كونستيتۋتسيالىق كوميسسيانىڭ وتىرىسىندا ءسوز سويلەگەن «قازاق گازەتتەرى» سەرىكتەستىگىنىڭ باس ديرەكتورى ديحان قامزابەكۇلى ءبىلىم جۇيەسى مەن مادەنيەتتەگى زايىرلىلىق اتا زاڭدا ناقتى كورىنىس تابۋى – زيالىلىق ءداستۇردىڭ تالابى ەكەنىن ايتتى.

مەملەكەتتىك ءبىلىم مەن تاربيە جۇيەسى ءۇشىن زايىرلى ۇلتتىق جانە جالپىادامزاتتىق قۇندىلىقتار – وركەنيەت تەمىرقازىعى ەكەنىن ەسكە سالعان ول دامۋدىڭ داڭعىل جولىنا تۇسكەن الدىڭعى قاتارلى ەلدەردە سولاي بولعانىن جانە بولا بەرەتىنىن تىلگە تيەك ەتتى.

«ءاي دەيتىن اجا، قوي دەيتىن قوجا جوق» كەيىنگى شيرەك عاسىردا قاراشۇبار جامىلعى، سولەڭدەگەن سۇرىقسىزدىق، كەلتە بالاق، قاۋعا ساقال مەن سەلدىر ساقال قالادان دالاعا دەيىن قاپتاپ كەتتى. قازاقتىڭ يماندى، تاربيەلى، ءبىلىمدى ورتاسىن قارا بۇلت، ءدۇدامال ءدىل باسىپ العانداي كۇي كەشتىك. اتا-اناسىن تىڭدامايتىن ۇرپاق، ۇلت ءداستۇرىن تارك ەتكەن دىندارسىماقتار پايدا بولدى. ەڭ قاۋىپتىسى، ولار ۇرپاعىن دا جات باعىتتا تاربيەلەۋگە كوشتى»، – دەدى ديحان قامزابەكۇلى.

ول سيرياعا سوعىسقا بارىپ اداسقاندار تراگەدياسى مەن «جۋسان» وپەراتسياسىنىڭ ارقاسىندا ەلگە ورالعانداردىڭ كوز جاسى كوپكە وي سالۋعا ءتيىس ەكەنىن جەتكىزدى.

«ءدىني ەكسپانسيا تەك مۇسىلمان الەمىنە عانا قاتىستى ەمەس. حريستيان دۇنيەسى دە، باسقا ءىرىلى-ۇساقتى مۇلايىمسىگەن كونفەسسيالار دا ءبىلىم جۇيەسىنە كىرۋگە ەنتەلەگەنى جاسىرىن ەمەس. دەگەنمەن قازىر احۋال تۇزەلە باستادى. بۇل تۇرعىدا كونستيتۋتسياداعى زايىرلىلىق نورماسى وسى زارۋلىكتى وڭتايلى شەشەر ەدى» دەپ ويىن ءبىلدىردى ول.

Abai.kz