ناۋرىز مەيرامى - الەم نازارىندا!
قاسىم-جومارت توقاەۆ «Expo» كورمە ورتالىعىنداعى ەتنواۋىلدا ناۋرىز مەرەكەسىن جۇرتشىلىقپەن بىرگە قارسى الدى.
پرەزيدەنت مەرەكەلىك ءىس-شاراعا جينالعان كوپشىلىكتى ناۋرىز مەيرامىمەن قۇتتىقتاپ، جىلى لەبىزىن جەتكىزدى.
«ۇلىستىڭ ۇلى كۇنى – ۇلتىمىزدىڭ ۇلىق مەيرامى. بۇل – ءبىزدىڭ اتا ءداستۇرىمىز. شۋاقتى كوكتەم مەرەكەسىندە بۇكىل دۇنيە قايتا جاڭعىرادى. كۇن مەن ءتۇن تەڭەلەدى. قازاق ەلى ءاز-ناۋرىزدى كونە زاماننان بەرى تويلاپ كەلەدى. ناۋرىز – ەڭ الدىمەن، يگىلىكتى ىستەردىڭ مەرەكەسى. وسى كۇندەرى ءار ۇيدە اق داستارحان جايىلادى. ەل-جۇرت ءبىر-بىرىمەن قاۋىشىپ، اق تىلەگىن ايتادى. مۇقتاج جاندارعا قايىرىمدىلىق جاساپ، قامقورلىق كورسەتەدى. ۇلىستىڭ ۇلى كۇنى بيىل دا قاسيەتتى ورازا ايىمەن تۇسپا-تۇس كەلىپ وتىر. ەلىمىز ءۇشىن مۇنىڭ ءمان-ماڭىزى زور. سەبەبى ءبىزدىڭ ءدىنىمىز بەن ءداستۇرىمىز – ەگىز. قوس قازىنامىز حالقىمىزدىڭ بىرەگەي بولمىسىن ايشىقتاي تۇسەدى», – دەدى قاسىم-جومارت توقاەۆ.
پرەزيدەنت ناۋرىز مەرەكەسى بىلتىردان باستاپ جاڭا تۇجىرىمداماعا سايكەس ون كۇن بويى اتالىپ وتەتىنىنە نازار اۋدارىپ، ناۋرىزنامانىڭ ءار كۇنى تاعىلىمعا تولى ەكەنىن ايتتى.
«ناۋرىز – كوپتەگەن شىعىس حالىقتارىنا ورتاق مەرەكە بولعانىمەن، ەلىمىزدە ۇلىستىڭ ۇلى كۇنىن تويلاۋدىڭ ەرەكشە ءداستۇرى بار. بۇل مەيرامنىڭ ءتول مادەنيەتىمىزدەگى ورنى ايرىقشا. شەتەلدىك مەيماندار دا مەرەكە قارساڭىندا قازاقستانعا ارنايى كەلىپ، ءبىزدىڭ سالت-داستۇرىمىزبەن تانىسادى، ادەت-عۇرپىمىزدى تانىپ-بىلەدى. ءبىز وسى رۋحاني قازىنامىزدى جان-جاقتى دارىپتەۋىمىز كەرەك. ناۋرىزناما بويىنشا بۇگىن – ىنتىماق كۇنى. ەلىمىز ءۇشىن اۋىزبىرشىلىك پەن تاتۋلىقتىڭ ورنى قاشاندا ەرەكشە. بۇكىل حالقىمىز ۇلتىنا، دىنىنە قاراماستان ءبىر ەل بولىپ، ناۋرىزدى بىرگە اتاپ وتەدى. ءبىز وسىنداي بەرەكە-بىرلىگىمىزدىڭ ارقاسىندا بولاشاققا زور سەنىممەن قاراپ، تەك العا قاراي قادام باسىپ كەلەمىز. جان-جاقتى رەفورما جاساپ، مەملەكەتتىڭ ساياسي جۇيەسىن جاڭعىرتىپ جاتىرمىز. اۋقىمدى ەكونوميكالىق جوبالاردى قولعا الدىق. بايسالدى سىرتقى ساياساتىمىزدىڭ ارقاسىندا قازاقستان بۇكىل الەمگە بەدەلدى مەملەكەت رەتىندە تانىمال بولدى», – دەپ جالعاستىردى مەملەكەت باسشىسى.
قاسىم-جومارت توقاەۆ ناۋرىز مەيرامىنىڭ تازالىق، ەڭبەكقورلىق قۇندىلىقتارىن دارىپتەيتىن تاربيەلىك ءمانىن ايرىقشا اتاپ ءوتتى.
«ۇلىستىڭ ۇلى كۇنى – تازالىق مەرەكەسى. حالقىمىز وسى كۇنى تال ەگىپ، بۇلاقتىڭ كوزىن اشقان. اينالاسىن تازالاپ، تابيعاتتى ايالاعان. بۇل ءداستۇر بۇگىن دە ءوز جالعاسىن تابۋدا. بىلتىردان بەرى ەلىمىزدە «تازا قازاقستان» اكتسياسى ءجۇرىپ جاتىر. جالپىۇلتتىق ىسكە بارشا جۇرتىمىز، اسىرەسە، جاستار بەلسەندى اتسالىسۋدا. وسىلايشا قوعامىمىزدا جاڭا ەكولوگيالىق مادەنيەت پەن بولمىس قالىپتاسىپ كەلەدى. ناۋرىز – ناعىز ەڭبەك مەرەكەسى. كوكتەمنىڭ باسى – دالا ەڭبەگى جانداناتىن كەزەڭ. قازىر اۋىل شارۋاشىلىعىندا قارقىندى جۇمىس باستالدى. ءبىز وسى جىلدى «جۇمىسشى ماماندىقتارى جىلى» دەپ جاريالادىق. باستى ماقساتىمىز – ەڭبەك ادامىنىڭ بەدەلىن ارتتىرۋ. ويتكەنى ەڭبەكقورلىق – وزىق ويلى ۇلتقا ءتان قاسيەت، – دەدى مەملەكەت باسشىسى.
پرەزيدەنت بۇكىل الەمنىڭ الماعايىپ جاعدايدا ءومىر ءسۇرىپ جاتقان شاعىندا قوعامنىڭ تۇراقتىلىعىن نىعايتۋ ساياساتىمىزدىڭ باستى باعىتى بولىپ قالا بەرەتىنىن ايتتى.
بۇدان كەيىن مەملەكەت باسشىسى جۇرتشىلىقپەن بىرگە مەرەكەلىك كونتسەرتتى تاماشالادى.
پرەزيدەنت قاسىم-جومارت توقاەۆتىڭ اتىنا ناۋرىز مەرەكەسىنە وراي شەت مەملەكەتتەردىڭ باسشىلارى مەن حالىقارالىق ۇيىم جەتەكشىلەرىنەن قۇتتىقتاۋ جەدەلحاتتارى كەلىپ ءتۇسىپ جاتىر.
رەسەي پرەزيدەنتى ۆلاديمير پۋتين قاسىم-جومارت توقاەۆتى ناۋرىز مەيرامىمەن قۇتتىقتادى.
«– رەسەي-قازاقستان قارىم-قاتىناستارى ستراتەگيالىق سەرىكتەستىك جانە وداقتاستىق رۋحىندا تابىستى دامىپ كەلەدى. دوستاس حالىقتارىمىزدىڭ يگىلىگى جولىندا، ەۋرازيا كەڭىستىگىندەگى قاۋىپسىزدىك پەن تۇراقتىلىقتى نىعايتۋ ماقساتىندا ءوزارا ءتيىمدى بايلانىستاردى ودان ءارى ارتتىرۋ ءۇشىن ورتاق كۇش بىرىكتىرەتىنىمىزگە سەنىمدىمىن», – دەپ جازىلعان قۇتتىقتاۋدا.
قحر توراعاسى سي تسزينپين ناۋرىز كوكتەمنىڭ كەلۋى مەن تابيعاتتىڭ ويانعانىن بىلدىرەتىنىن جازعان. سونداي-اق بۇل مەيرام قازاقستان حالقىنىڭ يگىلىككە، ىنتىماق پەن ورلەۋگە ۇمتىلىسىمەن ۇشتاساتىنىن اتاپ وتكەن.
«ەكىجاقتى قارىم-قاتىناستاردى دامىتۋعا باسا ءمان بەرەمىن. سىزبەن بەرىك دوستىعىمدى ماقتان تۇتامىن. قىتاي مەن قازاقستان اراسىنداعى ءداستۇرلى دوستىقتى نىعايتىپ، ەكى ەلدىڭ ماڭگى ءارى جان-جاقتى ستراتەگيالىق سەرىكتەستىگىن تەرەڭدەتۋ ءۇشىن كۇش-جىگەرىمىزدى بىرىكتىرۋگە دايىنمىن», – دەلىنگەن جەدەلحاتتا.
اقش پرەزيدەنتى دونالد ترامپ جەدەلحاتىندا مەملەكەت باسشىسى مەن قازاقستان حالقىن ىنتىماق پەن جاڭارۋ مەرەكەسىمەن قۇتتىقتادى.
«ءبىزدىڭ مەملەكەتتەرىمىزدى ۇزاق جىلداردان بەرى قالىپتاسقان ءوزارا ءتيىمدى ىقپالداستىق بايلانىستىرادى. الداعى ۋاقىتتا قاۋىپسىزدىك، ەكونوميكا جانە باسقا دا سالالاردا جاڭا جەتىستىكتەرگە جەتەتىنىمىزگە سەنىمدىمىن. ءبىزدىڭ جاسامپاز ەلدەرىمىز تابىستى جولعا قادام باسقان كەزەڭدە، امەريكا حالقى قازاقستاننىڭ ەگەمەندىگىن، تاۋەلسىزدىگىن، اۋماقتىق تۇتاستىعىن ءاردايىم قولدايدى», – دەپ جازعان دونالد ترامپ.
تۇركيا پرەزيدەنتى رەجەپ تايپ ەردوعان جەدەلحاتىندا ناۋرىزدىڭ سان عاسىرلىق ءداستۇرى بەيبىتشىلىكتىڭ، باۋىرمالدىق پەن كەلىسىمنىڭ ماڭىزىن ەسكە سالاتىنىنا توقتالعان.
«ناۋرىز – دۇنيە جۇزىندەگى بەيبىتشىلىككە دەگەن ءۇمىتتى نىعايتىپ، حالىقارالىق ديالوگ پەن ىنتىماقتاستىقتىڭ جاڭا دەڭگەيگە كوتەرىلۋىنە سەپتىگىن تيگىزەدى دەپ ويلايمىن. ەلدەرىمىز اراسىنداعى بەرىك دوستىق پەن باۋىرلاستىق بايلانىس قارقىندى دامىپ، ەكىجاقتى ىقپالداستىعىمىز كەڭەيە بەرەتىنىنە سەنىمدىمىن», – دەلىنگەن قۇتتىقتاۋدا.
سونىمەن قاتار مەملەكەت باسشىسىن وزبەكستان پرەزيدەنتى شاۆكات ميرزيوەۆ, قىرعىزستان پرەزيدەنتى سادىر جاپاروۆ, تاجىكستان پرەزيدەنتى ەمومالي راحمون, تۇرىكمەنستان پرەزيدەنتى سەردار بەردىمۇحامەدوۆ, تۇرىكمەنستان حالك ماسلاحاتىنىڭ توراعاسى گۋربانگۋلى بەردىمۇحامەدوۆ, ازەربايجان پرەزيدەنتى يلحام اليەۆ, يران پرەزيدەنتى ماسۋد پەزەشكيان, پالەستينا پرەزيدەنتى ماحمۇد ابباس, تاتارستان رايسى رۋستام ميننيحانوۆ, تۇركى مەملەكەتتەرى ۇيىمىنىڭ باس حاتشىسى كۋبانىچبەك ومىراليەۆ جانە بىرقاتار حالىقارالىق ۇيىمنىڭ جەتەكشىلەرى مەن باسقا دا رەسمي تۇلعالار قۇتتىقتادى.
قۇتتىقتاۋ جەدەلحاتتارى ءالى دە كەلىپ ءتۇسىپ جاتىر.
Abai.kz
