مەملەكەت باسشىسىنىڭ قازاقستان حالقىنا جولداۋىندا ايتىلعان تاپسىرماسىنا سايكەس ەلىمىزدە جول ينفراقۇرىلىمىن جاڭعىرتۋعا باعىتتالعان اۋقىمدى جوبالار جۇزەگە اسىرىلىپ جاتىر.

بيىل شامامەن 7 مىڭ شاقىرىم جول ورتاشا جانە كۇردەلى جوندەۋ بويىنشا جۇمىستارمەن قامتىلماق.

وتكەن جىلى باستالعان جوندەۋ جۇمىستارى رەسپۋبليكالىق ماڭىزى بار باستى كولىك دالىزدەرىندە جالعاسىپ جاتىر. ولاردىڭ قاتارىندا «جەزقازعان – پەتروپاۆل»، «قاراعاندى – اياگوز – بۇعاز»، «قاندىاعاش – شالقار – ىرعىز»، «سارىوزەك – كوكتال» تاسجولدارى بار. بيىل جولشىلار جاڭا ۋچاسكەلەردى جاڭارتۋعا كىرىستى، ولاردىڭ ىشىندە «قارابۇتاك – رۋدنىي – قوستاناي» جانە «اتىراۋ – ورال» باعىتتارى دا قامتىلماق.

كولىك اعىنى جوعارى باعىتتارعا ەرەكشە ءمان بەرىلىپ وتىر. الماتى وبلىسىندا ءوڭىردىڭ ماڭىزدى كولىك كۇرە جولدارىنىڭ ءبىرى – قۇلجا تاسجولىنا ورتاشا جوندەۋ جۇمىستارى جۇرگىزىلىپ جاتىر. اباي جانە شىعىس قازاقستان وبلىستارىندا «سەمەي – وسكەمەن» تاسجولىنىڭ 73 شاقىرىمدىق بولىگىندە جوندەۋ جالعاسادى. بۇل ۋچاسكەدە جول جامىلعىسى جاڭارتىلىپ، سۋ وتكىزگىش قۇبىرلار دا جوندەلەتىن بولادى.

وتكەن جىلى «جەزقازعان – پەتروپاۆل» تاسجولىنىڭ 590 شاقىرىمىندا جوندەۋ جۇمىستارى باستالىپ، بيىل تاعى 119 شاقىرىمدا جالعاسىن تابۋدا. سونداي-اق بىلتىر «مامليۋتكا – قوستاناي» باعىتىنداعى 161 شاقىرىم جولعا ورتاشا جوندەۋ جۇمىستارى باستالعان بولاتىن. بيىل بۇل جۇمىستار تاعى 74 شاقىرىم جولدا جۇرگىزىلىپ جاتىر.

Abai.kz