«سانجار بوقاەۆتى قۇرىلتاي سايلاۋى اياسىندا قىلمىستىق قۋدالاۋ. مالىمدەمە» دەگەن ايقايلاعان تاقىرىپپەن وتكەن ءباسپاسوز ءماسليحاتىنان جۇرت اقپاراتتىق جاڭالىق كۇتكەن ەدى. الايدا، قىلمىستىق ءىستىڭ اق-قاراسىن اشادى دەگەن سپيكەرلەر باق وكىلدەرىنىڭ وتكىر ساۋالدارىنا مۇلدەم دايىن بولماي شىقتى. جيىن اشىق ديالوگ ەمەس، مىنبەردەگىلەردىڭ ءوزىن-ءوزى جارنامالاۋ الاڭىنا اينالىپ كەتكەندەي اسەر قالدىردى.

ۇيىمداستىرۋ جاعىنداعى ولقىلىقتار ءىس-شارا باستالماي جاتىپ-اق بايقالدى. باستى سپيكەرلەردىڭ ءبىرى، بۇرىنعى ادۆوكات مۇرات ادام ءباسپاسوز ءماسليحاتىنا مۇلدەم كەلگەن جوق. قوعام بەلسەندىسى ءالنۇر ىلياشەۆ ونىڭ شەتەلگە شۇعىل ەمدەلۋگە كەتكەنىن ايتىپ، «ول جاقتا ينتەرنەت ناشار» دەگەن جەلەۋمەن ارىپتەسىنىڭ ارەكەتىن اقتاپ الۋعا تىرىستى. ال ەكىنشى سپيكەر رەتىندە تانىستىرىلعان ۆلاديمير دۆورەتسكي جۋرناليستەرمەن تەك قاشىقتان، ونلاين بايلانىسقا شىعۋدى ءجون كورىپتى.

جيىن بارىسىندا ءىس ماتەريالدارىنا قاتىستى ناقتى ءارى جان-جاقتى تالداۋ جاسالادى دەگەن ءۇمىت تە اقتالمادى. فاكتىلەردىڭ ورنىنا سپيكەرلەر جالپىلاما سوزدەن اسا المادى. ماسەلەن، ءالنۇر ىلياشەۆ ۋاقىتتىڭ باسىم بولىگىن فيلوسوفيالىق وي-تولعاۋلارعا، كىتاپ وقۋعا كەڭەس بەرۋگە جانە ءوز اۋلەتىنىڭ شەجىرەسىن بايانداۋعا ارنادى.

ال ۆلاديمير دۆورەتسكي سانجار بوقاەۆتىڭ بيىلعى اقپان ايىندا اقش-تان جولداعان ەسكى اۋديوحابارلاماسىن تىڭداتۋمەن شەكتەلدى. ول جازبادا بوقاەۆ ساياساتتان شارشاعانىن ايتىپ، الەۋمەتتىك جەلىدەگى وزىنە جازىلعان جاعىمسىز پىكىرلەرگە شاعىمدانعان ەكەن.

جۋرناليستەر قاۋىمى بوقاەۆتىڭ 2015-2017 جىلدارى «قازترانسگاز» اق باسقارما توراعاسىنىڭ كەڭەسشىسى بولىپ تۇرعان كەزدەگى قارجى جىمقىرۋ ىسىنە قاتىسى بار-جوعىن سۇراپ، جاۋاپ الۋعا تىرىستى. بىراق ءالنۇر ىلياشەۆ «تەرگەۋ قۇپياسى» دەگەندى العا تارتىپ، بۇل ساۋالداردان سىرعاقتاپ كەتتى.

ەڭ قىزىعى – تەرگەۋگە ىلىنگەن بوقاەۆتىڭ اتىنداعى قىمبات اۆتوپارككە قاتىستى سۇراق قويىلعان كەزدە بولدى. جۋرناليستەر قۇنى ونداعان ميلليون تۇراتىن Toyota LC 300, BMW 545, ZEEKR X, Toyota Tundra كولىكتەرى مەن BMW موتوتسيكلىنىڭ قايدان كەلگەنىن سۇراعاندا، ۆلاديمير دۆورەتسكي ەشقانداي تۇسىنىكتەمە بەرمەستەن Zoom جەلىسىنەن شىعىپ كەتتى. ءسويتىپ، ول ارىپتەسى ىلياشەۆتى زالداعى باق وكىلدەرىمەن بەتپە-بەت جالعىز تاستاپ قاشا جونەلدى.

ءباسپاسوز ءماسليحاتىنىڭ سوڭىنا قاراي بەلگىلى جۋرناليست ۆاديم بورەيكو ءىس-شارا اتاۋىنىڭ وزىندە ەش قيسىن جوق ەكەنىن ايتتى. ول «قۇرىلتاي مۇشەلەرى پارتيالىق ءتىزىم ارقىلى جاساقتالاتىن بولسا، بۇل قىلمىستىق ءىستىڭ قۇرىلتايعا قانداي قاتىسى بار؟» دەپ توتەسىنەن قويدى.

الايدا سپيكەر بۇل جولى دا ناقتى جاۋاپتى جىلى جاۋىپ، اڭگىمە اۋىلىن «سەرىكتەسىمنىڭ ءىسىن جالعاستىرۋعا دايىنمىن» دەگەن ءوزىنىڭ جەكە امبيتسياسىنا بۇرىپ جىبەردى. اقىرىندا، بۇل الاڭدى ۇسىنعان قازاقستاننىڭ ادام قۇقىقتارى جونىندەگى حالىقارالىق بيۋروسى ونلاين-ترانسلياتسيانى مەرزىمىنەن بۇرىن توقتاتىپ تاستادى.

ەسكە سالا كەتەيىك، قازىرگى تاڭدا بلوگەر سانجار بوقاەۆقا باۋم توعايىندا زاڭسىز اعاش كەسۋدى ۇيىمداستىردى جانە اسا ءىرى مولشەردە الاياقتىق جاسادى دەگەن ايىپتار تاعىلىپ وتىر.

Abai.kz