قازاقستاننىڭ حالىق ءارتىسى، تەاتر رەجيسسەرى، پروفەسسور، پلاتينالى «تارلان» تاۋەلسىز سىيلىعىنىڭ، «پاراسات» جانە «بارىس» وردەندەرىنىڭ يەگەرى، مەملەكەتتىك ستيپەنديانىڭ لاۋرەاتى ەسمۇحان نەسىپبايۇلى وباەۆ ومىردەن ءوتتى.

Abai.kz اقپاراتتىق پورتالىنىڭ ۇجىمى قازاقستاننىڭ حالىق ءارتىسى ەسمۇحان نەسىپبايۇلى وباەۆ دۇنيەدەن وتۋىنە بايلانىستى وتباسى مەن جاقىن تۋىستارىنا، تۋعان حالقىنا قايعىرا كوڭىل ايتادى.

ەسمۇحان نەسىپبايۇلى سانالى عۇمىرىن قازاق تەاتر ونەرىنىڭ دامۋىنا، ساحنا مادەنيەتىنىڭ وركەندەۋىنە، ۇلتتىق رەجيسسۋرا مەن اكتەرلىك مەكتەپتىڭ قالىپتاسۋىنا ارناعان كورنەكتى تۇلعا بولاتىن. ۇلت مادەنيەتىنىڭ مەرەيىن وسىرگەن، تەاتر ونەرىنىڭ ابىرويىن اسقاقتاتقان ارداقتى ازامات قاي كەزەڭدە دە ونەرگە ادالدىقتىڭ، كاسىبىنە جاۋاپكەرشىلىكتىڭ ۇلگىسىن كورسەتە ءبىلدى. ول تاربيەلەگەن بۋىن، ساحنالاعان تۋىندىلار مەن قالىپتاستىرعان كوركەمدىك ۇستانىم قازاق تەاترىنىڭ التىن قورىندا قالا بەرمەك.

ۇلتتىق مادەنيەتتىڭ دامۋىنا سۇبەلى ۇلەس قوسقان ەسمۇحان نەسىپبايۇلىنىڭ جارقىن بەينەسى، شىعارماشىلىق مۇراسى مەن عيبراتتى عۇمىر جولى حالقىمىزدىڭ جادىندا ماڭگى ساقتالادى دەپ سەنەمىز.

مارقۇمنىڭ جانى ءجانناتتا، يمانى سالامات، توپىراعى تورقا بولسىن!

بەكجان تۇرىس:

قازاق تەاترى تاعى ءبىر اسىلىنان ايىرىلدى. ءاسانالى اعامىزدىڭ قازاسىنا قابىرعامىز قايىسىپ، مۇڭنان ارىلا الماي جۇرگەندە ەسمۇحان اعامىزدىڭ دۇنيەدەن ءوتۋى - ءبىز ءۇشىن ورنى تولماس قايعى بولدى. كوڭىل قۇلازىپ، جان جابىرقاپ تۇر. كەشە عانا قاتار جۇرگەن، ارامىزدا بولا تۇراتىنداي كورىنەتىن قوس تۇلعانىڭ بىرىنەن كەيىن ءبىرى اتتانۋى ءومىردىڭ وتكىنشى ەكەنىن سەزىندىردى. ەكەۋىن توعىستىرعان ورتاق قاسيەت – حالىققا دەگەن شەكسىز سۇيىسپەنشىلىك پەن ونەرگە دەگەن ادالدىق. اس-اعا تەاتردان شەتتەپ كەتكەندە ارامىزعا قوسىپ، قارا شاڭىراققا قايتا ورالۋىنا سەبەپشى بولعان دا ەسمۇحان اعا ەدى. اس-اعادان ۇزاق ۋاقىتقا اجىراعىسى كەلمەگەندەي زامانداسىنىڭ سوڭىنان كەتە باردى… ماۋسىم ايىندا 85-كە تولار ەدى…

ەس-اعا – سانالى عۇمىرىن ساحناعا ارناعان، تەاتر ونەرىن تىرشىلىك كوزىنە اينالدىرىپ، ۇلت رۋحىمەن ۇشتاستىرعان تۇلعا. اعانىڭ ەڭبەك جولىنا كوز جۇگىرتسەك، قايراتكەرلىك بولمىسى ايقىن كورىنەدى. ۇزاق جىلدار بويى سەمەي تەاترىن باسقارىپ، ءوسىپ-وركەندەۋىنە ولشەۋسىز ۇلەس قوستى. جيىرما جىل بويى تاباندى ەڭبەك ەتىپ، تەاتردى جاڭا دەڭگەيگە كوتەردى، كورەرمەننىڭ ىقىلاسىنا بولەنگەن رۋحاني ورداعا اينالدىردى. بۇل – ۇيىمداستىرۋشىلىق قابىلەتتىڭ مىقتىلىعى، ونەرگە دەگەن شىنايى جاناشىرلىقتىڭ بەلگىسى. ال 2001-2013 جىلدار ارالىعىندا قازاق ونەرىنىڭ قارا شاڭىراعىن باسقارۋى – ونىڭ كاسىبي بىلىكتىلىگىنىڭ وسكەنىنىڭ، بەدەلىنىڭ بيىكتەگىنىنىڭ دالەلى.

ەسمۇحان وباەۆ – ون ءۇش جىل بويى وسى ۇجىمعا جەتەكشىلىك ەتىپ، ۇلتتىق تەاتر ونەرىنىڭ دامۋىنا ءوز قولتاڭباسىن قالدىرا العان جان. بۇل كەزەڭدە دە ول شىعارماشىلىق ىزدەنىسىن توقتاتپاي، ساحنا مادەنيەتىنىڭ بيىكتەۋىنە ىقپال ەتتى. ەس-اعا تەك باسشى ەمەس، ول – ۇستاز، ول – تاربيەشى، ونەردىڭ جاناشىرى بولدى. ونىڭ تاربيەسىن كورگەن تالاي جاس اكتەرلەر مەن رەجيسسەرلەر بۇگىنگى تاڭدا قازاق ساحناسىنىڭ ماقتانىشىنا اينالدى. وزدەرى دە «وباەۆتىڭ شاكىرتتەرىمىز» دەگەندى ماقتانىپ ايتادى. ەس-اعا سابيدەي سەنگىش، بالاداي اڭعال، اڭقاۋلىعى دا بار، وزىنە عانا جاراساتىن ەرەكشە مىنەزدىڭ يەسى ەدى… قاراپايىم ەدى، سۇيكىمدى ەدى… كۇنى كەشە عانا ورتامىزدا جۇرگەن جايدارى ادام جايلى «ەدى-ەدى-ەدى…» دەپ وتكەن شاقتا جازۋ قانداي اۋىر! ول اس-اعانى جالعىزسىراتقىسى كەلمەدى مە ەكەن…

جاڭا قويىلىمداردى كورۋگە تەاتر زالىنىڭ ورتاسىمەن اسىقپاي اياڭداپ كەپ كورەرمەن ورتاسىنداعى ءوز ورىندارىنا جايعاساتىن، قاۋقىلداسا كورىسىپ، ادەمى ازىلدەرىمەن قاعىسا جونەلىپ، كەڭكىلدەي كۇلەتىن ەسمۇحان اعا اس-اعانى ىزدەپ سوڭىنان كەتتى… قوش، ەس-اعا…

Abai.kz