پرەمەر-ءمينيستردىڭ ءبىرىنشى ورىنباسارى رومان سكليار جاڭا سالىق كودەكسىنىڭ تۇرعىن ءۇي نارىعىنا اسەرى تۋرالى پىكىر ءبىلدىردى.

جۋرناليستەر "كەلەسى جىلى تۇرعىن ءۇي باعاسى قىمباتتاپ كەتپەي مە؟" دەپ سۇرادى.

"جاڭا سالىق كودەكسى قاراپايىم ازاماتتارعا ەشقانداي اسەرىن تيگىزبەيدى. ءوز باياندامامدا ايتىپ كەتكەنندەي، بيىل 19 ميلليون شارشى مەتردەن استام تۇرعىن ءۇي سالۋدى جوسپارلاپ وتىرمىز. تۇرعىن ءۇي باعاسىن نارىق رەتتەيدى. الايدى مەملەكەتتىڭ تاپسىرىس بەرۋشى رەتىندە جەكە قۇرىلىس كومپانيالارىنان تۇرعىن ءۇي ساتىپ الۋى شامامەن 10 جىل ىشىندە بەلگىلى ءبىر اسەرىن بەرەدى. بىزدە تۇرعىن ءۇي باعاسى قىمبات ەمەس. مەن وسى تۇستا بيزنەس نەمەسە ەليتالىق ساناتتاعى ەمەس، ناقتى ەكونوم ساناتىنداعى تۇرعىن ۇيلەر تۋرالى ايتىپ وتىرمىن. بۇل سەگمەنتتەگى باسپانا باعاسى ءوز قۇنىنا ساي. باعانىڭ كۇرت قۇبىلۋى كۇتىلمەيدى", – دەدى رومان سكليار.

ونەركاسىپ جانە قۇرىلىس ءمينيسترى دە ۆيتسە-پرەمەردىڭ ءسوزىن قۇپتادى.

"ەشقانداي ۇلكەن وزگەرىستەر بولمايدى. الەۋمەتتىك باسپانا باعاسىنىڭ ماسەلەسى ءبىزدىڭ ەرەكشە باقىلاۋىمىزدا بولادى", – ەرسايىن ناعاسپاەۆ.

Abai.kz