قاڭتاردىڭ باسىندا ۇلتتىق قوردىڭ جالپى سوماسى 33 ترلن تەڭگە بولسا، ناۋرىزدىڭ اياعىندا 32,2 ترلن تەڭگەگە تۇسكەن. بۇل – قازىرگى  باعام بويىنشا 64 ملرد دوللار.

«جىل باسىنان بەرى ۇلتتىق قور 819,8 ملرد تەڭگەگە قىسقاردى»، دەپ حابارلادى قر قارجى مينيسترلىگى.

ءۇش ايدا ۇلتتىق قورعا 631,4 ملرد تەڭگە، ونىڭ ىشىندە ناۋرىزدا 111,19 ملرد تەڭگە تۇسكەن. نەگىزگى كىرىس كوزدەرى مۇناي كومپانيالارىنان تۇسەتىن كورپوراتيۆتىك تابىس سالىعى 248,9 ملرد تەڭگە، جاسالعان كەلىسىمشارتتار بويىنشا ءونىمدى بولۋدەگى قازاقستاندىق ۇلەستىڭ 234,7 ملرد تەڭگەسى، سونداي-اق باسقا دا تولەمدەر.

بۇل رەتتە ۇلتتىق قوردان 1,45 ترلن تەڭگە يگەرىلسە، ونىڭ 450,4 ملرد تەڭگەسى ناۋرىز ايىندا يگەرىلدى. بۇل سوماعا كەپىلدەندىرىلگەن ترانسفەرتتەر (تاپشىلىقتى جابۋ ءۇشىن رەسپۋبليكالىق بيۋدجەتكە باعىتتالاتىن) – 1,2 ترلن تەڭگە، نىسانالى ترانسفەرتتەر (رەسپۋبليكالىق ماڭىزى بار جوبالاردى قارجىلاندىرۋعا) – 250 ملرد تەڭگە.

ۇلتتىق قوردىڭ كولەمى ناۋرىز ايىندا 339,3 ملرد تەڭگەگە قىسقاردى. جالپى، 2025 جىلى بيۋدجەتكە سايكەس ۇلتتىق قوردان 2 ترلن تەڭگە كەپىلدىك بەرىلگەن ترانسفەرتتەر مەن 3,25 ترلن تەڭگە نىسانالى ترانسفەرتتەر جوسپارلانعان.

Abai.kz