، 2025 جىلعى 31 جەلتوقسانعا دەيىن ۇزارتۋ تۋرالى دەكرەتتى ماقۇلدادى.
رەسەي سوعىستىڭ اياقتالۋىن جوققا شىعارمايدى
«ۋكراينامەن سوعىستىڭ 2025 جىلى اياقتالۋىن جوققا شىعارۋعا بولمايدى»، - دەپ مالىمدەدى مەملەكەتتىك دۋمانىڭ قورعانىس جونىندەگى كوميتەتىنىڭ باسشىسى اندرەي كارتاپولوۆ.
كارتاپولوۆ ۆەنگريانىڭ پرەمەر-ءمينيسترى ۆيكتور ورباننىڭ ۋكرايناداعى سوعىس 2025 جىلى تاراپتاردىڭ ءبىرىنىڭ «جويىلۋىمەن» اياقتالۋى مۇمكىن دەگەن مالىمدەمەسىنە وسىلاي جاۋاپ بەردى. «وربان نە ايتقانىن بىلەدى، سوندىقتان كيەۆتىك شىرىگەن ناتسيستىك رەجيمدى جويىپ جىبەرەتىن ۋاقىت كەلدى»، - دەدى قارتاپولوۆ.
ءابىل-سەرىك الىاكبار
Abai.kz
