بالا قۇقىقتارى – جاڭا كونستيتۋتسيانىڭ ىرگەتاسى: الماتىدا رەسپۋبليكالىق سەسسيا ءوتتى

الماتى قالاسىندا ەلىمىزدىڭ ءبىلىم بەرۋ سالاسىنىڭ ماماندارى مەن ساراپشىلارىنىڭ باسىن قوسقان «بالا قۇقىقتارى – جاڭا كونستيتۋتسيانىڭ ىرگەتاسى» اتتى رەسپۋبليكالىق سەسسيا ءوتتى. شارانىڭ باستى باعدارى – وسكەلەڭ ۇرپاقتىڭ ءال-اۋقاتىن قامتاماسىز ەتۋدەگى پەداگوگتەردىڭ جاۋاپكەرشىلىگى مەن قۇقىقتىق تەتىكتەردى جۇيەلەۋ بولدى.

سەسسيانىڭ بارىسىندا پەداگوگتەردىڭ كاسىبي ءوزارا ارەكەتتەستىگى ماسەلەسى قوزعالدى. جيىنعا قاتىسقان 150-دەن استام مامان ءبىلىم بەرۋ مەكەمەلەرىندە بالا قۇقىعىن قورعاۋدىڭ ەڭ ءتيىمدى تاجىريبەلەرىن ورتاعا سالدى.

بالا ءال-اۋقاتى – مەملەكەتتىك ساياساتتىڭ وزەگى

جيىننىڭ شىمىلدىعىن اشقان «وركەن» بالالاردىڭ ءال-اۋقاتىن ارتتىرۋ ۇلتتىق عىلىمي-پراكتيكالىق ينستيتۋتىنىڭ پرەزيدەنتى ەلەنا ساكەنوۆا بالا قۇقىقتارىن قورعاۋ ماسەلەسى جاڭا كونستيتۋتسيا اياسىندا ساپالىق تۇرعىدان جاڭا دەڭگەيگە كوتەرىلگەنىن اتاپ ءوتتى. ونىڭ ايتۋىنشا، بالالاردىڭ ءال-اۋقاتى بۇگىندە تەك الەۋمەتتىك ماسەلە ەمەس، مەملەكەتتىك ساياساتتىڭ نەگىزگى قۇندىلىقتىق باعدارىنا اينالىپ وتىر.

پسيحولوگيالىق قاۋىپسىزدىك جانە قۇقىقتىق كەپىلدىك

سەسسيا بارىسىندا پسيحولوگيا عىلىمدارىنىڭ ماگيسترى، ءال-فارابي اتىنداعى قازۇۋ-دىڭ عىلىمي قىزمەتكەرى كامشات جۇسىپباەۆا ءبىلىم بەرۋ ورتاسىنداعى پسيحولوگيالىق قاۋىپسىزدىك ماسەلەسىنە تەرەڭ توقتالدى. ول جاڭا كونستيتۋتسيا نورمالارى مەن بالانىڭ جان-دۇنيەسىنىڭ قورعالۋى اراسىنداعى تىعىز بايلانىستى عىلىمي تۇرعىدا نەگىزدەپ بەردى. ال بەلگىلى زاڭگەر، الماتى قالالىق ازەربايجاندار قاۋىمداستىعىنىڭ ازەربايجان ايەلدەرى كەڭەسىنىڭ توراعاسى دجەيران مامەدوۆا انا مەن بالانى قورعاۋدىڭ مەملەكەتتىك كەپىلدىكتەرىنە توقتالىپ، قۇقىقتىق ساۋاتتىلىقتىڭ ماڭىزدىلىعىن العا تارتتى.

پەداگوگ مارتەبەسى جانە جاۋاپكەرشىلىك

سەسسيانىڭ نەگىزگى ناتيجەسى رەتىندە ءبىلىم بەرۋ ورتاسىندا بالا قۇقىقتارىن قورعاۋدىڭ جاڭا ادىستەمەلىك جۇيەسىنىڭ قالىپتاسۋىن اتاپ وتۋگە بولادى. بۇل شارا پەداگوگتەردىڭ جاڭا كونستيتۋتسيا قۇندىلىقتارىن كۇندەلىكتى ءىس-تاجىريبەدە شەبەر قولدانۋ داعدىلارىن شىڭداپ قانا قويماي، ساراپشىلار مەن پراكتيك-ماماندار اراسىنداعى كاسىبي بايلانىستىڭ نىعايۋىنا سەپتىگىن تيگىزدى. وسىلايشا، جيىن قاتىسۋشىلارى بالانىڭ ءال-اۋقاتىن قامتاماسىز ەتۋدە ورتاق باعىت-باعدار ايقىنداپ، سالالىق ىنتىماقتاستىقتىڭ جاڭا دەڭگەيىنە جول اشتى.

بولاشاققا باعدار

ۇيىمداستىرۋشىلاردىڭ ايتۋىنشا، مۇنداي جيىندار مەكتەپ قابىرعاسىنداعى ءاربىر بالانىڭ ءوزىن قاۋىپسىز ءارى ەركىن سەزىنۋىنە، ال ۇستازداردىڭ قۇقىقتىق شەڭبەردە نىق جۇمىس ىستەۋىنە جول اشادى. سەسسيا سوڭىندا قاتىسۋشىلار بالانىڭ ءال-اۋقاتىن جاقسارتۋعا باعىتتالعان ناقتى ۇسىنىمدار قابىلدادى.

«بالا قۇقىعىن قورعاۋ – مەملەكەتتىڭ تۇراقتى بولاشاعىنىڭ نەگىزى» ەكەنىن تاعى ءبىر مارتە دالەلدەگەن بۇل شارا ءبىلىم بەرۋ سالاسىنداعى ماڭىزدى قادامداردىڭ ءبىرى بولدى.

Abai.kz