رەسەي بايقوڭىردا «سويۋز مس-28» زىمىرانىن ۇشىردى. ول ءۇش عارىشكەردى الىپ ۇشقان. زىمىراندا رەسەيلىك عارىشكەر سەرگەيا كۋد-سۆەرچكوۆ، سەرگەي ميكاەۆ پەن NASA عارشىكەرى دجوناتان كيم بولدى. ولار حالىقارالىق عارىش ستانتسياسىنا ءساتتى جەتىپ، زىمىراندى تۇيىستىرە ءبىلدى. الايدا زىمىراندى ۇشىرعان عارىش ايلاعىندا كۇتپەگەن جاعداي بولىپ، ۇشۋ الاڭى زاقىمدالدى. بۇل تۋرالى Mezgil.kz اقپاراتتىق پورتالى جازدى. 

27 قاراشادا «سويۋز مس-28» عارىش كەمەسىن حالىقارالىق عارىش ستانتسياسىنا (حعس) ۇشىرۋ كەزىندە بايقوڭىردا قىزمەت كورسەتۋ كابيناسى زاقىمدالعان. بۇل تۋرالى «روسكوسموس» ترانسلياتسياسىنداعى كادرلاردان دا كورۋگە بولادى. The Insider باسىلىمى اڭگىمە ستارتتىق قۇرىلىمنىڭ استىنداعى، زىمىراننىڭ ارتقى بولىگىندە جۇمىس ىستەۋگە ارنالعان جىلجىمالى جينالمالى كونسترۋكتسيا تۋرالى بولىپ وتىر دەيدى.

«روسكوسموس» بۇل تۋرالى ءوزىنىڭ تەلەگرامداعى رەسمي ارناسىندا جازدى. بىلاي دەيدى: «عارىشتىق ماقساتتاعى زىمىران ەش كەدەرگىسىز، شتاتتىق رەجيمدە ۇشىرىلدى. زىمىران حالىقارالىق عارىش ستانتسياسىنا ءساتتى ءتۇيىستى. ەكيپاج قازىرگى ساتتە ستانتسيانىڭ بورتىندا، جاعدايلارى جاقسى. زىمىران ۇشىرىلعاننان كەيىن، ۇشۋ الاڭى مۇقيات قارالدى. بۇل ءار زىمىراندى ۇشىرعان سوڭ ىسكە اساتىن مىندەتتى ارەكەت. ۇشىرۋ الاڭىندا زاقىمدالعان بىرنەشە ەلەمەنتتى انىقتادىق. زىمىران ۇشىرىلعان سوڭ، قانداي دا ءبىر زاقىمدانۋ بولىپ تۇرادى. سول ءۇشىن دە الەمدىك تاجىريبە كورسەتكەندەي مىندەتتى تۇردە ۇشىرۋ الاڭى مۇقيات تەكسەرىلەدى. قازىر ۇشىرۋ الاڭىنىڭ جاي-كۇيى باعالانىپ جاتىر. زاقىمدالعان ايماقتى قالپىنا كەلتىرۋگە بارلىق قاجەتتى زاتتار بار. جاقىن ارالىقتا بارلىعىن قالپىنا كەلتىرەمىز»، - دەيدى.

زىمىران ۇشىرۋلارىن تالداۋشى گەورگي تريشكيننىڭ ايتۋىنشا، قىزمەت كورسەتۋ كابيناسى 31-ءشى الاڭدا قۇلاعان. رەسەيدىڭ حالىقارالىق عارىش ستانتسياسىنا جىبەرەتىن ميسسيالارى وسى الاڭنان اتتانادى. ەندىگى تاڭدا رەسەي ۇشىرۋ الاڭىنىڭ زاقىمدانۋىنا بايلانىستى «سويۋز» بەن «پروگرەسس» عارىش كەمەلەرىن ۇشىرۋدى بەلگىسىز ۋاقىتقا كەيىنگە شەگەرۋى مۇمكىن. ساراپشى سولاي دەيدى.

زىمىراندى ۇشىرعاننان كەيىنگى تەكسەرىس بارىسىندا ستارتتىق كەشەننىڭ ءبىر بولىگىن ءبىرىنشى ساتىلى زىمىران قوزعالتقىشىنىڭ گاز اعىنى جۇلىپ كەتكەنى انىقتالدى. مۇنداي اقپاراتتى «يۋرا، پروستي» ارناسى جازدى. بۇل وقىس وقيعادان عارىشكەرلەر زارداپ شەكپەگەن، الايدا كەشەنگە جوندەۋ جۇمىستارى جۇرگىزىلۋى ءتيىس.

عارىش سالاسىن ناسيحاتتاۋشى ۆيتالي ەگوروۆ زىمىراننىڭ ۇشۋ ۆيدەوسىن قاراپ شىعىپ، «1961 جىلدان كەيىن رەسەي العاش رەت عارىشقا ادام ۇشىرۋ مۇمكىندىگىنەن ايىرىلۋدا» دەپ جازدى. جوندەۋ جۇمىستارى بىرنەشە اپتا، اي نەمەسە جىلعا سوزىلۋى ىقتيمال.

ەگوروۆتىڭ سوزىنشە رەسەي 64 جىلدىڭ ىشىندە بۇل ۇشۋ الاڭىنان بەس جۇزگە جۋىق زىمىراندى عارىشقا جىبەرگەن. 2018 جىلدان باستاپ ءدال وسى الاڭنان رەسەيدىڭ عارىشكەرلەرى حالىقارالىق عارىش ستانتسياسىنا اتتانۋدا. باسقا الاڭ جوق. ساراپشىلار عارىشقا ادام ۇشىرۋدىڭ تاعى ءبىر الاڭىن ۇسىنۋدا. ول ءۇشىن №1 گاگارين الاڭىن مودەرنيزاتسيالاپ، جاڭارتۋ كەرەك. الايدا بۇل الاڭدى رەسەي جارامسىز دەپ ساناپ، تىزىمنەن الىپ تاستاعان جانە ول بۇگىندە عارىش مۇراجايى رەتىندە تۇر.

«گاگارين الاڭىن» 2018 جىلى ءباا-ءنىڭ قارجىسىن تارتا وتىرىپ مودەرنيزاتسيالاۋ ۇسىنىلدى. تاراپتار كەلىسىم جاساستى. بىراق كەيىن بۇل جوسپار ىسكە اسپادى. ءباا جوبانى ىسكە اسىرۋدان باس تارتتى.

Abai.kz