22 مەملەكەت قول قويعان: قازاقستانداعى شەتەلدىك ەلشىلىكتەر لگبت-نى قولداپ، مالىمدەمە جاريالادى. «لگبت مەن پەدوفيليانى ناسيحاتتاۋعا» قاتىستى تۇزەتۋلەرگە پرەزيدەنت قاسىم-جومارت توقاەۆ 2025 جىلعى 30 جەلتوقساندا قول قويعان.

قازاقستانداعى ەۋروپالىق وداق وكىلدىگىنىڭ Instagram-پاراقشاسىندا لگبتكيا+ قاۋىمداستىعىن قولداۋعا ارنالعان شەتەل ەلشىلىكتەرىنىڭ بىرلەسكەن مالىمدەمەسى جاريالاندى، دەپ حابارلايدى Ulysmedia.kz.

مالىمدەمە 17 مامىر – گوموفوبيا، بيفوبيا جانە ترانسفوبياعا قارسى حالىقارالىق كۇنگە (IDAHoBIT) وراي جاريالانعان.

«ءبىز لگبتكيا+ وكىلدەرىنە وزگەرمەيتىن قولداۋىمىزدى بىلدىرەمىز. وسى كۇندى قوعامنىڭ حاباردارلىعىن ارتتىرۋعا، ديالوگتى دامىتۋعا جانە قازاقستان مەن الەمدەگى تەڭدىك پەن كەمسىتپەۋ قاعيداتتارىنا ادالدىعىمىزدى راستاۋعا مۇمكىندىك رەتىندە پايدالانامىز»، – دەلىنگەن ۇندەۋدە.

قۇجات اۆتورلارى ادام قۇقىقتارىن قورعاۋدىڭ ماڭىزىن اتاپ ءوتتى. ولاردىڭ پىكىرىنشە، ءار ادام زورلىق-زومبىلىق پەن قۋدالاۋدان قورىقپاي، قوعامدىق ومىرگە ەركىن ارالاسىپ، ءوز قۇقىقتارىن جۇزەگە اسىرا الۋى ءتيىس.

مالىمدەمەدە 2026 جىلدىڭ «دەموكراتيا جۇرەگىندە» اتتى تاقىرىبىنا ەرەكشە نازار اۋدارىلعان. اۆتورلار دەموكراتيالىق جۇيە قوعامنىڭ بارلىق مۇشەسىنىڭ مۇددەسىن ەسكەرەتىن ينكليۋزيۆتى ورتا بولۋى قاجەت ەكەنىن ايتقان. ولاردىڭ پىكىرىنشە، ارالۋاندىلىق قوعامنىڭ تۇراقتىلىعىن كۇشەيتىپ، يننوۆاتسيانىڭ دامۋىنا جانە ءتۇرلى الەۋمەتتىك توپتاردىڭ تولىققاندى وكىلدىك الۋىنا ىقپال ەتەدى.

«الەمنىڭ ءار وڭىرىندە كەمسىتۋشىلىك، زورلىق-زومبىلىق جانە ادام قۇقىقتارىن تولىق جۇزەگە اسىرۋعا كەدەرگى كەلتىرەتىن ماسەلەلەر ءالى دە ساقتالىپ وتىر. لگبتكيا+ قاۋىمداستىعى وكىلدەرىن قوسا العاندا، بارلىق ادامنىڭ ەركىن، قاۋىپسىز ءارى قادىر-قاسيەتىن ساقتاپ ءومىر ءسۇرۋ مۇمكىندىگىن قامتاماسىز ەتۋ دەموكراتيا ءۇشىن ماڭىزدى. تەڭدىك پەن ادىلدىك اشىق ءارى دەموكراتيالىق قوعامنىڭ نەگىزى بولۋى ءتيىس»، – دەلىنگەن مالىمدەمەدە.

ۇندەۋگە اۆستريا، بەلگيا، كانادا، دانيا، ەستونيا، فينليانديا، فرانتسيا، گەرمانيا، گرەكيا، يتاليا، جاپونيا، لاتۆيا، ليتۆا، ليۋكسەمبۋرگ، نيدەرلاند، پورتۋگاليا، سلوۆەنيا، يسپانيا، شۆەتسيا، شۆەيتساريا، ۇلىبريتانيا جانە سولتۇستىك يرلانديا ەلشىلىكتەرى، سونداي-اق قازاقستانداعى ەۋروپالىق وداق وكىلدىگى قول قويعان.

قازاقستاندا «لگبت ناسيحاتىنا» تىيىم سالاتىن زاڭ نورمالارى قابىلدانعاننان كەيىن ەۋروپالىق وداق پەن بىرقاتار باتىس مەملەكەتى الاڭداۋشىلىق بىلدىرگەن ەدى.

زاڭ جوباسى تالقىلانىپ جاتقان كەزدە ەو-نىڭ قازاقستانداعى ەلشىسى الەشكا سيمكيچ بۇل ماسەلەنى سەنات توراعاسىنىڭ ورىنباسارى جاقىپ اسانوۆپەن كەزدەسۋدە كوتەرگەن. كەيىن بىرنەشە ەلدىڭ ديپلوماتيالىق ميسسياسى زاڭداعى جاڭا شەكتەۋلەردى سىنعا العان بىرلەسكەن مالىمدەمە جاريالاعان بولاتىن. ديپلوماتتار زاڭ نورمالارىنداعى تۇجىرىمداردىڭ ناقتى ەمەستىگى حالىقارالىق ادام قۇقىقتارى جونىندەگى مىندەتتەمەلەردىڭ ساقتالۋىنا قاۋىپ ءتوندىرۋى مۇمكىن ەكەنىن مالىمدەدى.

«لگبت مەن پەدوفيليانى ناسيحاتتاۋعا» قاتىستى تۇزەتۋلەرگە پرەزيدەنت قاسىم-جومارت توقاەۆ 2025 جىلعى 30 جەلتوقساندا قول قويعان. وزگەرىستەر اكىمشىلىك قۇقىقبۇزۋشىلىق تۋرالى كودەكستىڭ 456-بابىنا ەنگىزىلدى.

العاشقى قۇقىقبۇزۋشىلىق ءۇشىن 20 اەك كولەمىندە ايىپپۇل (78 640 تەڭگە), ال قايتالانسا 40 اەك-كە دەيىن ايىپپۇل نەمەسە 10 تاۋلىككە دەيىن اكىمشىلىك قاماۋ قاراستىرىلعان.

زاڭ 2 ناۋرىزدان باستاپ كۇشىنە ەندى. الايدا قۇقىق قورعاۋشىلار مەن زاڭگەرلەر جاڭا نورمالاردى قولدانۋ تەتىگىنە قاتىستى سۇراقتار ءالى دە بار ەكەنىن ايتىپ كەلەدى.

ءساۋىر ايىنىڭ سوڭىندا ىشكى ىستەر مينيسترلىگى استانا، الماتى قالالارىندا جانە اباي، اتىراۋ، جامبىل، پاۆلودار، ماڭعىستاۋ وبلىستارىندا ءداستۇرلى ەمەس سەكسۋالدىق باعدارداعى ادامدارعا قاتىستى 20 قىلمىستىق ءىس قوزعالعانىن حابارلاعان ەدى.

Abai.kz