قىتايمەن اراداعى ساياسي كيكىلجىڭدەردەن كەيىن جاپونيا ورتالىق ازيا ەلدەرىنە دەن قويا باستادى.

ونىڭ جارقىن مىسالى  ورتالىق ازيا ەلدەرىنىڭ قاتىسۋىمەن وتەتىن ءسامميتتى  دايىنداۋعا توكيو بەل شەشە كىرىسىپ كەتتى.

«جاپونيا ۇكىمەتى 19-20 جەلتوقساندا توكيودا ورتالىق ازيانىڭ بەس ەلىمەن سامميت وتكىزگىسى كەلەدى»، - دەپ جازادى جاپوندىق باق. ءسامميتتىڭ دايىندىعى تۋرالى بيلەۋشى پارتيانىڭ ۆيتسە-پرەزيدەنتى تارو اسو جاپونيا مەن وا اراسىنداعى قارىم-قاتىناستاردى نىعايتۋعا جاۋاپتى دەپۋتاتتىق توپتىڭ وتىرىسىندا حابارلادى.

«سوڭعى جارتى جىلدا رەسەي، قىتاي، اقش جانە باسقا دا ەلدەر ورتالىق ازيا مەملەكەتتەرىمەن سامميت وتكىزدى. ديپلوماتيا تۇرعىسىنان جاپونيانىڭ دا وسىنداي ءسامميتتى تابىستى وتكىزۋى اسا ماڭىزدى»، - دەپ مالىمدەدى اسو.

«Nippon.com» سايتىنىڭ جازۋىنشا، پرەمەر-مينيستر ساناە تاكايتيدىڭ ءوڭىر مەملەكەتتەرىنىڭ كوشباسشىلارىمەن جەكەلەگەن ەكىجاقتى كەزدەسۋلەرى جوسپارلانىپ وتىر.

ءسامميتتى قازاقستاندا وتكەن جىلدىڭ تامىز ايىندا وتكىزۋ جوسپارلانعان بولاتىن، بىراق ول جاپونيا جاعالاۋىنداعى قاتتى جەر سىلكىنىسىنە بايلانىستى توقتاتىلدى. سول كەزدەگى پرەمەر-مينيستر فۋميو كيسيدانىڭ ۇكىمەتى تج-عا شۇعىل دەن قويۋعا ءماجبۇر بولدى.

قازاقستان پرەزيدەنتى قاسىم-جومارت توقاەۆ 18-20 جەلتوقساندا جاپونياعا رەسمي ساپارمەن بارىپ، ورتالىق ازيا-جاپونيا سامميتىنە قاتىسادى. بۇل تۋرالى توقاەۆتىڭ ءباسپاسوز قىزمەتىنەن حابارلادى.

«ساپار اياسىندا يمپەراتور نارۋحيتومەن، پرەمەر-مينيستر ساناە تاكايتيمەن، سونداي-اق جاپونيانىڭ ىسكەر توپتارىنىڭ وكىلدەرىمەن كەزدەسۋلەر جوسپارلانعان. سونىمەن قاتار، قازاقستان پرەزيدەنتى ورتالىق ازيا-جاپونيا ءسامميتىنىڭ جۇمىسىنا قاتىسادى»، - دەلىنگەن حابارلامادا.

Abai.kz