الماتى وبلىسى ىلە اۋدانى اكىمىنىڭ بۇرىنعى ورىنباسارى قۋات اقشاباەۆقا قاتىستى سوتقا دەيىنگى تەرگەۋ باستالدى. بۇل اقپاراتتى ۇلتتىق قاۋىپسىزدىك كوميتەتى راستادى.

الەۋمەتتىك جەلىدە بۇعان دەيىن قۋات اقشاباەۆتى ۇقك سىبايلاس جەمقورلىققا قارسى ءىس-قيمىل قىزمەتىنىڭ قىزمەتكەرلەرى ۇستاعانى تۋرالى اقپارات تاراعان ەدى.

ۇلتتىق قاۋىپسىزدىك كوميتەتىنىڭ ءباسپاسوز قىزمەتى Kazinform اگەنتتىگى تىلشىسىنە بۇل اقپاراتتى راستادى.

– سوتقا دەيىنگى تەرگەۋ جۇرگىزىلىپ جاتىر. وزگە اقپارات قىلمىستىق-پروتسەستىك كودەكستىڭ 201-بابى 1-بولىگىنە سايكەس جاريا ەتىلمەيدى، - دەلىنگەن جاۋاپتا.

ايتا كەتەيىك، قۋات اقشاباەۆ الماتى وبلىسى ىلە اۋدانى اكىمىنىڭ ورىنباسارى قىزمەتىنە 2025 جىلى اقپان ايىندا تاعايىندالعان. ول مۇنىڭ الدىندا ەڭبەكشىقازاق اۋدانى اكىمىنىڭ ورىنباسارى، راحات اۋىلدىق وكرۋگىنىڭ اكىمى جانە ەسىك قالاسى اكىمىنىڭ ورىنباسارى قىزمەتىن اتقاردى.

الماتى وبلىسى ىلە اۋدانى اكىمدىگى كۋات اقشاباەۆتىڭ ۇستالعانعا دەيىن ءوز ەركىمەن قىزمەتىنەن كەتۋ تۋرالى ءوتىنىش بەرگەنىن حابارلادى.

ءباسپاسوز قىزمەتىنىڭ مالىمەتىنشە، ول اۋدان اكىمىنىڭ ورىنباسارى لاۋازىمىنان بوساتىلعان جانە قازىرگى تاڭدا بۇل قىزمەتتى اتقارمايدى.

— اتالعان جاعداي قۇقىق قورعاۋ ورگاندارىنىڭ قۇزىرەتىنە جاتادى. ۋاكىلەتتى مەملەكەتتىك ورگاندارمەن ءوزارا ءىس-قيمىل قولدانىستاعى زاڭناما اياسىندا جۇزەگە اسىرىلىپ جاتىر، - دەپ حابارلادى اكىمدىك.

Abai.kz