اتى شۋلى فيلوسوف الەكساندر دۋگين رەسەيدە «ءپۋتيننىڭ ميى»، «كرەملدىڭ باس يدەولوگى» دەپ اسپەتتەلگەنىمەن، وركەنيەتتى باستىستا قارا تىزىمدەگى ادام.

ول 2014 جىلى رەسەيدىڭ ۋكراينادان قىرىمدى تارتىپ الۋ وپەراتسياسىن اشىق قولداعاننان كەيىن ەۋوروداق ونى سانكتسيا تىزىمىندەگىلەردىڭ قاتارىنا قوستى. 2015 جىلدان باستاپ اقش پەن كانادا دا وعان ەسىگىن تارس جاپتى.

ول ءپۋتيننىڭ 2022 جىلى 24 اقپاندا ۋكرايناعا باستاعان اتالمىش «ارناۋلى اسكەري وپەراتسياسىن» دا اشىق قولداۋشىلاردىڭ الدىنعى لەگىندە بولدى. ۋكراينانىڭ قارا تىزىمىنە ەنىپ، ولاردىق قۇپيا ارەكەتىنەن مەرت بولا جازدادى. ەسەسىنە اكەسىنىڭ جولىن قۋعان اسىرە بەلسەندى قىزى اجال قۇشتى.

كۇللى باتىس جۇرتى ونىڭ  قاۋىپتى يدەالارىنىڭ تارالۋىنا شەكتەۋ قويىپ، ءورىسىن تارىلتىپ وتىرعانىنا قاراماستان، ءبىزدىڭ ەلىمىز، جاۋاپتى سالالار، اسىرەسە ءبىلىم مەن مادەنيەت سالاسى بەيقامدىق تانىتىپ وتىر ەكەن.

كەشەلى-ءبىرى الەۋمەتتىك جەلىدە دۋگيننىڭ استاناداعى گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قۇرمەتتى پروفەسسورى اتاعى بار ەكەنى تالقىعا تۇسۋدە. بىزدە اتالمىش سىلتەمە بويىنشا كىرىپ كوردىك. ۆيكيپەديادا:

«دۋگين – حالىقارالىق ەۋرازيا قوزعالىسىنىڭ كوشباسشىسى. ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قۇرمەتتى پروفەسسورى» دەپ تايعا تاڭبا باسقانداي جازىلىپ تۇر.

وتكەندە عانا «بۇرىن كەڭەس قۇرامىندا بولعان قازاقستان قاتارلى ەلدەردىڭ تاۋەلسىز ەل رەتىندە ءومىر سۇرۋگە قاقى جوق!» دەپ ساندىراقتاعان ۇلتشىل ءبىلىمپازدىڭ قاشاننان بەرى ەلورداداعى ەۋرازيا ۇلتتىق ۋنيۆەرسيتەتىنىڭ "قۇرمەتتىسىنە" اينالعانى بەلگىسىز...

«ەشتەن كەش جاقسى» دەگەن. ۋنيۆەرسيتەت باسشىلىعى بۇل ماسەلەگە قاتىستى قوعامعا تۇسىنىكتەمە بەرەدى، ءتيىستى شارا قابىلدايدى دەگەن ۇمىتتەمىز.

Abai.kz