قازاقستاننىڭ كولىك مينيسترلىگى اقتاۋ اۋەجايى ماڭىندا ازەربايجانعا تيەسىلى AZAL ۇشاعىنىڭ اپاتقا ۇشىراۋى تۋرالى الدىن الا ەسەپتى جاريالادى. الدىن الا بايانداما 53 بەتتەن تۇرادى.

قۇجاتتا: «باياندامادا ۇسىنىلعان اقپاراتتار الدىن الا مالىمەتتەر. جانە ول بارلىق ماتەريالداردى زەرتتەۋ ناتيجەلەرى بويىنشا ناقتىلانۋى جانە تولىقتىرىلۋى مۇمكىن»، - دەلىنگەن.

سونداي-اق، ارنايى تەرگەۋ كوميسسياسى جۇمىسى اياقتالعاننان كەيىن، قورىتىندى ەسەپ دايىندالاتىنى ايتىلدى.

اپاتتىڭ بولجالدى سەبەپتەرى:

جاريالانعان الدىن الا ەسەپ بويىنشا، ەكيپاج اپاتقا دەيىن ارتقى ورىندىقتار ايماعىندا قاتتى سوققى مەن جارىلىس بولعانىن حابارلاعان.

AZAL اپاتىن زەرتتەپ جاتقان ساراپشىلار ارتقى فيۋزەلياجدا، ۇشاق قالقانىندا، تۇراقتاندىرعىشتا، سونداي-اق ۇشاقتىڭ ليفتىندە جانە رۋلىندە ءارتۇرلى ولشەمدەر مەن پىشىندەگى كوپتەگەن زاقىمدار كەلتىرگەن بوتەن زاتتاردى انىقتاعان. وسىعان ۇقساس زاقىمدار سول جاق قوزعالتقىشتا، ۇشاقتىڭ سول جاق قاناتىندا، گيدراۆليكالىق جۇيەدە، سونداي-اق ۇشاقتىڭ اگرەگاتتارى مەن جەكەلەگەن بولىكتەرىندە انىقتالدى.

سونىمەن قاتار جاريالانعان ەسەپتە گروزنىيداعى ديسپەتچەرلەر ەكيپاجعا «گروزنىيدا «كوۆەر» رەجيمىنىڭ ەنگىزىلەتىنى» تۋرالى اپات الدىندا ەسكەرتكەنى دە ايتىلعان.

اقتاۋدا قۇلاعان «Azerbaijan Airlines» كومپانياسىنىڭ ۇشاعىنان «بوگدە زاتتار» تابىلعان. «ۇشاقتىڭ سىرتىنداعى بۇلىنگەن تەسىكتەر سىرتتان بوگدە زاتتار تيگەنىن كورسەتەدى»، - دەلىنگەن باياندامادا.

ەستەرىڭىزگە سالا كەتەيىك، 25 جەلتوقساندا ازەربايجان اۋە جولدارىنىڭ باكۋ – گروزنىي باعىتىنداعى جولاۋشىلار ۇشاعى اقتاۋ اۋەجايىنىڭ ماڭىندا اپاتقا ۇشىراعان بولاتىن.

اۋەلى ۇشاق اپاتىنا باستى سەبەپ رەتىندە: ۇشاق قوزعالتقىشىنا قۇستىڭ سوعىلۋى دەپ اتاعان ەدى. بۇل رەسەي باق-تارى تاراتقان نۇسقا.

كەيىن، جەلتوقساننىڭ 26-سى كۇنى ەۋروپالىق «Euronews» تەلەارناسى ۇشاق اپاتىنا رەسەيلىك زىمىران سەبەپ بولعانىن حابارلادى. ازەربايجان اقپارات قۇرالدارىنىڭ حابارلاۋىنشا، اڭگىمە رەسەيلىك «پانتسير-س» اۋە شابۋىلىنا قارسى قورعانىس جۇيەسى تۋرالى بولىپ وتىر. بۇل نۇسقانى 27 جەلتوقساندا رەسەيدىڭ «روساۆياتسيا» اگەنتتىگىدە مويىنداعان.

ونان سوڭ قازاقستاندا اپاتقا بايلانىستى ۇكىمەتتىك كوميسسيا قۇرىلدى.

ال 28 جەلتوقساندا رەسەي پرەزيدەنتى ۆلاديمير پۋتين ازەربايجان پرەزيدەنتى يلحام اليەۆكە تەلەفون سوقتى. قوڭىراۋ بارىسىندا اقتاۋداعى ۇشاق اپاتىنا قاتىستى ماسەلەلەر تالقىلاندى. پۋتين ءازەربايجان پرەزيدەنتىنەن كەشىرىم سۇرادى. ارتىندا پۋتين قازاقستان پرەزيدەنتى قاسىم-جومارت توقاەۆقا دا تەلەفون سوعىپ، ۇشاق اپاتىنا قاتىستى كوڭىل ايتتى جانە اپاتتىڭ جاي-جاپسارىن تالقىلادى.

4 قاڭتاردا برازيليالىق تەرگەۋشىلەر اقتاۋ ماڭىندا اپاتقا ۇشىراعان ۇشاقتىڭ قارا جاشىكتەرىندەگى دەرەكتەردى زەرتتەي باستاعانى بەلگىلى بولدى.

قاڭتاردىڭ 6-سى كۇنى ازەربايجان پرەزيدەنتى يلحام اليەۆ اقتاۋ ماڭىنداعى ۇشاق اپاتىندا ازەربايجان ازاماتتارىنىڭ قازا بولۋىنا رەسەي فەدەراتسياسىنىڭ وكىلدەرى كىنالى دەپ مالىمدەدى.

7 قاڭتاردا برازيليا قارا جاشىك دەرەكتەرىن ساراپتاۋدى اياقتاعانى بەلگىلى بولدى. ال 15 قاڭتاردا قازاقستان برازيليادان الىنعان قارا جاشىك دەرەكتەرىن زەرتتەپ جاتقانى بەلگىلى بولدى.

Abai.kz