انتيكوردىڭ ەكس باسشىسى (ۇلتتىق بيۋرو) تالعات تاتۋباەۆتىڭ ۇستالۋىمەن نيگماتۋللين-قوجامجاروۆ كلانى تولىقتاي كۇيرەتىلىپ، ءوز ءومىرىن توقتاتتى.

"جاڭا قازاقستان" سەناتور قايرات قوجامجاروۆتىڭ القىمىنا ءبىر تابان جاقىنداي ءتۇستى. DALA INSIDE دەرەككوزىنىڭ سوزىنشە "پارلامەنتتەگى وكىلەتتىلىگى بىتكەننەن كەيىن قايرات پەرنەشۇلىنىڭ ءومىرى قيىنداي تۇسەدى". تاتۋباەۆتىڭ ءتۇرلى تاپسىرمالارىن ەكى ەتپەي، رەزونانستى ىستەردىڭ شوقپار تەرگەۋشىسى بولعان ولەسيا كەكسەل دە جاقىن ارادا ۇستالۋى ءتيىس. ول دا ازاپتاۋعا قاتىستى قىلمىستىق ءىس وربيتاسىندا ءجۇر.

"كەكسەل كوپتەگەن ىقپالدى كلانداردىڭ اياعىن باسقان ادام. ونىڭ ىستەگەن ىستەرىن ەشكىم ۇمىتقان جوق. شاعىن زاڭ بۇزۋشىلىقتارى بار، ايتارلىقتاي قاتەلىكتەرى بار، ءبارى جىپكە تىزىلۋدە. كوپ ادام تەرگەۋگە كومەكتەسكىسى كەلەدى. كەكسەلدىڭ ۇستىنەن كۋاگەر بولعىسى كەلەتىندەر از ەمەس", - دەيدى دەرەككوز.

ال تاتۋباەۆتى ارداگەر جۋرناليست سەيىتقازى ماتاەۆتىڭ كيەسى ۇردى. ءتىپتى نازارباەۆ تا پرەزيدەنت كەزىندە ماتاەۆتى كۋعىنداۋدى قۇپتاماعان بولاتىن. بىراق نۇرلان نيگماتۋللين بوي بەرمەي قويعان. اقىرى تاتۋباەۆتار اكەلى-بالالى ماتاەۆتاردى جازىقسىز قۋدالاپ، تۇرمەگە توعىتتى. ماتاەۆتار ءوز كىناسىن مويىنداعان جوق. ارتىنان ولاردى "جاڭا قازاقستان" تولىعىمەن اقتاپ شىقتى. بەلگىلى جۋرناليست اسەت ماتاەۆ ازاپتاۋ بابى بويىنشا ۇستالعان بۇرىنعى گەنەرال تالعات تاتۋباەۆقا قاتىستى ءوزىنىڭ باسىنان وتكەن وقيعانى ەسكە الىپ، فەيسبۋكتا جازبا قالدىرعان. ونىڭ سوزىنشە، 2016 جىلى ول قارجى پوليتسياسى باسشىسىنىڭ ورىنباسارى تالعات تاتۋباەۆپەن ەكى رەت كەزدەسكەن. سول كەزدە فينپول وكىلى ماتاەۆتار وتباسىنا قىلمىستىق كودەكستىڭ 65-بابى (كىناسىن مويىنداپ، شىن وكىنگەنى ءۇشىن جاۋاپكەرشىلىكتەن بوساتۋ) بويىنشا كىنانى مويىنداۋدى ۇسىنعان.

"سول كەزدە اكەم ەكەۋمىزگە جالعان ايىپ تاعىلىپ جاتقانىن ايتتىم. لوگيكالىق ارگۋمەنتتەرىمدى ەستىگەندە، ونىڭ كوزى جىپىلىقتاپ كەتتى. سول ساتتە ونىڭ «زاڭ ادامى» ەمەس، قاراپايىم كوشە ادامى سياقتى سويلەپ تۇرعانىن ءتۇسىندىم. اڭگىمەسىنىڭ بار مازمۇنى – "جوعارىدان تاپسىرىس ءتۇستى، ءبارىبىر تۇرمەگە جابىلاسىڭدار" دەگەنگە سايدى", – دەپ ەسكە الادى اسەت ماتاەۆ.

ءجۋرناليستىڭ ايتۋىنشا، سول ءىس بويىنشا بىرنەشە تانىمال تۇلعا – جوعارعى سوتتىڭ سول كەزدەگى ءباسپاسوز حاتشىسى بولات كاليانبەكوۆ (قازىرگى ءماجىلىس اپپاراتى باسشىسىنىڭ ورىنباسارى), "قازاقتەلەكومنىڭ" ۆيتسە-پرەزيدەنتى ماحانبەتاجيەۆ، اقپارات كوميتەتىنىڭ بۇرىنعى توراعاسى بەرسەباەۆ سەكىلدى شەنەۋنىكتەر قاماۋعا الىنعان. بىراق ولار قىسىمعا توتەپ بەرە الماي، ءبىر كۇن تەرگەۋ يزولياتورىندا وتىرعان سوڭ، قارجى پوليتسياسى قويعان شارتتارعا كەلىسكەن.

"ولاردىڭ بارلىعى ءبىر-ءبىر كۇن تەرگەۋ يزولياتورىندا بولىپ، بىزگە جالا جابۋعا ءماجبۇر بولدى. ءىس جۇزىندە بيلىك پەن فينپولدىڭ تالابىنا كونگەن ادامدار ەدى. ولاردىڭ ءبىرازى نۇرلان نىعماتۋلين، باعلان مايلىباەۆ، باۋىرجان بايبەك، اسقار جۇماعاليەۆ سەكىلدى تۇلعالارعا جاقىن ادامدار بولاتىن", – دەپ جازدى جۋرناليست.

سونداي-اق ول جوعارعى سوتتىڭ سول كەزدەگى ءباسپاسوز حاتشىسى بولات كاليانبەكوۆتىڭ كەيىنىرەك بەلگىلى قۇقىق قورعاۋشى، ء"ادىل ءسوز" قورىنىڭ جەتەكشىسى تامارا كالەەۆاعا حابارلاسىپ، ماتاەۆتاردى كىنانى مويىنداۋعا كوندىرۋىن سۇراعانىن اتاپ ءوتتى. ماتاەۆتىڭ ايتۋىنشا، كاليانبەكوۆتىڭ ۇستىنەن قوزعالعان ءىس 2021 جىلى قاڭتار وقيعاسىنىڭ الدىندا جابىلىپ قالعان.

"مەن ول كەزدە وتباسىم مەن جاقىندارىمنىڭ قىسىمعا ۇشىراعانىنا كۋا بولدىم. اكەمدى قاماۋعا الىپ، كەيىن ماعان تەلەفون ارقىلى شىعىپ، «ەشتەڭەگە ۋايىمداما، ءىس جابىلادى، ءبارى شيكى ەكەنىن بىلەدى» دەپ سەندىردى. ارينە، سوزىنە تۇرمادى. اكەمدى دە، وتباسىمدى دا، قىزمەتكەرلەرىمىزدى دە ۇكىمگە دەيىن قينادى", – دەيدى ول.

اسەت ماتاەۆ اكەسىنىڭ تۇرمەدەن شىققان سوڭ، مەديافورۋمدا "تەنگرينيۋس" جەتەكشىسى باتىر قازىباەۆتىڭ كەلىپ، كەشىرىم سۇراعانىن دا ايتتى. قازىباەۆ اقپارات قۇرالىندا ماتاەۆتارعا قارسى ماتەريالدار شىعارۋ تۋرالى تاپسىرمانى جوعارىدان العانىن مويىنداعان. جۋرناليست بۇل جازبانى كەك الۋ ماقساتىندا ەمەس، قۇقىق قورعاۋ ورگاندارىنىڭ قىزمەتكەرلەرى ءوز بولاشاعىن ويلانسىن دەگەن نيەتپەن جاريالاعانىن اتاپ ءوتتى. تاتۋباەۆ ءوزى قۇرۋعا كومەكتەسكەن سيستەمانىڭ قۇربانى بولدى. كەكسەلدى دە، قوجامجاروۆتى دا وسىنداي تاعدىر كۇتىپ تۇر.

Abai.kz