كرەمل 9 مامىردا وداقتاس ەلدەرىن ماسكەۋگە جيناپ، قىزىل الاڭدا اسكەري پاراد وتكىزىپ جاتقاندا، گەرمانيا، پولشا، انگليا، فرانتسيا باسشىلارى كيەۆكە كەلىپ، زەلەنسكيمەن بىرگە ءپۋتيندى دۇيسەنبىدەن (12 مامىر) باستاپ سوعىستى شارتسىز تۇردە 30 كۇنگە توقتاتۋعا ۇندەپ، ەگەر كەلىسپەسە جويقىن سانكتسيالار كۇتىپ تۇرعانىن ايتقان ەدى.

پۋتين جەكسەنبى كۇنى جاۋاپ بەردى. ۋكراينا مەن رەسەي تاراپتىڭ بەتپە-بەت كەلىسسوزىن بەيسەنبى كۇنى ىستامبۇلدا وتكىزۋگە شاقىردى. بىلاي قاراساڭ ۋاقىتى، ورىنى ءبارى انىق تۇر. پۋتين اياق استىنان كەزدەسۋگە نەگە پەيىلدى بولا قالدى دەگەن سۇراق الەم باق-تارىندا كەڭىنەن تالقىلانۋدا.

پۋتين ۋكراينا مەن ەۋروپالىق ارىپتەستەرى الاڭداپ وتىرعانداي "كەلىسە ءجۇرىپ سوعىسۋ" تاكتيكاسىن جالعاستىرۋى مۇمكىن. "ونىڭ تۇركياعا اياق استىنان بارماق بولۋىنىڭ دا سىرى سوندا" دەيدى ساراپشىلار.

بىرىنشىدەن، كەلىسسوزگە وتىرسا، اقش پرەزيدەنتى ترامپتىڭ دا كوڭىلىنەن شىعادى. زەلەنسكي سياقتى سوعىستى توقتاتۋدى قالايتىن ادام بولىپ كورىنەدى.

ەكىنشىدەن، 9 مامىر كەزىندە كرەملدىڭ ۋكرايناعا سوعىستى 2-3 كۇنگە توقتاتا تۇرۋ تالابىن قويعانى بەلگىلى. سول سياقتى ونىڭ ىستامبۇلدا كەزدەسۋ تۋرالى ايتۋى دا ۋاقىت وزدىرۋدىڭ ءبىر ءتاسىلى ەكەن.

ءپۋتيننىڭ تاكتيكاسى الدەن-اق، ناتيجەسىن بەرە باستادى. اق ءۇي قوجايىنى ترامپ ەكى تاراپتىڭ سوعىستىڭ توقتاۋىن كۇتپەي-اق، كەلىسسوزگە وتىرۋىن قۇپ كورىپ وتىر. ول ءوزىنىڭ الەۋمەتتىك جەلىدەگى پاراقشاسىندا: "سوعىستى توقتاتۋعا كەلىسپەي تۇرىپ-اق، ەكى تاراپ بەيسەنبى دە ىستامبۇلدا كەزدەسۋى كەرەك. سوندا سوعىستى توقتاتۋعا كەلىسە الا ما، الماي ما، سونى انىقتايمىز. ارى قاراي ءوز ۇستانىمىمىزدى بىلدىرەمىز", - دەپ جازعان.

ەۋروپا باسشىلارى ءپۋتيننىڭ كەلىسسوز وتكىزۋگە پەيىل بىلدىرگەنىن قۇپتاعانىمەن، كەلىسسوز الدىندا اتىستى شارتسىز توقتاتۋعا شاقىرىپ، ءوز پوزيتسيالارىن قايتالىپ وتىر.

ال پرەزيدەنت زەلەنسكي: "مەن ىستامبۇلدا ءپۋتيندى كۇتەمىن", - دەدى. ول اتىستى توقتاتۋ ديپلوماتيانىڭ نەگىزى ەكەنىن تاعى دا قايتالادى. ورىستار ەندىگارى تۇلكىبۇلاڭعا سالمايدى دەپ ۇمىتتەنەتىنىن جەتكىزدى.

Abai.kz