ساياساتتانۋشىلار ءجيى مىسالعا كەلتىرەتىن ەۆرەي جازۋشىنىڭ: «قۇداي اراب پەن ەۆرەيدى تاتۋلاستىرا الماي، قۇسادان ءولدى»، - دەگەن ءسوزى بار.

ترامپتىڭ انت بەرۋ ءمۇراسىمىنىڭ الدىندا يزرايل مەن حاماس توبى سوعىستى توقتاتۋعا كەلىسىپ، ءوزارا تۇتقىن الماسا باستاپ ەدى. ترامپتىڭ وتكەن اپتانىڭ سەيسەنبىسىندە جىلان جىلىنداعى العاشقى شەتەلدىك قوناعى نەتانياحۋدى ەسكى قۇداسىنداي قارسى الىپ، بايدەن بەكىتكەن «كەي قارۋ تۇرلەرىن يزرايلگە ساتۋدى شەكتەۋ» بۇيرىعىنىڭ كۇشىن جويىپ عانا قويماي، «گازانى اقش-تىڭ باسقارۋىنا الۋ جوسپارىن» ۇسىنۋى تاياۋ شىعىستاعى اراب ەلدەرىمەن يزرايل اراسىن ودان ارى ۋشىقتىردى.

نەتانياحۋ «تاريحي شەشىم» دەپ اتاعان، ەۆرەي باسشىسىنا مايداي جاققان اق ءۇيدىڭ جاڭا باسشىسىنىڭ باستاماسى - بۇۇ-نىڭ «ەكى مەملەكەت» شەشىمىنە مۇلدە قايشى ەكەنىن ايتپاسا دا تۇسىنىكتى. وعان اراب  ەلدەرى عانا ەمەس، قىتاي، فرانتسيا باستاتقان ەلدەردىڭ دە قارسى بولۋى زاڭدى دا.ترامپتىڭ ءباسپاسوز حاتشىسى «گازانى باسقارۋعا الۋ ماسەلەسى كۇن تارتىبىندە تۇرعان جوق» دەپ مالىمدەسە دە نەتانياحۋدىڭ جەلىگى باسىلار ەمەس. ترامپتىڭ قاۋىپسىزدىكتى جەلەۋ ەتىپ، گازالىقتاردى وزگە اراب ەلدەرىنە كوشىرىپ، جەرىن مينادان تازالاپ، جۇماق ورناتۋ جاسپارىنا العاشقى بولىپ قارسى شىققان،اراب ەلدەرىنىڭ ازۋلىسى -  ساۋد ارابيامەن اشىق قارسىلىققا كوشتى. قىزدى-قىزدىمەن قاسيەتتى جۇما كۇنى «پالەستينالىقتارعا شىنايى جانى اشىسا، جەرى كەڭ عوي، ءوز ىشىنەن مەملەكەت قۇرىپ بەرسىن!» دەپ سالدى.

اراب جانە يسلام ەلدەرى بىرلەستىگى ۇيىمى ەۆرەي باسشىسىنىڭ ءسوزىن «ناسىلدىك كەمسىتۋ» دەپ باعالاپ، ساۋد ارابيانىڭ ەگەمەندىگىمەن ويناماۋعا شاقىردى.

ساۋد تارابى نەتانياحۋدىڭ بۇل ارەكەتىن «ءوزىنىڭ پالەستينالىقتارعا جاساعان قاندى قىلمىسىن ۇمىتتىرۋ، الەم نازارىن باسقا ارناعا بۇرۋ امالى» دەپ اتادى. پالەستينالىق باۋىرلارىنىڭ قۇقىنا ەشكىم قۇل سۇعا المايتىنىن، ولاردىڭ ەشقايدا كەتپەيتىنىن، قانشا ۋاقىت كەرەك بولسا دا، «ەكى مەملەكەت» ساياساتى نەگىزىندە ءوز مەملەكەتىن ءوز جەرىندە قۇراتىنىن قاداپ ايتتى.

سەنىمدى اقپارات كوزدەرىنە قاراعاندا يزرايل اسكەرى گازالىقتاردى كۇشتەپ كوشىرۋگە ساقاداي ساي تۇرۋعا بۇيرىق العان.

پرەزيدەنتتىگىن باستاماي جاتىپ، ليۆاندىق حۋرسيتتەردى، گازانى ءبولىپ بيلەگەن حاماس توبىن تاۋبەگە كەلتىرگەن ماقتاۋلى ترامپ ورىنسىز باستاما كوتەرىپ ورتا شىعىستىڭ جاعدايىن قايتا شيەلەنىستىردى. مەيلى ترامپ ايتقانداي جۇماق بولسا دا پالەستيندىكتەرسىز گازانى جەرگىلىكتى جۇرت تا، تۋىسقان اراب ەلدەرى دە، الەمدىك قاۋىمداستىقتار دا قابىلدامايتىنى ايداي اقيقات. ترامپتىڭ گازانى اقش-تىڭ باسقارۋىنا الۋ جوسپارى، جىلجىمايتىن مۇلىك ساۋداگەرىنەن ساياساتقا كەلگەن اق ءۇيدىڭ جاڭا باسشىسىنىڭ تازا ەكونوميكالىق پايدا تۇرعىسىنان ايتىلعان شيكى جوسپار ەكەنى انىق.

Abai.kz