الماتىداعى سوقپاقباەۆ اتىنداعى مەكتەپتەن سوقپاقباەۆ ەسىمى الىنىپ تاستالدى، - دەپ حابارلايدى اباي-اقپارات "ەگەمەن قازاقستان" باسىلىمىنا سىلتەمە جاساپ. اتالعان گازەتكە بەلگىلى عالىم ساعاتبەك مەدەۋبەكۇلى «مەكتەبىمىزگە بەردىبەك سوقپاقباەۆ ەسىمىن قايتارىڭىزدار!..» اتتى ماقالا جازعان. ءبىز سول ماتەريالدى جاريالاي وتىرىپ، الماتى قالالىق ءبىلىم باسقارماسىنان وسى وقۋ جىلىنان باستاپ، قاتەلىكتى تۇزەپ، قازاقتىڭ كلاسسيك جازۋشى اتىنداعى مەكتەپكە  قايتادان جازۋشىنىڭ ەسىمىن بەرۋدى وقىرماندار اتىنان تالاپ ەتەمىز. بۇل ماسەلە الداعى ۋاقىتتا Abai.kz اقپاراتتىق پورتالىنىڭ باستى نازارىندا بولاتىنىن ەسكەرتەمىز. 

Abai.kz اقپاراتتىق پورتالى

«مەكتەبىمىزگە بەردىبەك سوقپاقباەۆ ەسىمىن قايتارىڭىزدار!..»

1992 جىلى قازىرگى تاۋسامالى، بۇرىنعى كامەنكا اۋىلىندا تۇڭعىش قازاق مەكتەبى ەسىك اشتى. بۇل يگى ىسكە ۇلتىن سۇيگەن ءبىراز پاتريوت ازاماتتار ءبىر كىسىدەي اتسالىستى.

1993 جىلى 1 قىركۇيەكتە، العاشقى قوڭىراۋدا مەكتەپكە بالالار ادەبيەتىنىڭ كلاسسيگى، ايگىلى جازۋشى بەردىبەك سوق­پاقباەۆتىڭ ەسىمى بەرىلگەنى تۋرالى شەشىم وقىلدى. وعان مەكتەپتىڭ اشىلۋ سالتاناتىنا قاتىسقان سول كەزدەگى اۋىل كەڭەسىنىڭ توراعاسى مادەنيەت تاستانبەكۇلى كاركەنوۆ (قازىر اۋداندىق اقساقالدار كەڭەسىنىڭ توراعاسى), مەكتەپ ديرەكتورى ۇلتاي امانگەلدىقىزى بارحينوۆا (قازىر قاراساي اۋدانىندا اكىم­شىلىك قىزمەتتە) جانە باسقا دا قۇزىرلى ورىنداردان كەلگەن ادامدار، سونىمەن بىرگە، بۇكىل اتا-انالار مەن ۇستازدار، بارلىق اۋىل تۇرعىندارى كۋا.

وسى مەكتەپتە بەردىبەك سوق­­­­­پاقباەۆتىڭ تۋعانىنا 80­ جىل تولۋىن ۇلكەن سالتا­نات­پەن وتكىزگەنبىز. وعان بەر­دى­بەك­­تىڭ كوزىن كورگەن بەلگىلى اقىن-جازۋشىلار قادىر مىر­زا­-­الى، اشىربەك سىعاي، كا­دىر­بەك سەگىزباەۆ، باققوجا مۇ­قاي، شەكەربەك سادىحانوۆ، تە­مىر­­حان تەبەگەنوۆ، اسقانباي ەرعوجاەۆ سەكىلدى قالامگەرلەر جانە بەردىبەك سوقپاقباەۆتىڭ جارى، قىزى، باسقا دا تۋعان- تۋىس­قاندارى، رايىمبەك اۋدانىنان ارنايى دەلەگاتسيا كەلىپ قاتىسقان ەدى.

جىلدار جىلجىپ وتكەندە الماتى قالاسىندا جاڭا اۋدان شاڭىراق كوتەرگەنىنە وراي بار­لىق مەكتەپتى قايتا تىركەۋ ءجۇر­گىزىلەدى. سول كەزدە مەكتەپكە كلاسسيك جازۋشىنىڭ ەسىمى بەرىلگەنى جونىندەگى قۇجات «جوق» بولىپ شىعادى. مەكتەپ الدىمەن قاسكەلەڭ اۋدانىنا، سودان سوڭ قاراساي اۋدانىنا، ودان كەيىن اۋەزوۆ اۋدانىنا، كەيىن ناۋرىزباي اۋدانىنا اۋىستى. وسى اۋىسۋلار كەزىندە قۇجات ءبىر قالتارىستا قالعان عوي. اقيقاتىنا كەلگەندە جاۋاپكەرشىلىكپەن ءىز­دە­گەن جان بولماعان. كوپ ۇزا­ماي «مەكتەپكە بەردىبەك سوق­پاق­باەۆتىڭ اتى بەرىلگەنى ءجو­نىندەگى شەشىم جوق ەكەن» دەگەن جەلەۋمەن قاسيەتتى ەسىم اياقاستىنان الىنىپ تاستالعان دا، «№188 ورتا مەكتەپ» دەلىنە سال­عان. «ب.سوقپاق­باەۆتىڭ اتى بەرىلگەنى جونىندەگى شەشىم جوق ەكەن» دەگەن ءسوز جالعان – 1993 جىلى ال­ماتى وبلىسى اكىمدىگىنىڭ 15 قىركۇيەكتە شى­عار­عان №135 شەشىمى ءالى ءوز كۇشىن جويعان جوق.

قازىر بۇل مەكتەپ جاڭا قۇرىل­عان ناۋرىزباي اۋدانىنىڭ ەنش­ى­سىندە. مەكتەپتە العاش ەكى ءجۇز­دەي عانا وقۋشى تابالدىرىق ات­تاسا، قازىر مىڭنان استام بالا وقيدى.

1993 جىلدان باستاپ ناۋرىز­باي اۋدانى قۇرىلعانعا دەيىن بەردىبەك سوقپاقباەۆ اتىن­داعى ورتا مەكتەپتى بىتىرگەنى جونىندە قانشاما تۇلەك اتتەس­تات الدى. وسى جىلدار ىشىندە «بەر­دىبەك سوقپاقباەۆ اتىنداعى قازاق ور­تا مەكتەبى» دەپ ءمور باسىلعان قان­شاما قۇجات تولتىرىلدى. سونىڭ ءبارى زاڭسىز، بەردىبەك سوق­پاقباەۆتىڭ ەسى­مىنىڭ بەرىلۋى دە دۇرىس ەمەس بولىپ شىعا ما، سوندا؟

قازاقتىڭ اتىن الەمگە تا­نىت­­قان كلاسسيك جازۋشىنىڭ ەسى­مىن ۇرپاق جادىنان ءوشىرىپ ال­ماي، قايتا ونىڭ ءومىرى مەن شى­عار­مالارىن ناسيحاتتاۋ ارقىلى جاس بۋىن ساناسىنا وتانشىلدىق رۋحتى سىڭىرۋگە مۇرىندىق بولىپ كەلە جاتقان مەكتەپكە بەردىبەك سوقپاقباەۆ ەسىمىن قايتارۋىمىز كەرەك. بۇل مەنىڭ عانا ءسوزىم ەمەس، بۇل مەكتەپ ۇستازدارىنىڭ دا، اتا-انالارىنىڭ دا، تۇلەكتەرىنىڭ دە، قازىرگى شاكىرتتەرىنىڭ دە ءتى­لەگى.

ر.S. ءتىپتى  قينالاتىن ەشتەڭە جوق. بۇرىنعى اتى­ «بەردىبەك سوقپاقباەۆ اتىن­داعى قازاق ورتا مەكتەبى» ەدى. قا­زىرگىسى «№188 قازاق ورتا مەكتەبى» بولىپ تۇر. وسى ەكەۋىن بىرىكتىرىپ «بەردىبەك سوقپاقباەۆ اتىنداعى №188 قازاق ورتا مەكتەبى» دەپ اتاساق بولدى ەمەس پە!

ساعاتبەك مەدەۋبەكۇلى، ءبىلىم بەرۋ ءىسىنىڭ قۇرمەتتى قىزمەتكەرى

رەداكتسيادان. «اباي» اقپاراتتىق پورتالى بەردىبەك سوقپاقباەۆ مۇراسىن ۇزدىكسىز ناسيحاتتاپ كەلە جاتىر. وسىدان ءبىراز ۋاقىت بۇرىن ءبىز بەردىبەكتىڭ ەشقانداي كىتابىنا ەنبەگەن، كسرو-نىڭ توتاليتارلىق جۇيەسىنە قارسىلىق بىلدىرگەن «ەرگەجەيلى ەلىنە ساياحات» اتتى حيكاياتىن جاريالاعان ەدىك. مۇنان كەيىن جيناقتارعا ەنبەي جۇرگەن بىرنەشە اڭگىمەسىن وقىرمان نازارىنا ۇسىندىق. «بالالىق شاققا ساياحات» پوۆەسىندەگى ءبىر كەيىپكەردى تاۋىپ الىپ، سول كەيىپكەردىڭ جازۋشى جايلى ەستەلىگىن  دە جاريالادىق. سوقپاقباەۆ رومانىنىڭ تسەنزۋراعا تۇسكەن بەتتەرىن (ءبىرىنشى سىلتەمە, ەكىنشى سىلتەمە) ۇزبەي ەل نازارىنا ۇسىنىپ كەلەمىز. سوندىقتان دا، بۇل ماسەلەگە بەي-جاي قاراي المايمىز. 

Abai.kz