بەلگىلى قازاق اقىنى ولجاس سۇلەيمەنوۆ بەيبىتشىلىك بويىنشا نوبەل سىيلىعىنا ۇسىنىلدى، دەپ حابارلادى «بايتاق» جاسىلدار پارتياسىنىڭ ءباسپاسوز قىزمەتى.

«بۇگىن الماتىدا وتكەن «بايتاق» جاسىلدار پارتياسى الماتى قالالىق فيليالىنىڭ 5-ءشى كونفەرەنتسياسىندا تاريحي ءارى ماڭىزدى شەشىم قابىلداندى. پارتيا توراعاسى ازاماتحان امىرتاەۆ قازاقتىڭ كورنەكتى جازۋشىسى، اقىن، قوعام قايراتكەرى، «نەۆادا-سەمەي» انتيادرولىق قوزعالىسىنىڭ نەگىزىن قالاۋشى ولجاس سۇلەيمەنوۆتى بەيبىتشىلىك سالاسىنداعى نوبەل سىيلىعىنا رەسمي تۇردە ۇسىنعانىن حابارلادى»، - دەلىنگەن اقپاراتتا.

رەسمي اقپاراتتا: بۇل باستاما تەك قازاقستاننىڭ عانا ەمەس، بۇكىل الەمنىڭ تىنىشتىعى ءۇشىن ايانباي ەڭبەك ەتكەن دارا تۇلعانىڭ ەڭبەگىن جوعارى دەڭگەيدە مويىنداۋ بولىپ تابىلادى دەلىنگەن.

«ولجاس سۇلەيمەنوۆتىڭ تاريحي ءرولى، اسىرەسە ونىڭ «نەۆادا-سەمەي» قوزعالىسىنداعى قىزمەتى سەمەي يادرولىق پوليگونىن جابۋدىڭ شەشۋشى فاكتورى بولدى. ونىڭ ۇستىنە، ونىڭ باستاماسى مەن قازاقستاننىڭ حالىقارالىق ارەناداعى بەلسەندى جۇمىسىنىڭ ارقاسىندا بىرنەشە ەلدە، سونىڭ ىشىندە اقش-تىڭ نەۆادا شتاتىندا تاعى ءتورت ءىرى يادرولىق سىناق پوليگونى جابىلدى. بۇل جاھاندىق قاۋىپسىزدىككە قوسىلعان قوماقتى ۇلەس»، - دەيدى «بايتاق» جاسىلدار پارتياسى.

Abai.kz