ازاماتتاردىڭ ونلاين-وتىنىشتەر پلاتفورماسىندا قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگىنىڭ باسشىلىعىن اۋىستىرۋدى تالاپ ەتكەن پەتيتسيا پايدا بولدى، دەپ حابارلايدى Ulysmedia.kz.

پەتيتسيا اۆتورى ءوزىن «شاعىن جانە ورتا بيزنەس وكىلدەرىنىڭ اتىنان» سويلەپ وتىرعانىن ايتىپ، ەلدەگى قارجى سەكتورىنداعى احۋالعا الاڭداۋشىلىق بىلدىرگەن. ونىڭ پىكىرىنشە، قارجى نارىعىن رەتتەۋ اگەنتتىگى كاسىپكەرلەر مەن قاراپايىم ازاماتتاردىڭ ەمەس، بانكتەردىڭ مۇددەسىن قورعايدى.

پەتيتسيا ماتىنىندە ۋاكىلەتتى ورگان تاراپىنان ءتيىمدى رەتتەۋ شارالارىنىڭ جەتكىلىكسىزدىگى قارجىلىق تۇراقسىزدىقتىڭ ارتۋىنا، حالىقتىڭ شامادان تىس نەسيە جۇكتەمەسىنە جانە ازاماتتاردىڭ ينتەرنەت-الاياقتاردىڭ قۇربانىنا اينالۋ قاۋپىنىڭ كۇشەيۋىنە اكەلگەنى ايتىلعان.

سونىمەن قاتار اۆتورلار ونلاين-الاياقتىقتىڭ كەڭ تارالۋىنا جانە حالىقتىڭ قارىزعا بەلشەدەن باتۋىنا دا اگەنتتىكتى جاۋاپتى دەپ ەسەپتەيدى. الايدا بۇل ماسەلەلەردىڭ بىرقاتارى قۇقىق قورعاۋ ورگاندارىنىڭ قۇزىرەتىنە جاتاتىنىن اتاپ وتكەن ءجون.

پەتيتسيادا بارلىق بانككە ورتاق بىرىڭعاي QR-كود جۇيەسىنىڭ ەنگىزىلۋى كاسىپكەرلەردىڭ شىعىنىن كوبەيتكەنى دە ايتىلعان. اۆتوردىڭ مالىمەتىنشە، نارىقتاعى ءىرى بانكتەر بىرىڭعاي QR ارقىلى تولەم قابىلداعانى ءۇشىن 1,5%-عا دەيىن قوسىمشا كوميسسيا بەلگىلەگەن.

سونىڭ سالدارىنان شاعىن بيزنەس ءۇشىن بانكارالىق كوميسسيالار ءوسىپ، تولەم قابىلداۋ قىمباتتاعان. بۇل كاسىپكەرلەردى بۇرىنعىداي ءار بانككە جەكە POS-تەرمينال قولدانۋعا ماجبۇرلەپ، بيزنەستىڭ تابىستىلىعىنا كەرى اسەرىن تيگىزىپ وتىر دەلىنگەن.

پەتيتسيا اۆتورلارى نەنى تالاپ ەتىپ وتىر؟

ءوتىنىش اۆتورلارى بىرىڭعاي QR ارقىلى تولەم جاساۋ كەزىندەگى جالپى كوميسسيا مولشەرىن 0,5%-عا دەيىن تومەندەتۋدى، ميكروقارجى ۇيىمدارىن قاتاڭىراق رەتتەۋدى جانە اگەنتتىك جۇمىسىنىڭ ناتيجەسىنە كوڭىلى تولماعاندىقتان اگەنتتىكتورايىمى ءمادينا ابىلقاسىموۆانى قىزمەتىنەن بوساتۋدى تالاپ ەتكەن.

ايتا كەتەيىك، اگەنتتىك كەيىنگى جىلدارى حالىقتىڭ شامادان تىس نەسيە الۋىن شەكتەۋ باعىتىندا تۇتىنۋشىلىق نەسيەلەۋ نارىعىنا بىرقاتار شەكتەۋ ەنگىزىپ كەلەدى. سوعان قاراماستان، قازاقستاندىقتاردىڭ بانكتەر الدىنداعى مەرزىمى وتكەن بەرەشەگى 1 ترلن تەڭگەدەن اسىپ كەتكەن.

Abai.kz